HECHOS 7 - Dios Rimashcata Quillcashcami

Mandaccunahuan Esteban rimashcamanta

¹ Curacunata mandac curaca Estebantaca: —Canmanta chashna huillashcaca, ¿chashnatacchu?— nirca.

² Chaimantami Estebanca: —Huauquicuna, taitacuna, ñuca rimashcata uyaichic: «Poderyuc Diosmi ñucanchic ñaupa taita Abraham manarac Harán pueblopi causangapac ricpi, Mesopotamia llactapi cacpi ricurirca.

³ Chaipi ricurishpami Diosca: “Cambac llactatapish, cambac familiatapish saquishpa llucshi. Can maiman rina cashcataca, ñucami ricuchisha” nirca.

⁴ Chaimantami Abrahamca Caldea llactamanta llucshishpa, Harán pueblopi causangapac rirca. Paipac taita huañushca quipami, Diosca cunan cancuna causacuc llactaman pushamurca.

⁵ Diosca chai llactapica, allpataca chaqui saruillatapish mana curcachu. Shina cacpipish, Diosca: “Canmanpish, cambac huahua huahuacunamanpish allpata cushami” nishpami ari nirca. Abraham manarac huahuata charicpimi, chashna nirca.

⁶ Diosca Abrahamtaca: “Cambac huahua huahuacunaca shucpac llactapi pozashpallami causanga. Chai llactapimi chuscu patsac huatata servishpa, llaquilla causanga” nirca.

⁷ Shina cacpipish Diosca: “Servichishpa chariccunataca llaquichishami. Chai quipaca, chai llactamanta llucchishpami, cai llactapi ñucata servingacuna” nircami.

⁸ Diosca circuncisionta ruhuachunmi Abrahamhuan ari ninacurca. Chaimantami Abrahamca paipac churi Isaac pusac punzhata charicpi, circuncisionta ruhuarca. Isaacpish chashnallatacmi paipac churi Jacobotaca ruhuarca. Jacobopish paipac chunga ishcai churicunatapish chashnallatacmi ruhuarca. Chaicunaca ñucanchic ñaupa taitacunami carca.

⁹ Jacobopac churicunaca paicunapac huauqui Joseta piñashpami, Egipto llactaman catushpa cacharca. Diosca Josehuanmi carca.

¹⁰ Diosca tucui llaquimantami Josetaca cuidarca. Shinallatac Egipto llactata jatun mandacpac ñaupapi alli cachunpish, alli yuyaitami curca. Chaimantami chai jatun mandacca paipac huasipipish, tucui Egipto llactapipish mandachun churarca.

¹¹ Egipto llactapipish, cai Canaán llactapipish ima mana pucucpi, yalli yarcaimi tiyarca. Chaimantami llaquihuan carcacuna. Ñucanchic taitacunapish cai llactapica, ima micunata mana charircachu.

¹² Jacoboca, Egipto llactapi trigo tiyashcata uyashpami, paipac churicunataca punta chai llactaman cacharca.

¹³ Ishcai cutin huauquicuna Egiptoman ricpimi, Joseca, pai pi cashcata huauquicunaman huillarca. Chaimantami mandac Faraonca José maijan aillumanta cashcata yachac chayarca.

¹⁴ Chai quipami, Joseca paipac taita Jacobotapish, paipac familiacunapish pushachun cacharca. Paicunaca canchis chunga pichcami carca.

¹⁵ Chaimantami taita Jacoboca Egipto llactapi causangapac rirca. Chaipimi paipish, paipac churicunapish huañurca. Paicunaca ñucanchic ñaupa taitacunami carca.

¹⁶ Unai huatacuna quipami paicunapac tullucunataca Siquem llactaman apamurca. Chai Siquem llactapimi, Abrahamca Hamorpac churicunaman enterrana allpata randishca carca. Chaipimi chai tullucunataca enterrarca.

¹⁷ Dios Abrahamman llactata cungapac ari nishca punzhacuna pactamugricpimi, israelcunaca Egipto llactapi mirarishpa, achca tucurca.

¹⁸ Chai punzhacunapimi, Joseta mana ricsic jatun mandac Egiptota mandai callarirca.

¹⁹ Chai mandacmi ñucanchic taitacunata umashpa llaquichirca. Ama ashtahuan mirashpa catichunmi, cari huahuacuna huacharicpica, maipi shitachun mandarca.

