HECHOS 24 - Dios Rimashcata Quillcashcami

Pablo mandac Felixhuan rimashcamanta

¹ Pichca punzha quipami, Ananías curaca pushac yuyaccunahuan, yachac Tertulohuan Pablota mandac Felixpac ñaupapi juchanchingapac rirca.

² Pablota apamucpi, yachac Tértulo Pablota juchanchishpa, mandac Felixtaca: —Jatun Felixlla, can allita mandacucpimi, cushilla causanchic. Canca yachac cashpami, ñucanchictaca alli mandacungui.

³ Chaimantami maipipish, ima horaspish pagui nicunchiclla.

⁴ Chaica mana ashtahuan piñachisha ninichu. Cai nishcallata uyashpa cui.

⁵ Cai runaca millai ungüi shinami, tucuipi israelcunataca pandata yachachishpa, bullapi churashpa purin. Paica Nazaret pueblomanta Jesús yachachishcata caticcunata pushacmi.

⁶ Diosta mañana huasita yangapi churagricucpimi, paita japishpa, ñucanchicta mandashcacunapi nishca shina juchanchishun nircanchic.

⁷ Chashna cacpipish, soldadocunata mandac Lisiasmi piñarishpa, ñucanchic maquimanta quichurca.

⁸ Chashnami, paita juchanchiccunataca can mandac Felixpac ñaupapi tapuchun nirca. Cunanca canllatac ñucanchic imamanta juchanchicushcataca tapuilla— nirca.

⁹ Chaipi cac israelcunapish: —Ari, chashnatacmi— nircami.

¹⁰ Chaimanta mandac Pablota maquihuan señata ruhuacpimi Pabloca: —Canca tauca huatacunatami cai llactata alli mandac cangui. Chaimantami mana manchashpa, rimasha nini.

¹¹ Jerusalenpi Diosta mañangapac ñuca rishcaca, chunga ishcai punzhacunallami tucun. Chaitaca caipi caccunamanpish tapuilla.

¹² Caipi juchanchiccunaca Diosta mañana huasipipish, tandanacuna huasicunapipish, mai pueblocunapipish ñuca pihuan rimanacucta, bullapi churacucta mana japishcachu.

¹³ Shinallatac pi mana “chaica chashnatacmi” ningachu.

¹⁴ Caillatami canman huillagrini: Ñucaca Jesusta catic, ñaupa taitacuna shinallatac Diosta mañacmi cani. Moisés mandashcacunapi quillcachishcatapish, Dios ima nishcata huillaccuna quillcachishcatapish tucuitami crini. Chaitami paicunaca: “Mana allita caticcunapurami” nincuna.

¹⁵ Paicuna shinallatacmi ñucapish Dios cashcata ruhuaccunatapish, mana allita ruhuaccunatapish, huañushcapuramanta causachina cashcata shuyacuni.

¹⁶ Chaimantami ñucaca Diospac ñaupapipish, gentecunapac ñaupapipish mana juchanchishca alli causanata munani.

¹⁷ Unai huatacuna quipami, ñuca llactapi causac huacchacunaman cullquita cungapac, ofrendata cungapac Jerusalenman rircani.

¹⁸ Diospac ñaupapi alli ricuringapac armarishca quipami, Asia llacta maijan israelcuna Diosta mañana huasi ucupi ricurirca. Chaipica mana tauca gentecunahuanchu carcani, mana pita bullapi churacurcanichu.

¹⁹ Chai runacunami ñucata imata juchanchina cacpica, cambacman shamunman carca.

²⁰ Mana cashpaca, caipi caccunallatac tandanacushca mandaccunapacman ñucata apashpa, ima mana allita tarishcata huillachun.

²¹ Paicunapac ñaupapi: “Huañushcacuna causarinata crishcallamantami, cunan juchanchicunguichic” nishpa, caparishcamantami juchanchicun— nirca.

²² Mandac Felixca Jesusta criccunamanta allimi yacharca. Chaimantami chashna nicta uyashpaca: —Huaranga soldadocunata mandac Lisias shamucpimi, caimanta ashtahuan yachashpa, imatapish nisha— nishpami saquirca.

²³ Chaimantami Felixca pasac soldadocunata mandactaca: —Pablotaca cuidangui. Maijan paita ricungapac shamuccunatapish, paita ayudaccunatapish ama jarcanguichu— nishpa mandarca.

²⁴ Asha punzhacuna quipami, Felixca Israelmanta paipac huarmi Drusilahuan shamushpa, Pablota cayashpa, Jesucristota ima shina crinamanta tapurca.

²⁵ Pabloca Dios munashca shina causanamanta, mana alli munaita jarcarinamanta, Dios taripanamanta huillacpimi, Felixca mancharishpa Pablotaca: —Cunanca rilla. Cutin uyasha nishpaca, cayachishallami— nirca.

²⁶ Mandac Felixca: “Cacharichun cullquita cungami” yuyashpami, tauca cutin Pablohuan parlanacungapac cayachic carca.

²⁷ Ña ishcai huata tucucpica, Felixca pai mandacushcamanta llucshircami. Chaimantami Porcio Festoca mandac tucurca. Felixca israelcunahuan alli ricurisha nishpami, Pablotaca prezullatac saquirca.