HECHOS 22 - Dios Rimashcata Quillcashcami

¹ «Israel huauquicuna, taitacuna, ñuca rimashcata uyaichic» nirca.

² Hebreo rimaipi rimacpirin, ashtahuanmi upalla carcacuna. Chaimantami Pabloca:

³ «Ñucaca Cilicia llacta Tarso pueblopi huacharishca, Israel runami cani. Shina cashpapish, cai Jerusalén pueblopimi huiñarcani. Ñucataca Gamalielmi allita yachachirca. Ñaupa taitacunaman mandashcacunata tucuita pactachicmi cani. Ima shinami cunan punzhacunapi cancuna tucui shunguhuan Diosta servicunguichic, chashnatacmi ñucapish servini.

⁴ Ñucapish ñaupaca Jesusta caticcunata huañuchisha nishpami, huarmicunatapish, caricunatapish japishpa, carcelman apac carcani.

⁵ Chaitaca, curacunata jatun mandac curapish, pushac yuyaccunapish yachanmi. Paicunallatacmi Damasco pueblo criccunata japishpa, cai Jerusalenpi llaquichingapac apamuchun, quillcata curcacuna. Chaimantami criccunata japimungapac chai puebloman rircani.

Ima shina cric tucushcata Pablo huillashcamanta

⁶ Chashna rishpa, Damascoman ña chayacucpimi, chaupi punzha shinataca cungailla jahua pachamanta relampa shina ñuca muyundita achicyachirca.

⁷ Chashna tucucpi, pambaman urmashpaca: “Saulo, Saulo, ¿ima nishpatac ñucata piñashpa llaquichicungui?” nictami uyarcani.

⁸ Chashna nicpimi ñucaca: “Amito, ¿pitac cangui?” nircani. Shina nicpica: “Ñucaca can llaquichicuc Nazaret pueblomanta Jesusmi cani” nirca.

⁹ Ñucahuan riccunapish chai achicta ricushpa, yallita mancharircami. Shina ricushpapish, ñucata rimashcataca mana entendircachu.

¹⁰ Chaipimi ñucaca: “Apunchic Jesús, ¿imatatac ruhuasha?” nircani. Shina nicpimi, Apunchic Jesusca: “Jatarishpa, Damasco llactaman ri. Chaipimi can ima ruhuana cashcataca huillanga” nirca.

¹¹ Chai achicyachicta, ricushca quipaca, imata mana ricui pudircanichu. Ñucahuan riccunami maquimanta aisashpa, Damascoman chayachircani.

¹² Chaipica, Moisés mandashcacunata alli cazuc, chaipi causac israelcunapacpish alli nishca Ananiasmi causacushca carca.

¹³ Pai ñucapacman shamushpa, cuchuyashpaca: “Huauqui Saulo, cambac ñahui cutin ricuchun” nirca. Chai rato ñuca ñahui alli tucucpi, paitaca ricurcanillami.

¹⁴ Chaipimi paica: “Ñucanchic ñaupa taitacunata Mandac Diosmi, pai munashcata yachachun, pai cachashca Jucha Illac Cristota ricuchun, pai rimashcatapish uyachunmi, cantaca ñaupaman acllashca.

¹⁵ Canmi Jesusmanta uyashcatapish, ricushcatapish tucui gentecunaman huillangui.

¹⁶ Cunanca mana unayashpa, jatarishpa bautizari. Cambac juchacunata Dios perdonashpa, chuyayachichun, Apunchic Jesusta mañai” nirca.

Mana israelcunapacman Jesús cachashcata Pablo huillashcamanta

¹⁷ Jerusalenman cutishpaca, Diosta mañana huasipi mañacushpami, muscuipi shina Apunchic Jesús ricurirca.

¹⁸ Paica: “Cai Jerusalenmanta utca llucshishi. Can ñucamanta huillashcataca mana uyangacunachu” nirca.

¹⁹ Chashna nicpimi ñucaca: “Apunchic Jesús, ñucaca canta criccunata tandanacuna huasicunapi llaquichishpa, carcelman apacmi carcani. Chaitaca tucuimi yachan.

²⁰ Canmanta huillac Estebanta llaquichishpa, huañuchicucpipish churanacunata cuidashpa: ‘Allitami ruhuacunguichic’ nishpami shayacurcani” nircani.

²¹ Ashtahuanpish Apunchic Jesusca: “Rilla, ñucami cantaca caru llacta mana israelcunapacman cachagrini” nircami» nirca.

Pablota soldadocunata mandac charicushcamanta

²² Pablo chaita ningacamanllami uyarcacuna. Quipata piñarishpaca: “¡Cai runaca mana causanachu can, ashtahuanpish huañunami can!” nishpa caparirca.

²³ Chashnami churanacunata chaspirishpa, allpahuan shitashpa caparircacuna.

²⁴ Chashna ruhuacpimi, soldadocunata mandacca Pablota cuartelman apashpa, imamanta chashna paita piñashpa, caparishcata huillangacaman macachun mandarca.

²⁵ Paita soldadocuna huatagricucpimi, Pabloca mandac soldadotaca: —Roma llacta runataca, manarac imata tapushpaca, ¿macanallachu canga?— nirca.

²⁶ Chaimanta chai huaranga soldadocunata mandacpacman rishpaca: —Chai runaca Roma llactamantami cashca. Cunanca, ¿imatac ruhuagringui?— nirca.

²⁷ Chashna nicpi, chai mandac Pablopacman cuchuyashpaca: —¿Canca Roma llactamantachu cangui?— nirca. Shina nicpimi Pabloca: —Ari— nirca.

²⁸ Shina nicpica, chai mandacca: —Ñucaca achca cullquihuanmi Roma llacta tucurcani— nirca. Chashna nicpimi Pabloca: —Ñucaca Roma llactapimi huacharircani— nirca.

²⁹ Chashna nicpica, chai macashun nic soldadocunaca Pablota saquishpa anchurircallami. Roma llactamanta cashcata yachashpaca, chai mandacpish Pablota huatachishcamanta mancharircami.

Mandaccunapura tandanacushcapacman Pablota apashcamanta

³⁰ Huaranga soldadocunata mandacca israelcuna imamanta Pablota huañuchigricushcata yachanata munashpami, cayandi punzhaca Israel curacunata mandac curacunatapish, tandanacushca mandaccunatapish tandachirca. Chashna tandachishpami, Pablotaca cadenahuan huatashcamanta cacharichishpa, paicunapac ñaupaman aparca.