HECHOS 8 - Dios Rimashcata Quillcashcami

¹ Estebanta huañuchicta Saulo ricushpaca: “Allitami ruhuanguichic” nishpami cushicurca. Chai punzhacunapica Jerusalén pueblo criccunataca yallitami llaquichi callarirca. Chaimantami criccunaca Judea llactata, Samaria llactata miticushpa rircacuna. Ashtahuanpish apostolcunallami mana maiman rishpa saquirirca.

Tandanacushca criccunata Saulo llaquichishcamanta

² Dios yuyailla causac runacunami yallita huacashpa, Estebantaca enterrarca.

³ Ashtahuanpish Sauloca tandanacushca criccunata tucui chingachinata munashpami, huasi huasi yaicushpa, caricunatapish, huarmicunatapish, carcelman cachac carca.

Samaria llactapi alli huillaita huillashcamanta

⁴ Ashtahuanpish Jerusalenmanta miticushpa ric criccunaca maita rishpapish, quishpirinamanta alli huillaita huillashpami purirca.

⁵ Felipepish Samaria puebloman rishpami, Jesucristomanta huillarca.

⁶ Tucui gentecunami Felipe milagrocunata ruhuacta ricushpaca, pai huillashcata sumacta uyac carca.

⁷ Taucacunamantami llaquichic supaicunata llucchishpa cacharca. Chai supaicunaca caparishpami llucshic carca. Tauca paralisis ungushcacunatapish, suchucunatapish alliyachircami.

⁸ Chaimantami chai pueblopica yallita cushicurcacuna.

⁹ Chai pueblopica, Simón shuti runami causarca. Paica ñaupaca brujomi carca. Chaimantami chai llactapi causaccunataca “alli runami cani” nishpa, umashpa, crichishpa causac carca.

¹⁰ Chai runa yachachishcataca uchillacunapish, jatuncunapish uyacmi carca. Chai uyaccunaca: «Cai runaca poderyuc Dios shinami» nic carca.

¹¹ Tauca huatacunata brujeriata ruhuashpa causashcamantami, tucui chai llactapi causaccunaca paita sumacta uyac carca.

¹² Chashna cacpipish, Jesucristomanta, Dios mandacucmanta Felipe huillacpica, caricunapish, huarmicunapish crishpami bautizarirca.

¹³ Chai brujo Simonpish Jesusta crishpa, bautizarishpami Felipehuan puricurca. Paica milagrocunata, mancharinacunata ruhuacta ricushpami, mancharishpa puric carca.

¹⁴ Jerusalenpi cac apostolcunaca Samaria pueblopi causaccunapish alli huillaita uyashpa crishcata yachashpami Pedrotapish, Juantapish chaiman cacharca.

¹⁵ Paicuna chaiman chayashpaca, criccuna Diospac Espirituta chasquichunmi, paicunamanta Diosta mañarca.

¹⁶ Paicunapacman Diospac Espíritu manarac shamushca cacpimi, Apunchic Jesuspac shutillapi bautizashca carcacuna.

¹⁷ Chaimantami Pedropish, Juanpish chai criccunapac uma jahuapi maquita churacpica, Diospac Espirituta chasquircacuna.

¹⁸ Apostolcuna criccunapac uma jahuapi maquita churacpi, criccuna Diospac Espirituta chasquicta Simón ricushpami, cullquihuan randinata munarca.

¹⁹ Chashna munashpami: —Ñucapish maijanpac uma jahuapi maquita churashpa, Diospac Espirituta chasquichingapac, ñucamanpish poderta cuichic— nirca.

²⁰ Chaimantami Pedroca: —¡Can Diospac poderta cullquihuan randisha nishcamantaca, cambac cullquindimi chingarigringui!

²¹ Cambac shungu Dios-huan mana alli cashcamantami, paipac podertaca canman mana cun.

²² Can mana allita yuyanata saquishpa, Diosta mañai. Chashna mañacpica, cambac shungu mana allita yuyashcataca perdonangapishchari.

²³ Cambac shungupica hiel shina jayacmi jundashca. Chaimantami juchapi huatashca shina cangui— nirca.

²⁴ Chashna nicpimi Simonca: —Can nishca shina ama pactachun, Mandac Diosta ñucamanta mañaichic— nirca.

²⁵ Pedropish, Juanpish Jesucristomanta huillashpa, Dios rimashcacunata yachachishpaca, Samaria llacta tauca uchilla pueblocunapipish alli huillaita huillashpami, Jerusalenman cutircacuna.

Etiopía llacta runaman Felipe huillashcamanta

²⁶ Mandac Diospac angelca Felipetaca: «Jatarishpa, Jerusalenmanta shitashca pamba ñanta Gaza puebloman ri» nirca.

²⁷ Chashna nicpimi, Felipe jatarishpa rirca. Chashna ricushpami, Etiopía llactamanta eunuco runahuan tuparca. Paica Etiopía llactata jatun mandac Candace huarmipac charishcacunata cuidacmi carca. Paica Jerusalenpi Diosta alli nishpami, paipac llactaman cuticurca.

²⁸ Paica Jerusalenmantami carretapi tiyashpa, Dios ima nishcata huillac Isaías quillcashcata rezashpa cuticurca.

²⁹ Diospac Espirituca Felipetaca: «Chai carretaman cuchuyai» nirca.

³⁰ Felipe cuchuyashpa, Dios ima nishcata huillac Isaías quillcashcata rezacucta uyashpaca: —¿Can rezacushcataca entendinguichu?— nirca.

³¹ Chashna nicpimi, chai runaca: —Pipish mana yachachicpica, ¿ima shinatac entendishayari?— nirca. Shina nishpami, carretaman huichicushpa, tiyarichun mañarca.

³² Pai rezacushca Dios quillcachishcaca: «Paitaca maltón ovejata shinami huañuchingapac aparca. Ovejata rutucucpi, upalla cac shinami, paica upalla carca.

³³ Paita yanga juchanchishpa llaquichicucpipish, pi mana misarcachu. Cai pachapi huañuchircami. Paipac, huahua huahuacunamantaca pi mana huillangachu» nicushca carca.

³⁴ Chaimanta eunuco runa Felipeta tapushpaca: —Dios ima nishcata huillacca, ¿paimantachu, mana cashpaca, maijan shucmantachu nicun? Huillaiyari— nirca.

³⁵ Shina nicpimi, Felipeca pai rezacushca quillcallatatac japishpa ricushpaca, Jesusmanta alli huillaita callaimanta huillarca.

³⁶ Yacu cuchuta ricushpami, chai runaca: —Caipica yacu tiyanmi. ¿Manachu ñucaca bautizari pudini?— nirca.

³⁷ Shina nicpimi Felipeca: —Can tucui shunguhuan crishpaca, bautizari pudinguimi— nirca. Chashna nicpimi, chai runaca: —Ari, Jesucristoca Diospac Churi cashcata crinimi— nirca.

³⁸ Chashna nishpami, carretata chaillapi shayachishpa, ishcaita yacuman yaicurca. Chaipimi Felipeca eunuco runata bautizarca.

³⁹ Yacumanta llucshicpica, Diospac Espiritumi Felipeta aparca. Chaimantami eunuco runaca Felipetaca mana ricurca. Chashna cacpipish, cushicushpami rirca.

⁴⁰ Ashtahuanpish Felipeca Azoto pueblopimi taririrca. Chaimanta callarishpami, Cesarea puebloman chayangacaman, tucui pueblocunapi alli huillaita huillashpa rirca.