HECHOS 23 - Dios Rimashcata Quillcashcami

¹ Chai tandanacushca mandaccunata ricushpami Pabloca: —Huauquicuna, ñucaca cunan punzhacamanmi, Diospac ñaupapica alli shunguhuan causacuni— nirca.

² Chashna nicpimi, curacunata mandac cura Ananiasca Pablopac ladopi shayacuccunataca shimipi huactachun mandarca.

³ Shina nicpimi Pabloca: —¡Mishqui shimi, jayac shungu, cantaca Diosmi llaquichinga! Canca Moisés mandashcacunapi nishca shina, allita ruhuangapacmi cangui. ¿Chashna cashpachu mandashcata mana pactachishpa, ñucata huactachun ningui?— nirca.

⁴ Pablo chashna nicpica, chaipi caccunaca: —¿Chashnachu Dios acllashca jatun mandac curataca camishpa rimangui?— nirca.

⁵ Chashna nicpimi Pabloca: —Huauquicuna, ñucaca pai mandac cura cashcataca mana yachashcanichu. Dios quillcachishcapica: “Llactata mandactaca ama ima millaita rimanguichu” ninmi— nirca.

⁶ Pablo, chaipi caccuna maijancunaca saduceocuna, maijancunaca fariseocuna cashcata ricushpami, tucui chaipi caccunapac ñaupapi sinchita rimashpaca: —Huauquicuna, ñucaca fariseo runami cani. Ñuca taitapish fariseomi. Dios huañushcacunata causachinata crishpa shuyacushcamantami, ñucata caipi juchanchicunguichic— nirca.

⁷ Chashna nicta uyashpami fariseocunaca saduceocunahuan rimarinacui callarirca. Chashnami chai tandanacuica chaupirinacurca.

⁸ Saduceocunaca huañushcacuna causarinatapish, angelcuna tiyashcatapish, espiritucuna tiyashcatapish mana crincunachu. Cutin fariseocunaca chai tucui tiyashcatami crincuna.

⁹ Chashna sinchita caparinacucpimi, fariseopuramanta mandashcacunata yachachic shuc runa jatarishpaca: —Cai runapica ima mana allita mana tarinchicchu, ashtahuanpish espíritu, mana cashpaca angelmi, paihuan rimashca canga— nirca.

¹⁰ Tucui gentecuna yallita bullai callaricpimi, huaranga soldadocunata mandacca Pablota llaquichinata manchashpa, soldadocunata cayac cacharca. Paicunami Pablotaca cuartelman aparca.

¹¹ Chai quipa tuta Apunchic Jesús ricurishpaca: «Pablo, ama manchaichu. Ima shinami cai Jerusalenpi ñucamanta huillacungui, chashnallatacmi Roma pueblopipish huillana cangui» nirca.

Pablota huañuchingapac yuyarinacushcamanta

¹² Cayandi tutamanta maijan israelcunaca Pablota huañuchingacaman manatac micungapac, manatac ubiangapacmi ari ninacurca. Mana chaita pactachicpica, Dios llaquichichunmi ari ninacurca.

¹³ Chashna ruhuangapac ari niccunaca, chuscu chunga yalli runacunami carca.

¹⁴ Paicuna Israel curacunata mandac curacunapacman, pushac yuyaccunapacman rishpaca: —Ñucanchicca Pablota huañuchingacaman, imata mana micungapacmi ari ninacurcanchic. Mana chaita pactachicpica, Dios ñucanchicta llaquichichunmi yuyarinacurcanchic.

¹⁵ Cunanca, cancunaca caishuc mandaccunahuan huaranga soldadocunata mandacman Pablota ashtahuan alli tapungapac nic tucushpalla caiman apamuchun mañaichic. Ñucanchicca pai manarac chayamucpimi, huañuchingapac ñanpi chapashun— nirca.

