HECHOS 4 - Dios Rimashcata Quillcashcami

Mandaccunapacman Pedrotapish, Juantapish apashcamanta

¹ Pedropish, Juanpish gentecunahuan parlacucpiracmi, Israel curacunapish, Diosta mañana huasita cuidaccunata mandacpish, saduceocunapish cungailla chayarca.

² Paicunaca Pedropish, Juanpish “Jesús huañushcacunapuramanta causarishpa, tucui huañushcacuna causarina cashcatami ricuchin” nishpa, yachachicushcamantami piñarirca.

³ Chaimantami paicunata japishpa, cayandi tutamantacaman carcelpi churarca. Ña chishi cashcamantami chashna ruhuarca.

⁴ Chashna cacpipish, paicuna huillashcata uyashpa criccunaca, pichca huaranga shina runacunami carca.

⁵ Cayandi punzhaca Jerusalenpimi israelcunata mandaccunapish, pushac yuyaccunapish, mandashcacunata yachachiccunapish tandanacurca.

⁶ Chaipimi curacunata mandac cura Anaspish, Caifaspish, Juanpish, Alejandropish, curacunata mandac curapac familiacunapish carca.

⁷ Pedrotapish, Juantapish paicuna tandanacushca ñaupaman cayachishpaca: —Cancunaca, ¿ima poderhuantac suchu runata alliyachircanguichic?— nirca.

⁸ Chaimantami Pedroca Diospac Espirituhuan cashpa: —Israelcunata mandaccunalla, pushac yuyaccunalla,

⁹ cunan cancunaca shuc ungushcata alliyachishpa, allita ruhuashcamantami “¿ima shinatac alliyachircanguichic?” nishpa tapunguichic.

¹⁰ Cancunapish, tucui israelcunapish caitami yachana canguichic. Chaica, cancuna chacatashpa huañuchishca, quipata Dios huañushcacunapuramanta causachishca, Nazaret pueblomanta Jesucristomi cai runataca alliyachishca. Chai alliyashca runami cancunapac ñaupapi shayacun.

¹¹ Huasita ruhuaccuna mana nishca rumimi huasita ruhuangapac callaripi churana, tucuimanta yalli alli rumica tucushca.

¹² Cai pachapi causaccunata quishpichichunca, Jesusllatami Diosca cacharca. Ñucanchicta quishpichicca, pi shuctac mana tiyanchu— nirca.

¹³ Pedropish, Juanpish yachacungapacllapish mana rishca yangalla runacunami carca. Chashna cashpapish mana manchashpami, allita rimarca. Chaimantami chai mandaccunaca mancharishpa saquirirca. Chaimantami paicunaca Jesus-huan puriccuna cashcata yachac chayarcacuna.

¹⁴ Chai alliyashca runapish paicunahuan shayacucta ricushpami, paicunataca imata mana juchanchishpa, upalla saquircacuna.

¹⁵ Chaimanta paicunata canzhaman cachashpa, tandanacushca mandaccunapura

¹⁶ parlanacushpaca: —Cai runacunataca, ¿imatatac ruhuanchic? Paicuna mancharina milagrocunata ruhuashcataca, Jerusalenpi causaccunapish tucuimi alli yachancuna. Chaitaca mana negai pudinchicchu.

¹⁷ Chashna cacpipish, caicuna ama shuctac llactacunapi yacharichunca: “Cunanmanta pacha pacta piman chai Jesusmanta huillanguichicman” nishpa manchachishun— ninacurca.

¹⁸ Chai quipa, paicunata cayashpaca: —Chai Jesusmanta ama rimanguichicchu, ama yachachinguichicchu— nirca.

¹⁹ Shina nicpi, Juanpish, Pedropish rimashpaca: —Cancunallatac alli yuyarichic. Diosmanca, ¿paita cazunata saquishpa, cancunata cazunachu ashtahuan alli canga?

²⁰ ¡Ñucanchicca, ñucanchic ricushcata, uyashcata huillanataca manatac saquishunchu!— nirca.

²¹ Pedropish, Juanpish chai runata alliyachishcamantaca tucui gentecunami Diosta “allimari cangui” nircacuna. Chaimantami mana juchanchipac cacpi, cacharircalla.

²² Chai alliyashca runaca, chuscu chunga huata yallitami charirca.

Criccuna Diosta mañashcamanta

²³ Mandaccuna paicunata ña cacharicpica, Pedroca Juanhuanmi caishuc criccunapacman rishpa, curacunata mandac curacunapish, pushac yuyaccunapish ima nishcata tucui parlarca.

²⁴ Chashna parlacpi, tucui criccuna shuc yuyailla Diosta mañashpaca: «Mandac Dioslla, canmi jahua pachatapish, cai pachatapish, mama cuchatapish, chaicunapi tucui ima tiyactapish ruhuarcangui.

²⁵ Canmi, canta servic Davidman yuyaita cushpaca: “Mana israelcunaca, ¿ima nishpatac chashna piñarin? ¿Ima nishpatac yangallata ruhuashun nincuna?

²⁶ Cai pachapi jatun mandaccunapish, llactata mandaccunapish Mandac Diosta piñashpa, pai cachashca Quishpichic Cristota piñashpa macashun nishpami tandanacun” nishcami.

²⁷ Chashna nishca shinami, cai pueblota mandac Herodesca Poncio Pilatohuanpish, israelcunahuanpish, mana israelcunahuanpish jucha illac Jesusta llaquichingapac tandanacurca. Diosmi Jesustaca Cristo cachun cacharca.

²⁸ Chashnami can ñaupaman alli yachashpa, chashna tucuchun nishcata pactachirca.

²⁹ Cunanca Mandac Dioslla, paicuna manchachishpa, jarcashcata ricuiyari. Can mandashcacunata mana manchashpa, huillangapac sinchiyachiyari.

³⁰ Can quishpichichun cachashca Jesus-huan ungushcacunata alliyachichun, milagrocunata ruhuachun ñucanchicta ayudaiyari. Canca imatapish ruhuacllami cangui» nishpa mañarcacuna.

³¹ Chashna mañashca quipaca, paicuna tandanacushpa tiyacuc huasica chucchurcami. Diospac Espíritu paicunapi junda cacpimi, mana manchashpa, Diosmanta huillarcacuna.

Tucui ima charishcacunapish tucuipac cashcamanta

³² Criccunaca achca cashpapish, tucuimi shuc shungulla, shuc yuyailla carcacuna. Pi “caica ñucapacmi, chaica cambacmi” mana ninacucchu carca. Chaimantami ima charishcacunapish tucuipac carca.

³³ Apostolcunaca mana manchashpami, Apunchic Jesús causarishcata shungupi yaicucta huillarca. Diosca criccunata yallita cuyashpami, allicunata tucuiman yallita curca.

³⁴ Chashna cacpimi, paicunapurapica maijanpish ima illaclla mana causarca. Maijanpish chariccunaca allpacunatapish, huasicunatapish catushpami,

³⁵ cullquitaca apostolcunaman cuc carca. Chaitaca mana chariccunamanmi imalla illashcata randichun cuc carca.

³⁶ Chipre llactamanta curacunata ayudac levita Josepish, criccunahuanmi carca. Paitami apostolcunaca Bernabeta shutichirca. Bernabé nishpaca: “Cushichic runa” nisha ninmi.

³⁷ Chai runaca pai charishca allpata catushpami, chai cullquitaca apostolcunaman curca.