ISAÍAS 10 - Dios Rimashcata Quillcashcami

¹ ¡Aij, mana alli mandashcacunata churaccunalla! ¡Shuccunata llaquichingapac mandashcata churaccunalla!

² ¡Huacchacunata llaquichingapac, llaquilla causac ñuca acllashcacuna japina cashcata quichungapac, viudamanta, taita mama illac huahuacunamanta shuhuangapacmi chashnaca ruhuanguichic!

³ Taripashpa llaquichina punzhapi caru llactamanta tucuchingapac shamucpica, ¿imatac tucugringuichic? ¿Pitatac ayudachun mañagringuichic? Cancuna sumaimana cashcaca, ¿imatac tucunga?

⁴ Cancunaca prezu caccuna shina, cumurichishca, huañuchishcacuna shina urmashcami canguichic. Chashna llaquichishpapish Mandac Diosca nina japiric shina piñarishcataca mana pasachishcachu. Ashtahuanpish llaquichingaracmi.

Mandac Dios Asiria llacta jatun mandac-huan llaquichinamanta

⁵ Mandac Diosca: «¡Asiria llactata jatun mandaclla, ñuca yallita piñarishpa macana varami cangui! Ñuca yallita piñarishpa macana caspica cambac maquipimi.

⁶ Ñucata mana manchac, ñucata piñachic llactata, ñuca piñashca gentecunata llaquichichunca paitami cachasha. Chashna cachacpimi, tucui charishcacunata quichushpa, ñanpi siric turuta shina sarunga.

⁷ Paica chashna ruhuacushcataca mana yuyaringachu. Shungullapipish mana yuyaringachu. Ashtahuanpish achca llactata tucuchishpa chingachinallatami yuyaricunga.

⁸ Paica: “Ñuca churashca mandaccunaca, ¿manachu tucui jatun mandaccuna?

⁹ Ñucamanca Calno llactaca Carquemis llacta shinallatacmi. Hamat llactapish, Arfad llacta shinallatacmi. Samaria llactapish Damasco llacta shinallami.

¹⁰ Ñucaca Jerusalenpi, Samariapica ruhuashcalla dioscuna jundachishca llactacunatami japircani.

¹¹ ¿Manachu Jerusalentapish Samaria llactata ruhuashca shina ruhuashcalla dioscunandi tucuchisha?” ninga» nirca.

¹² Mandac Diosca Sión urcupi, Jerusalenpi ruhuashca quipaca Asiria llactata jatun mandactapish, pai jatun tucushpa, ñahuita alzashpa purishcamantami llaquichinga.

¹³ Asiria llactata jatun mandacca: «Ñuca poderhuan, ñuca alli yuyaiyuc cashpami caitaca ruhuani. Ñucaca alli yachacmi cani. Cai tucui gentecunapac llactacunatapish, paicuna ima charishcacunatapish quichushpami, jatun mandaccunataca sinchi runacuna shina jahualla misharcani.

¹⁴ Chai llactacunapac charishcataca cuzhapi maquita satishpa rurucunata taric shinami japircani. Shitashca rurucunata tandac shinami tandachircani. Chashna japicucpica, ima animalpish mana alasta pascarcachu. Shinallatac huacangapacpish mana picota pascarcachu» nirca.

¹⁵ ¿Hachaca yantata chictac runata yallichu canga? ¿Serruchopish cuchuc runataca yallichu canga? ¡Shina cashpaca, tauna caspipish paita apacuc runata apanmanmi! ¡Shinallatac ñañu varapish, racu caspita apanmanmi!

¹⁶ Chaimantami tucuita Mandac Diosca sinchi soldadocunaman ungüita cachanga. Paicuna sumaimana cacpipish paicunapac chaupipi ninata japichicpimi, ninaca ucllaric shina tucuchinga.

¹⁷ Israelcunapac luzca ninami tucunga. Jucha illac Diosca rupacuc ninami tucunga. Chashnami shuc punzhallapi cardoscunata, cashacunata rupachic shina tucuchinga.

¹⁸ Paicunapac sumaimana sachacunapish, alli pucuc pambacunapish tucuimi chingaringa. Chashnami mana jambiripac ungüihuan huañucuc runa shinami tucuringa.

¹⁹ Sachapi maijanlla saquirishca yuracunataca uchilla huahuacunapish yupai pudingami.

²⁰ Chai punzhacunapica israelpuramanta, Jacobopac huasi ucupuramanta puchushcacunaca ña mana ashtahuan paicunata llaquichiccuna parte tucungachu. Ashtahuanpish israelcunata Mandac jucha illac Diosllatami tucui shunguhuan yuyarishpa causanga.

²¹ Jacobopac huahua huahuapuramanta saquirishcacunaca jatun poderyuc Diospacmanmi cutiringa.

²² Israelcunaca, mama cucha patapi tiyac tiyu shina achca cashpapish maijancunallami cutiringa. Mandac Diosca paicunata llaquichinata yuyarishcami. Cashcata ruhuashpami llaquichinga.

²³ Tucuita Mandac Dios llaquichingapac yuyarishcataca tucui llactapi causaccunapac ñaupapimi pactachinga.

²⁴ Tucuita Mandac Diosca: «Sión urcupi causac ñuca acllashcacunalla, Asiria llacta jatun mandactaca ama manchaichicchu. Paicunaca Egiptopi causaccuna shinami varallahuan macanga.

²⁵ Ashtahuanpish asha punzha quipaca ñuca yallita piñarishcataca pasachishami. Chai quipaca nina japiric shina piñarishpami paicunata tucuchisha» nirca.

²⁶ Tucuita Mandac Diosca Oreb jatun quingrai ladopi, Madián llactapi huañuchishca shinami, paicunataca huañuchinga. Varata alzashpa, Egipto runacunata yacupi ucuyachishca shinami, paicunatapish tucuchinga.

²⁷ Chai punzhacunapica cancuna apashca llashac quipitapish, cancunapac cungapi churashca yugotapish anchuchingami. Aceiteta umapi tallicpimi, chai yugoca ñuturinga.

Asiria llacta soldadocuna Jerusalenman chayashcamanta

²⁸ Soldadocuna Ajat llactaman chayashpami, Migrón llactaman pasashpa rirca. Micmas llactapimi yupanga.

²⁹ Ashalla yacuta pasashpami Geba llactapi pacarirca. Ramá llactapi causaccunaca chucchurcami. Saulpac Gabaa llactamantapish miticushpami callparca.

³⁰ ¡Galim llactapi causac huarmicunalla, Lais llactaman uyaricta sinchita caparichicyari! ¡Anatot llactapi causaccunapish llaquitamari apacunguichic!

³¹ Madmena llactapi causaccunapish manchashpami caparincuna. Gebim llactapi causaccunapish miticushpami callpancuna.

³² Cunanllatacmi Nob llactaman shamushpa, Jerusalenpi tiyac Sión urcu ladoman maquita chutanga.

³³ Tucuita Mandac Diosca piñarishpami jatun ramacunatapish pitinga. Jatun yuracunatapish pitishpami polvonga.

³⁴ Jatun sacha ucuman hachahuan yaicushpami tigrachinga. Líbano urcu yuracunaca tulun nishpami tigranga.