²⁰ Chai punzhacunapimi Moisesca huacharirca. Paica Diospac alli nishcami carca. Quimsa quillatami paipac taita mamaca huasipi pacashpa charirca.

²¹ Chai huahuata huañuchun shitashcatami mandac Faraonpac ushi tarishpa, quiquin huahuata shina huiñachirca.

²² Shinami Moisesca Egipto llactapi ima yachanacunatapish alli yachachishca huiñarca. Chaimantami rimangapacpish, imata ruhuangapacpish alli yachac carca.

²³ Moisés chuscu chunga huatata charishpami, paipac aillu israelcunata ricugrinata munarca.

²⁴ Chashna rishpami, shuc Egipto runa, Israel runata macacucta ricushpa, Israel runata misashpa, Egipto runata huañuchirca.

²⁵ Moisesca ‘Israel aillucunaca ñucatami Diosca millai runacunapac maquimanta cacharichichun cachashcata entendingami’ yuyarcami. Ashtahuanpish paicunaca mana chashna entendircachu.

²⁶ Quipa punzha ricungapac rishpa, israelcunapurallatac macanacucucta ricushpaca: “Cancunaca huauquindimi canguichic. ¿Ima nishpatac cashna macanacucunguichic?” nirca.

²⁷ Chashna nicpi, chai macac runaca Moisesta tangashpaca: “¿Pitac cantaca mandachun, juez cachun churarca?

²⁸ ¿Caina Egipto runata huañuchishca shinachu, ñucatapish huañuchisha ningui?” nirca.

²⁹ Chaita uyashpami, Moisesca Madián llactaman miticushpa rirca. Chai caru llactapi causacushpami, ishcai churicunata charirca.

³⁰ Chuscu chunga huatata chai llactapi causacushpami, Moisesca Sinaí urcu cuchulla shitashca pambapi, shuc zarza yura rupacucta ricurca. Chai rupacuc yura chaupipica, shuc angelmi ricurirca.

³¹ Moisés mancharishpa, ricungapac cuchuyacucpi, Mandac Dios rimashpaca:

³² “Ñucaca cambac taita Abrahampac, Isaacpac, Jacobopac Diosmi cani” nishcatami uyarca. Chaimantami Moisesca manchaihuan chucchushpa, mana ashtahuan cuchuyanata munarca.

³³ Chaimantami Mandac Diosca: “Can shayacuc pambaca ñucapaclla saruna allpami. Chaimanta cambac ushutata llucchi.

³⁴ Egiptopi ñuca acllashca israelcuna llaquihuan causacuctami ricuni. Paicuna huacacuctapish uyanimi. Chaimantami llaquimanta llucchingapac shamurcani. Cunanca shamui, cantami Egiptoman cachagrini” nirca.

³⁵ Chai Moisestami israelcunaca Egiptopica: “¿Pitac cantaca mandac cachun, juez cachun churarca?” nishpa, piñarishca carca. Ashtahuanpish paicuna piñashca Moisesllatatacmi, Diosca zarza yurapi ricuric angelta rimachishpa, mandac cachun, Egiptomanta israelcunata llucchic cachun churarca.

³⁶ Chai Moisesmi israelcunata Egiptomanta mancharinacunata ruhuashpa, Puca Cucha chaupita llucchimurca. Shinallatac shitashca pambapipish chuscu chunga huatatami carca.

³⁷ Chai Moisesllatacmi israelcunataca: “Cancunata Mandac Diosca ñucata cachashca shinami, cancunapuramanta shuc huillacta cachanga. Pai ima nishcata cazunguichic” nirca.

³⁸ Chai Moisesllatacmi shitashca pambapi ñaupa taitacunahuan carca. Paillatacmi Sinaí urcupi ángel rimashcata ñaupa taitacunaman huillangapac apamurca. Chai rimashcacunaca causaita cuc rimaicunami.

³⁹ Chashna cacpipish, ñaupa taitacunaca Moisés yachachishcataca mana cazushun nishpami, piñarishpa, Egiptollamantac cutinata munarcacuna.

⁴⁰ Chaimantami Moisespac huauqui Aarontaca: “Ñucanchicta Egiptomanta llucchimuc Moisesca mana uyarinchu. Cunanca ñucanchicta pushac dioscunata ruhuai” nirca.

⁴¹ Chashna nishpami, beciman riccha diosta ruhuashpa, chaicunaman animalta huañuchishpa rupachishpa cushicurca.

