HECHOS 5 - Dios Rimashcata Quillcashcami

Ananiasmantapish, Safira huarmimantapish

¹ Ananías, paipac huarmi Safirami tiyarca. Paicunami allpata caturca.

² Chashna catushpami, huarmihuan huillanacushpa, chaupi cullquita saquichishpa, apostolcunaman curca.

³ Chaimantami Pedroca Ananiastaca: —Ananías, ¿ima nishpatac Satanasta cambac shungupi yaicuchun saquishpa, Diospac Espirituman llullashpa, allpa catushca cullquita mana tucui apamungui?

⁴ ¿Manachu allpaca cambac carca? ¿Manachu catushca cullquipish cambac tucurca? ¿Ima nishpatac cambac shungupi chashna millaita ruhuanata yuyarircangui? Mana runacunallamanchu llullangui, Diosmanmi llullangui— nirca.

⁵ Chaita uyashcahuanmi, Ananiasca chaillapitac huañurca. Tucui chaita uyaccunami yallita mancharirca.

⁶ Ananiaspac cuerpotaca mosocunami pilluchishpa, enterrangapac aparca.

⁷ Quimsa horas shina quipami, paipac huarmi Safiraca chayarca. Paipac cusa ima tucushcataca mana yacharcachu.

⁸ Chaipimi Pedroca: —Cancunaca chai allpataca, ¿chaillapichu caturcanguichic? Chaita huillai— nirca. Shina nicpimi, chai huarmica: —Ari, chaillapimi caturcanchic— nirca.

⁹ Shina nicpimi Pedroca: —¿Ima nishpatac Mandac Diospac Espirituman llullanata yuyarircanguichic? Riqui, ñami canzha punguta cambac cusata enterraccuna yaicumucun. Cunan cantapish chashnallatacmi apangacuna— nirca.

¹⁰ Pedro chashna nincami, chai huarmica chaillapitac huañurca. Cusata enterrac mosocuna ucuman yaicucpica, chai huarmipish huañushcami cashca carca. Chaimantami paitapish, cusa maipi enterrashcallapitac enterrangapac aparcacuna.

¹¹ Chaita yachashpaca, tandanacushca criccunapish, tucui uyaccunapish yallitami mancharirca.

Mancharina milagrocunata ruhuashcamanta

¹² Apostolcunaca israelcunapurapica milagrocunatapish, mancharinacunatapish taucatami ruhuarca. Tucui criccunami Salomonpac corredorpi shuc yuyailla tandanacuc carca.

¹³ Shuctac gentecunaca paicunahuan tandanacunata mana munarcachu. Chashna cacpipish, chai pueblopi causaccunaca, tucuimi crishpa, paicunata allimi nircacuna.

¹⁴ Caricunapish, huarmicunapish Apunchic Jesusta crishpa, ashtahuanmi achca criccuna tucurca.

¹⁵ Shinallatac Pedro llandushpallapish alliyachichunmi, gentecunaca ungushcacunataca huandumushcacunandi ñanman apashpa churarca.

¹⁶ Cuchulla pueblocunamantami ungushcacunatapish, millai supai llaquichishcacunatapish Jerusalenman apamurcacuna. Chai ungushcacunaca tucuimi alliyarca.

Juantapish, Pedrotapish llaquichishcamanta

¹⁷ Chaimantami Israel curacunata mandac curapish, paihuan cac saduceocunapish envidiashpa piñarirca.

¹⁸ Shinami apostolcunataca japishpa, carcelpi churarca.

¹⁹ Chashna churacpipish, Dios cachashca ángel tuta shamushpa, cárcel punguta pascashpa, paicunata llucchishpaca:

²⁰ «Cunanca, Diosta mañana huasiman yaicushpa, tucui uyaccunaman: “Jesucristoca mushuc causaita cucmi” nishpa, huillangapac richic» nirca.

²¹ Ángel chashna nicpimi, tutamanta, Diosta mañana huasiman rishpa, yachachi callarirca. Chaimantami curacunata mandac curaca tucui paihuan caccunahuan rishpa, tucui israelcunata pushac yuyaccunatapish, mandaccunatapish tandachirca. Chai quipami, apostolcunata carcelmanta apamuchun cacharca.

²² Soldadocuna carcelman chayashpaca, paicunata mana tarircachu. Chaimanta huillangapac cutimushpaca:

²³ «Ñucanchic chayashpaca, cárcel pungucuna alli huichcashcata, shinallatac soldadocunapish pungucunapi cuidacushcatami ricurcanchic. Cárcel punguta pascashpa yaicushpaca, pita mana tarircanchicchu» nirca.

