ISAÍAS 1 - Dios Rimashcata Quillcashcami

Judapi causaccuna yallita juchallishcamanta

¹ Isaiasca Amozpac churimi carca. Paica jatun mandac Uzías, Acaz, Ezequías Judá llactata mandacui huatacunapimi Judá llactapish, Jerusalenpish ima tucunata muscuipi shina ricushcata huillarca.

² Jahua pachapish, cai pachapish uyaichic. Mandac Dios ñucaca: «Cai huahuacunataca ñucami huiñachishpa jatunyachircani. Ashtahuanpish paicunaca ñucata piñashpami, mana cazurca.

³ Huagrapish paipac dueñota ricsinmi. Burropish dueñopac corralta ricsinmi. Ashtahuanpish israelcunaca mana ricsincunachu. Ñuca acllashcacunaca mana yuyaita japincunachu.

⁴ ¡Aij, juchasapa gentecunalla, juchata aparishca gentecunalla, millaita ruhuaccunapac huahua huahuacunalla, juchayuc runapac churicunalla, Mandac Diosmanta caruyashpami, israelcunapac jucha illac Diostaca mana catisha nishpa, piñachircanguichic!

⁵ ¿Ima nishpatac ashtahuan llaquichishca canata munanguichic? Umapish tucui chugrishca, shungupish tucui nanaihuanmi canguichic.

⁶ Chaquimanta umacamanmi chugrishca, punguishca, sisushca canguichic. Cancunapac cuerpoca tucui ungushcallami. Pipish mana jambishca, mana huatachishcami canguichic. Aceiteta churashpapish pi mana chiriyachishcachu.

⁷ Cancunapac llactaca shitashcami. Pueblocunapish rupachishcami. Pambacunapi pucushcacunatapish shuctac llacta gentecunami cancunapac ñaupallapitac micushca. Shuctac llacta gentecunami shitashca pambata saquishca.

⁸ Sión llactaca uvas chagra chaupipi ruhuashca chuclla shina, melón chagra chaupipi ruhuashca chuclla shinami saquirishca. Chai llactaca piñaccunapac chaupipi shinami saquirishca» nini.

⁹ Mandac Dios ñucanchicta ashallatapish mana saquishca cacpica, Sodoma, Gomorra shinami, chingarinchicman carca.

Tucui shunguhuan Diospacman cutirinamanta

¹⁰ Sodoma pueblota mandaccuna Mandac Dios rimashcata uyaichicyari. Gomorra pueblopi causaccuna ñucanchic Dios mandashcata alli uyaichicyari.

¹¹ Mandac Diosca: «Cancuna achca animalcunata ñucaman cushpa, huañuchishcapish, ¿ñucamanca imapactac valin? Cari ovejacunata cushpa, tucui rupachishcatapish, huira animalcunapac huirata rupachishcatapish ñucaca millanimi. Huagracunata, cari ovejacunata, chivocunata huañuchishpa, cushca yahuartapish mana munanichu.

¹² Animalcunata ñucapac ñaupaman apamushpa ñuca huasi punguta saruchichunca, ¿pitac mañarcayari?

¹³ Ama ashtahuan yanga ofrendacunata cuichicchu. Inciensota rupachishcatapish, llullu quillapi, samana punzhapi cancuna tandanacushcatapish ñucaca millanimi. ¡Cancunapac jatun fiestacunataca mana ricunayanchu!

¹⁴ Llullu quillapi, jatun fiestacunapi tandanacuita cancuna ruhuashcataca mana ricunayanchu. Chaicunaca ñucamanca llashac quipi shinami. Chaicunata ricushpallami shaicuni.

¹⁵ ¡Cancunapac maquica huañuchishca yahuarllami! Chaimantami cancuna maquita alzashpa mañacpica, ñuca ñahuita pacasha. Yallita mañacucpipish manatac uyashachu.

¹⁶ Jahuarichic, picharichic. Cancuna mana allita ruhuashcataca ñuca ñaupamanta anchuchichic. Mana allita ruhuanata saquishpa,

¹⁷ allita ruhuanata yachacuichic. Allita mandanata munaichic. Llaquichic runata rimaichic. Taita mama illac huahuacunatapish, viuda huarmitapish ayudaichic» ninmi.

¹⁸ Mandac Diosca: «Cunanca tandanacushpa allichingapac ñucapacman shamuichic. Cancunapac jucha puca tela shina cacpipish, rasu shina yuranllatami ruhuasha. Yana puca tela shina cacpipish, yuranlla millma shinatami ruhuasha.

¹⁹ Ñuca rimashcata cancuna uyashpaca, cai allpapi sumac pucushca granocunatami micunguichic.

²⁰ Ashtahuanpish cariyashpa, mana uyasha nishpaca jatun macanacuipimi tucuringuichic. Chaitaca Mandac Dios ñucami nini» ninmi.

Jerusalenta taripashpa cutin allichishcamanta

²¹ Diosta alli cazuc llactalla, ¿ima nishpatac cullquimanta huainayac huarmi shina, tucurcanguiyari? Chaipica tucuimi cashcata ruhuaccuna, imatapish allita ruhuaccuna causarca. ¡Ashtahuanpish cunanca huañuchiccunallami causan!

²² Cambac cullquipish fierro ismushca shinami tucushca. Cambac vinopish yacuhuan chapushcami.

²³ Mandaccunapish mana cazuncunachu. Shuhuaccunahuan apanacuccunami tucushca. Tucui paicunami cullquita pacalla japinallata munancuna. Imatapish pacalla cuchunllami munancuna. Taita mama illac huahuacunatapish, viuda huarmicunatapish mana ayudanchu.

²⁴ Chaimantami israelcunata sinchiyachic Mandac Diosca: «¡Ña chailla! ¡Cunanca ñucata piñaccunata llaquichishpatacmi cushicusha! Ñucata mana ricunayachiccunataca paicuna mana allita ruhuashca shinallatacmi llaquichisha.

²⁵ Ñucaca canhuan yallita piñarishpami, lejiahuan cambac juchacunata jahuashpa, tucui millaicunata anchuchisha.

²⁶ Utcapi shinallatacmi alli juezcunata, allita cunaccunata churasha. Chashna ruhuacpimi: “Cashcata ruhuac, Diosta alli cazuc llactami” ningacuna.

²⁷ Sión llactata quishpichishpami, ñucapacman cutin cutichisha. Chaipi causaccuna ñucapacman cutirishcamantaca cashcata ruhuashpami quishpichisha.

²⁸ Ashtahuanpish cariyashpa, mana cazuc juchasapacunataca tandachishpami tucuchisha. Mandac Dios ñucata cungariccunaca tucuimi tucuchishca canga.

²⁹ Chashna ruhuacpimi, cancunaca encina yuracunata cuyashcamanta pingaichishca canguichic. Cancuna acllashca huertacunatapish burlashpami pingaichinga.

³⁰ Cancunaca panga chaquishpa, urmashca encina yura shina, yacu illac huerta shinami tucunguichic.

³¹ Sinchi runapish tamo shinami tucunga. Pai imata ruhuashcaca uchupa shinami tucunga. Ishcaitatacmi rupachishca canga. Chai ninataca pi mana huañuchi pudingachu» ninmi.