HECHOS 25 - Dios Rimashcata Quillcashcami

Mandac Festopac ñaupapi Pablo rimashcamanta

¹ Mandac Festoca Cesarea llactata quimsa punzhata mandacushpami, Jerusalenman rirca.

² Chaipimi curacunata mandac curacunapish, israelcunapish Festopacman shamushpa, Pablota juchanchirca.

³ Chashna juchanchishpami, Pablota Jerusalenman apamuchun mañarca. Jerusalenman Pablo shamucucpica, ñanpi chapashpa huañuchinatami paicunaca yuyarinacushca carca.

⁴ Chashna mañacpimi Festoca: —Pablotaca Cesarea pueblollapitacmi prezu tiyacun. Ñucapish ñallami chaiman rigrini.

⁵ Imata juchanchina tiyacpica, mandaccuna ñucahuan Chaiman jacuchic. Chai runa ima mana allita ruhuashca cacpica, chaipi juchanchinguichic— nirca.

⁶ Festoca pusac punzha yallita Jerusalenpi cashpami, Cesareaman cutirca. Cayandi punzha, pai mandashpa tiyarinapi tiyarishpami, Pablota cayac cacharca.

⁷ Pablo chayamucpica, Jerusalenmanta shamushca israelcunami muyunacushpa, Pablota manapish cashcacunata nishpa juchanchircacuna. Chashna juchanchishpapish Pablo ima mana allita ruhuashcataca mana ricuchi pudircachu.

⁸ Chaimanta Pablo rimashpaca: —Moisés mandashcacunatapish, Diosta mañana huasitapish, Roma llactata jatun mandac Cesartapish yangapi churashpa, mana llaquichishcanichu— nirca.

⁹ Festoca israelcunahuan alli ricurisha nishpami, Pablotaca: —¿Jerusalenman rishpa, caicunamanta ñucapac ñaupapi juchanchishca casha ninguichu?— nirca.

¹⁰ Shina nicpimi Pabloca: —Roma llactata jatun mandac César taripanaca caipimi. Caipimi juchanchishca cana cani. Ñucaca israelcunata ima mana allita mana ruhuashcanichu. Chaitaca canllatac yachanguimi.

¹¹ Huañuchishca canapac shina, ñuca ima millaita ruhuashca cacpica, huañuchichunlla. Paicuna juchanchicushca mana cierto cacpica, ñucataca pi mana paicunaman cungallachu. Ñucataca Cesarllatac taripachun— nirca.

¹² Chaimantami Festoca paita cunaccunahuan parlanacushpa Pablotaca: —Canca: “Cesarllatac tapuchun” nishcanguimi. Chaimanta paipacmanmi rina cangui— nirca.

Pablo jatun mandac Agripapac ñaupapi rimashcamanta

¹³ Asha punzhacuna quipami, jatun mandac Agripaca paipac pani Berenicehuan Cesarea pueblopi mandac Festota saludangapac shamurca.

¹⁴ Paicuna tauca punzhacunata chaipi cacpi, Festo Pablomanta parlashpaca: —Caipica, mandac Félix saquishca shuc prezumi tiyacun.

¹⁵ Jerusalenpi ñuca cacpimi, curacunata mandac curacunapish, pushac yuyaccunapish chai runata juchanchishpa huañuchichun mañarcacuna.

¹⁶ Shina nicpimi ñucaca: “Roma llacta mandashcacunapi nishca shinaca, juchanchiccunapac ñaupaman manarac apamushpa, pai rimashcata manarac uyashpaca, pitapish mana huañuchinachu canchic” nircani.

¹⁷ Chaimantami paicuna caiman shamucpica, mana unaiyashpa, cayandi punzha mandashpa tiyarinapi tiyarishpa, chai runataca apamuchun cacharcani.

¹⁸ Juchanchiccuna tandanacushpaca ñuca yuyashca shina, ima mana allita mana nircacunachu.

¹⁹ Ashtahuanpish crinamanta Pablo: “Jesusca huañushpapish causacunmi” nishpa huillashcamantami juchanchircacuna.

²⁰ Chaimantami ima shina mana juchanchipac cacpi, ñucaca Pablotaca: “¿Jerusalenman rishpa, chaipi caicunamanta juchanchishca casha ninguichu?” nishpa tapurcani.

²¹ Chashna tapucpi, paillatac: “Roma llactata jatun mandac Augustopac ñaupapi juchanchingacaman, caillapitacmi casha nini” nirca. Chaimantami jatun mandac Augustopacman apangacaman soldadocuna cuidachun nircani— nirca.

²² Chaimantami Agripaca Festotaca: —Ñucapish chai runa ima nishcata uyasha ninimi— nirca. Shina nicpimi Festoca: —Cayallatami pai ima nishcataca uyangui— nirca.

²³ Quipa punzhami Agripapish, paipac pani Berenicepish sumac churanacunata churarishpa, soldadocunata mandaccunahuan, chai pueblopi mandaccunahuan, Festo mandana ucuman shamurca. Paicuna chayamucpimi, Festoca Pablota apamuchun cacharca.

²⁴ Pablo chayamucpica Festoca: —Jatun mandac Agripalla, tucui caipi ñucanchic-huan caccunalla, chai runaca caipimi. Paitami Jerusalén pueblopipish, cai Cesarea pueblopipish tucui israelcunaca juchanchishpa, huañuchichun caparicunlla.

²⁵ Ñuca yuyaipica paica ima huañuchina juchata mana ruhuashcachu. Paillatac: “Roma llactata jatun mandac Augustopacman cachai” nicpimi, paipacman cachanata yuyarcani.

²⁶ Ñucaca cai runamantaca imata mana jatun mandac Augustoman quillcai pudinichu. Chaimantami jatun mandac Agripalla, can imatapish tapushcata quillcashpa cachangapac cambac ñaupaman, tucui caipi caccunapac ñaupaman paitaca apamuni.

²⁷ Shuc prezuta imamanta juchanchishcata mana huillashpa cachanaca, ñucamanca mana allichu— nirca.