¹⁶ Ashtahuanpish chaita Pablopac panipac cari huahua uyashpami, cuartelman rishpa, Pabloman huillarca.

¹⁷ Chaimanta Pablo pasac soldadocunata mandaccunamanta shuctac cayashpaca: —Cai huambrata huaranga soldadocunata mandacpacman pushashpa cui. Paimi imatachari huillac shamushca— nirca.

¹⁸ Chai soldado huaranga soldadocunata mandacpacman chai huambrata pushashpaca: —Prezu tiyacuc Pablomi cai huambrata cambacman pushachun mañarca. Canmanmi imatachari huillac shamushca— nirca.

¹⁹ Chai mandac huambrata maquimanta apashpa, paillata tapushpaca: —¿Imatatac huillasha ningui?— nirca.

²⁰ Shina nicpimi, chai huambraca: —Israelcunami caya Pablota ashtahuan alli tapushun nic tucushpalla, mandaccunapacman apamuchun mañagricun.

²¹ Chaitaca ama cringuichu. Chuscu chunga yalli runacunami pacalla chapagricuncuna. Paicunaca Pablota huañuchingacaman, imata mana micungapac, imata mana ubiangapacmi ari nishca. Mana chaita pactachicpica, Dios llaquichichun nishcacunami. Cunanca can imata nicllatami shuyacun— nirca.

²² Chashna huillacpimi, chai mandacca: “Caipi ñucaman huillashcataca, pacta piman huillanguiman” nishpami, mandashpa cacharca.

Mandac Felixpacman Pablota cachashcamanta

²³ Huaranga soldadocunata mandac pasac soldadocunata mandac ishcaita cayashpaca, unai tutata Cesarea puebloman richun, chaquillahuan ric ishcai pasac soldadocunata, caballopi ric canchis chunga soldadocunata, lanzahuan ric ishcai pasac soldadocunata tandachichun mandarca.

²⁴ Shinallatac Pablota sillashca caballopi montachishpa sumacta mandac Felixpacman apachunmi mandarca.

²⁵ Shuc quillcata quillcashpaca:

²⁶ «Ñuca Claudio Lisiasmi, can tucuipac alli nishca mandac Felixta saludani.

²⁷ Cai ñuca cachashca runataca, israelcuna japishpa huañuchigricucpimi, pai Roma llacta runa cashcata yachashpa, ñuca soldadocunahuan rishpa misarcani.

²⁸ Imamanta paita juchanchicushcata yachangapacca, tandanacushca mandaccunapacmanmi aparcani.

²⁹ Paicunapac ñaupaman apashpa paita tapucpica, israelcunapac mandashcata mana cazushcallamanta juchanchicushcatami yachac chayarcani. Ñuca yuyaipica, paitaca imamanta mana huañuchinachu, carcelpipish mana churanachu can.

³⁰ Shina cacpipish, israelcuna cai runata huañuchishun nishcata yachashpami, cambacman cachani. Paita huañuchishun niccunatapish cachanimi. Paicuna imamanta juchanchicushcatapish tapunguilla. Chaillatami mañani. Caya minchacaman» nirca.

³¹ Chai soldadocunaca mandashca shinami, chai tutallatac Pablotaca Antípatris puebloman aparca.

³² Cayandi punzhaca chaquillahuan ric soldadocunaca, caballopi ric soldadocunahuan Pablota saquishpa, cuartelman cutircami.

³³ Pablohuan ric soldadocuna Cesarea puebloman chayashpaca, quillcata mandac Felixman cushpami, Pablotapish paipac ñaupaman chayachirca.

³⁴ Chai mandac quillcata ricushpami, maimanta cashcata Pabloman tapurca. Pablo Cilicia llactamanta

³⁵ cashcata yachashpaca: “Canta juchanchiccuna shamucpimi, can ima nishcataca uyasha” nirca. Chaimantami soldadocunata alli cuidachun, Herodes causana jatun huasipi churachirca.