⁴² Chaimantami Diosca quiquin munaita ruhuashpa, lucerocunatapish adorachun saquishpa, paicunamanta caruyarca. Dios ima nishcata huillaccuna quillcachishpaca: “Israelcuna, cancuna chuscu chunga huatata shitashca pambapi cashpa, animalta rupachishpaca, mana ñucamanchu curcanguichic.

⁴³ Ashtahuanpish ruhuashcalla Moloc diostami adorashpa, pai tiyanandi huandushpa purircanguichic. Renfán nishca diospac lucerocunatapish, cancunallatac ruhuashpami adorarcanguichic. Chaimantami cancunataca cai llactamanta llucchishpa, Babilonia llactata pasachishpa, ashtahuan caruman cachasha” nishcami.

⁴⁴ Ñaupa taitacuna shitashca pambapi cashpaca, Dios-huan tupana huasita huandushpami, puric carca. Chai carpa huasitaca Dios Moisesman ricuchishca shinami ruhuashca carca.

⁴⁵ Ñaupa taitacunami chai huasitaca paicunapac ñaupa taitacunamanta japishca carca. Tauca huata quipami, Josué paicunata pushamucpi, chai shitashca pambamantaca cai cunan ñucanchic causacuc llactaman apamurca. Ñucanchic taitacuna cusha nishca llactapi causachunmi, Diosca chai mana israelcunataca llucchishpa cacharca. Chai huasitaca David mandac tucungacamanmi charircacuna.

⁴⁶ Mandac Davidmi Dios cuyashca cashpa, taita Jacobo alli nina Mandac Diospac huasita ruhuangapac mañarca.

⁴⁷ Davidpac churi Salomonmi Diosta mañana huasitaca ruhuachirca.

⁴⁸ Shina cacpipish, jahua pacha Diosca gentecuna ruhuashcalla huasicunapica mana causanchu. Dios ima nishcata huillaccuna quillcachishpaca:

⁴⁹ “Jahua pachaca ñuca mandashpa tiyarinami. Cai allpaca ñuca chaqui sarunami. ¿Imalaya huasitatac ruhuagringui? ¿Maipitac samarisha?

⁵⁰ Ñucallatacmi tucui tiyashcatapish ruhuarcani” ninmi.

⁵¹ Rumi shungu gentecuna, Dios ima nishcata mana cazuccunami canguichic. Cancunapac ñaupa taitacuna shinami, Diospac Espiritutapish mana cazunguichic.

⁵² Ñaupa taitacunaca, Dios ima nishcata huillaccunata mana ricushun nishpami llaquichirca. Paicunami shamuna cashca Jucha illac, imatapish cashcata ruhuacmanta huillaccunata huañuchircacuna. Chai Jucha illac shamucpica, millai runacunaman cushpami huañuchircanguichic.

⁵³ Dios mandashcacunata angelcuna cancunaman cucpipish, mana cazunguichicchu» nirca.

Estebanta huañuchishcamanta

⁵⁴ Esteban chashna nicpimi, chai mandaccunaca quirucuna canirishpa, yallita piñarirca.

⁵⁵ Ashtahuanpish Diospac Espíritu junda cashpami, Estebanca jahua pachata huichailla ricushpa, Diospac sumaimana cashcatapish, Apunchic Jesús paipac alli lado maquiman shayacuctapish ricurca.

⁵⁶ Chashna ricushpami, Estebanca: «Ñucaca jahua pacha pascarishpa, Runa Tucungapac shamushca Jesús Diospac alli lado maquiman shayacuctami ricuni» nirca.

⁵⁷ Chashna nishcata mana uyashun nishpami, ringrita taparishpa caparircacuna. Chaimantaca huaicashpami, Estebanta japirca.

⁵⁸ Chashna japishpami pueblomanta llucchishpa, huañuchingapac rumicunahuan shitai callarirca. Shina shitacucpimi, Estebanta juchanchishpa huillaccunaca paicunapac jahualla churanacunata surcushpa, Saulo mosoman mingarca.

⁵⁹ Chashna rumicunahuan shitacucpimi, Estebanca: «Apunchic Jesús, ñuca almata pushaiyari» nishpa mañarca.

⁶⁰ Esteban cungurishpaca: «¡Apunchic Jesús, paicuna cai mana allita ruhuashcamanta ama juchanchinguichu!» nishpami caparirca. Chashna nishpaca huañurcallami.