HECHOS 28 - Dios Rimashcata Quillcashcami

Pablo Malta shuti islapipi cashcamanta

¹ Chashna tucuilla alli llucshishpaca, Malta shuti islapi cashcatami yachac chayarcanchic.

² Chai llactapi causaccunapish ñucanchictaca llaquishpa allimi tuparca. Tamyapi chirihuan cacpimi, ninata japichishpa masharichun tucui ñucanchicta pusharca.

³ Pablo chaquishca yantata tandashpa ninapi churacucpimi, huañuchic culebra ninamanta llucshishcahuan maquipi huarcurirca.

⁴ Chaipi paihuan cac gentecuna maquipi huarcuracucta ricushpaca: “Cai runaca huañuchic runami yuyachin. Chaimantami ñucanchic cashcata ruhuac diosca yacumanta quishpirimucpipish, mana causachun saquin” ninacurca.

⁵ Pabloca chai culebrataca maquimanta chaspishpa, ninapimi shitarca. Pabloca mana ima tucurcachu.

⁶ Chaipi caccunaca: “Ñallami punguinga, mana cashpaca ñallami huañunga” nishpami chaparacurca. Ña unaita mana ima tucucpica paicunaca: “¡Cai runaca diosmi yuyachin!” ninacurcami.

⁷ Chai allpaca, chai llactata mandac Publiopacmi cashca carca. Paimi ñucanchicta huasipi sumacta chasquishpa, quimsa punzhata pozachirca.

⁸ Publiopac taitaca calentura ungüihuanpish, purichic ungüihuanpishmi camapi cashca carca. Paita Pablo ricungapac rishpaca, maquita ungushcapac jahuapi churashpa, Diosta mañashpami alliyachirca.

⁹ Chaita ricushpami, chai llactapi causac caishuc ungushcacunapish shamushpa alliyarca.

¹⁰ Paicunapish ñucanchicta sumacta chasquirca. Ñucanchic rigricpica, imalla illashcata cushpami cacharcacuna.

Pablo Roma puebloman chayashcamanta

¹¹ Chai islapi quimsa quillata cashpami, Alejandría pueblomanta shamushpa, tamya quillacunata chaipi cashca barcopi rircanchic. Chai barco ñaupa ladopica Cástor, Pólux shuti dioscuna dibujashcami carca.

¹² Chashnami Siracusa puebloman chayashpa, chaipi quimsa punzhata carcanchic.

¹³ Chaimantaca chai llacta cuchu cuchuta rishpami, Regio puebloman chayarcanchic. Chai cayandi punzhaca huichai huaira tiyacpimi, ishcai punzhapica Puteoli puebloman chayarcanchic.

¹⁴ Chai pueblopi tauca criccuna tupashpa, shuc semana paicunahuan saquirichun nicpimi saquirircanchic. Chai quipami Roma puebloman rircanchic.

¹⁵ Chai pueblo criccuna ñucanchic shamucucta yachashpami, Apio pueblo plazapipish, Quimsa Chuclla pueblopipish tupangapac shamushca carca. Paicunata Pablo ricushpaca, Diosta pagui nishpa, cushicushpami sinchiyarca.

¹⁶ Ña Romaman chayashpaca, patsac soldadocunata mandacca Pablotaca cuidac soldadohuanmi shuc huasipi chican churarca.

Roma pueblopi Pablo huillashcamanta

¹⁷ Quimsa punzhata chaipi cashpami, Pabloca israelcunata mandaccunata cayac cacharca. Paicuna ña tandanacumucpica: —Huauquicuna, ñucaca israelcunapish, ñucanchic ñaupa taitacuna yachachishcatapish ima mana allita mana ruhuashcanichu. Shina cacpipish, Jerusalenpi ñucata prezu japishpami, Roma llactata mandaccunaman curcacuna.

¹⁸ Chai mandaccuna ñucata alli tapushpa, imamanta juchanchishpa, mana huañuchina cashcata tarishpaca, cacharinatami munarca.

¹⁹ Shina cacpipish, israelcuna piñaricpimi, ñucaca: “Roma llactata jatun mandac Cesarmi juchanchinga” nircani. Chashna nishpaca, mana paicunata juchanchingaraicuchu nircani.

²⁰ Israelcuna shuyacushcallatatac crishpa shuyacushcamantami, ñucaca caipi cadenahuan huatashca cani. Chashna parlangapacllami, cancunataca cayarcani— nirca.

²¹ Chaimantami paicunaca: —Ñucanchicca Judea llactamantaca ima quillcata mana japishcanchicchu. Pipish canta mana alli nishpa mana huillac shamushcachu. Canta mana alli nishpapish mana rimashcachu.

²² Ñucanchicca can imata yuyacushcatallami yachashun ninchic. Chaica, can caticushca yachanata maipipish piñashpa rimacllatami uyanchic.

²³ Chashna nishpami, shuc punzha Pablo ima nishcata uyangapac yuyarinacurca. Chai punzhapimi pai causacuc huasiman achca gentecuna Pablo yachachishcata uyangapac, tandanacumurca. Pabloca Jesusta crichunmi, Dios mandacucmantapish, Moisés mandashcacunamantapish, Dios ima nishcata huillashcamantapish tutamantamanta chishicaman yachachirca.

²⁴ Chashna huillacpica, maijancunaca crircami. Maijancunaca mana crircachu.

²⁵ Chaimanta paicunapura mana shuc yuyailla tucushpa, rigricpimi Pabloca: —Allimi Dios ima nishcata huillac Isaiasca, Diospac Espíritu yuyachicpica huillarca. Paica:

²⁶ “Chai gentecunaman huillangapac ri. Paicunataca: Cancunaca mashnata uyacushpapish, mana entendinguichicchu, mashnata ricushpapish, mana ricushca shinami canguichic.

²⁷ Cai gentecunapac shunguca, rumi shina sinchimi. Paicunapac ringrica tapashca shinami. Ñahuipish huichcashca shinami. Uyashpapish, mana uyashca shina, ricushpapish, mana ricushca shinami. Paicunapac shunguca ima alli yuyaita mana japinchu. Paicuna ñucapacman cutimucpica, ñucaca alliyachimanmi” nircami.

²⁸ Caitaca alli yachaichic: Mana israelcunamanmi Diosca quishpirinamanta huillachun cachashca. Paicunami uyangacuna— nirca.

²⁹ Chashna nicta uyashpami, israelcunaca paicunapura rimarinacushpa rircacuna.

³⁰ Pabloca ishcai huatatami pai arrendashca huasipi causarca. Tucui shamuccunatami sumacta chasquishpa,

³¹ Dios mandacucmanta huillashpa, Apunchic Jesucristomantapish yachachic carca. Pi mana jarcashcami, pai tucui huillasha nishcata huillac carca.