²⁴ Chashna huillashcata uyashpaca, curacunata jatun mandac curapish, Diosta mañana huasita cuidaccunata mandacpish, curacunata mandac curacunapish caishuc chaishuc parlanacushpaca: “Chai runacunaca, ¿imashi tucushca canga?” nishpami tapunacurca.

²⁵ Paicuna chashna tapunacucucpica, cungailla shuc runa chayamushpaca: «Cancuna carcelpi huichcashca runacunaca, Diosta mañana huasipimi tucui gentecunaman yachachicun» nishpa huillarca.

²⁶ Chaimantami soldadocunata mandacca soldadocunahuan cutin apostolcunata japingapac rircacuna. Chashna rishpaca, chaipi cac gentecuna rumihuan shitanata manchashpami, mana imata ruhuashpa, sumacta apamurcacuna.

²⁷ Paicunata apamushpaca, tandanacushca mandaccunapac ñaupamanmi chayachirca. Chaipi, curacunata mandac cura paicunata tapushpaca:

²⁸ —¿Manachu ñucanchicca chai runamanta ama cutin yachachun mandarcanchic? Chashna nishca jahuami tucui Jerusalenpi yachachishcanguichic. Jesús huañushcamantapish ñucanchictami juchanchinguichic— nirca.

²⁹ Shina nicpi, Pedropish, caishuc apostolcunapish rimashpaca: —Runacunata cazunapac randica, Diostami cazuna canchic.

³⁰ Cancunami Jesustaca chacatashpa huañuchircanguichic. Shina huañuchicpipish, ñucanchic ñaupa taitacunapac Mandac Diosmi paitaca causachirca.

³¹ Chashnami Diosca paitaca tucuita Mandac cachunpish, Quishpichic cachunpish, paipac alli maquiman tiyachirca. Israelcuna juchayuc cashcamanta llaquirishpa, Diosman cutiricpi, juchacunata perdonangapacmi chashnaca ruhuarca.

³² Ñucanchicca cai tucui uyashcatapish, ricushcatapish huillaccunami canchic. Diospac Espiritupish cai tucuita huillacunmi. Diosca paita cazuccunamanmi paipac Espiritutaca cushca— nirca.

³³ Shina nicta uyashpami, chai mandaccunaca piñarishpa, huañuchinata munarcacuna.

³⁴ Ashtahuanpish tandanacushca mandaccunapuramanta fariseo Gamalielca apostolcunata canzhaman llucchichun mandarca. Gamalielca tucuipac alli nishcami carca. Shinallatac Moisés mandashcacunata alli yachachicmi carca.

³⁵ Ña llucshicpica, mandaccunataca: —Israel runacuna, cai runacunata imata ruhuagricushcataca alli yuyarichic.

³⁶ Sarun punzhacunapi ima tucushcataca, alli yuyarichic. Teudas runaca: ‘Mandacmi cani’ nishpami, chuscu patsac shina caticcunata charirca. Shina cacpipish, paita huañuchicpica, tucui paita caticcunaca caita chaita rishpami chingarirca. Pai yachachishcapish tucuimi chingarirca.

³⁷ Shinallatac shuticunata quillcachina punzhacunapipish, Galilea llactamanta Judasmi yachachi callarirca. Paitapish taucacunami catircacuna. Shina cacpipish, paita huañuchicpica, tucuimi caita chaita rishpa chingarirca.

³⁸ Chaimantami cai yuyaita cuni: Cai runacunataca ama imata ruhuashpa saquichiclla. Paicuna yachachishcapish, imata ruhuacushcapish paicunapac yuyailla cacpica, chingaringallami.

³⁹ Ashtahuanpish paicuna yachachishca Diosmanta cacpica, mana jarcai pudinguichicchu. Pacta Diospac munaita jarcashun nicunguichicman— nirca.

⁴⁰ Gamaliel chashna nishcata uyashpami, apostolcunataca cutin yaicuchishpa azotichirca. Chashna azotichishpami ama cutin Jesusmanta huillachun mandashpa cacharca.

⁴¹ Mandaccuna cacharicpi, apostolcuna llucshishpaca, Jesusta caticushcamanta Dios llaquichichun saquishcamantami yallita cushicushpa rircacuna.

⁴² Shinallatac paicunaca Diosta mañana huasipipish, mai huasicunapipish punzhantami yachachishpa, Jesucristomanta alli huillaita huillacurca.