HECHOS 20 - Dios Rimashcata Quillcashcami

Pablo Macedonia llactamanpish, Grecia llactamanpish rishcamanta

¹ Chai bulla chunlla tucucpimi, Pabloca criccunata cayarca. Paicunata cushichishpa, ucllarishpa, caya minchacaman nishpami, Macedonia llactaman rirca.

² Chai llacta criccunata cunashpa cushichishpami, Grecia llactaman chayarca.

³ Chaipica quimsa quillatami carca. Chai quipaca Siria llactamanmi barcopi rinata yuyacurca. Shina cashpapish, israelcuna paita macangapac chapacushcata yachashpami Macedonia llactaman cutinata yuyarirca.

⁴ Pablotaca Berea pueblomanta Sopaterpish, Tesalónica pueblomanta Aristarcopish, Segundopish, Derbe pueblomanta Gayopish, Timoteopish, Asia llactamanta Tiquicopish, Trofimopishmi Asia llactacaman compañarca.

⁵ Paicunaca Troas pueblopi shuyangapacmi ñauparca.

⁶ Ñucanchicca levadura illac tandata micuna fiesta tucuricpimi, Filipos pueblomantaca barcopi rishpa, pichca punzhapi Troas puebloman chayarcanchic. Chaipimi chai ñaupashpa ric criccunahuan tupashpa, canchis punzhata carcanchic.

Troas pueblopi Pablo huillashcamanta

⁷ Semana callari punzhapica, tucui criccunami Jesús huañushcata yuyarishpa, tandata micungapac tandanacurcanchic. Pabloca cayandi ña rina cashcamantami, chaupi tutacaman yachachicurca.

⁸ Tandanacushca alto ucupica, achca lamparacunami japichishca carca.

⁹ Chaipica Eutico huambrami ventanapi tiyacurca. Pablo unaicaman huillacushcamantami chai huambraca sueñushpa, quimsa alto jahuamanta urmarca. Paita ricungapac ricpica, ñami huañushca cashca carca.

¹⁰ Jahuamanta Pablo uricushpa, chai huambrata ucllarishpaca: —Ama mancharichicchu. Huambraca causacunmi— nircami.

¹¹ Pablo cutin jahuaman huichicushpaca, tandata chaupishpami caishuc criccunahuan micurca. Chai quipapish pacaringacamanmi parlacurca.

¹² Chai huañuc huambrata causacta huasiman pushacta ricushpami, criccunaca yallita cushicurca.

Troas pueblomanta Mileto puebloman rishcamanta

¹³ Pabloca chaquillahuanmi Asón pueblocaman rinata munarca. Chaimantami ñucanchicca chai pueblopi paihuan tupangapac barcopi ñauparcanchic.

¹⁴ Chaipi Pablohuan tupashpaca, barcopimi Mitilene puebloman rircanchic.

¹⁵ Mitilene pueblomanta cayandi barcopi rishpami Quío llacta chimbapura Samos llactaman chayarcanchic. Chaimantaca Trogilio pueblopi samarishpami, cayandica Mileto puebloman chayarcanchic.

¹⁶ Pabloca ima shinapish Jerusalenpi Pentecostés punzhata canatami yuyarishca carca. Chaimantami Pabloca Asia llactapi mana unaiyashpa, Efeso pueblopi mana yaicushpa, barcopi rircalla.

Efeso pueblo criccunaman Pablo huillashcamanta

¹⁷ Pabloca Mileto pueblopi cashpami, Efeso pueblo tandanacushca criccunata pushac yuyaccunata cayac cacharca.

¹⁸ Paicuna chayamucpica, Pabloca: «Asia llactaman chayamushca punzhamanta pacha, ñuca cancunahuan ima shina cashcataca cancunallatac alli yachanguichicmi.

¹⁹ Chaica, mana jatun tucushpami, Apunchic Jesusta servircani. Mana cric israelcuna ñucata llaquichicpipish, llaquita apashpa huacarcanimi.

²⁰ Ñucaca cancunapac allipacmi huillacurcanilla, yachachicurcanilla. Chashnami tucuipac ñaupapipish, huasicunapipish huillacurcani.

²¹ Israelcunamanpish, mana israelcunamanpish Diosman llaquirishpa cutirinamanta, Apunchic Jesucristota crinamantami huillarcani.

²² Cunanca Diospac Espíritu yuyaita cucpimi, Jerusalenman ricuni. Chai pueblopi ima tucunataca mana yachanichu.

²³ Ashtahuanpish Diospac Espiritumi ñucataca: “Mai puebloman rishpapish, llaquitami apangui, carcelpi churashcami cangui” nishcallatami yachani.

²⁴ Huañuna cacpipish, ñucaca mana llaquirinichu, ashtahuancarin Dios cuyac cashcata Apunchic Jesús huillachun nishcatami huañuna punzhacaman cushicushpa pactachina cani.

²⁵ Taucacunamanmi Dios mandacucmanta huillashpa pasarcani. Chai uyaccunamantaca ñuca ñahuita mana ashtahuan ricunguichicchu. Chaica chashnatacmi canga.

²⁶ Chaimantami cunan caita huillasha nini: Maijan cancuna juchallapitac huañucpica, Diosca ñucataca mana juchanchingachu.

²⁷ Chaica, Dios huillachun nishcataca, mana pacashpami tucui huillarcani.

²⁸ Apunchic Jesusca paipac yahuarhuanmi, tandanacushca criccunataca randirca. Chaimanta cancunallatac alli yuyaihuan, tucui criccunata cuidanguichic. Diospac Espirituca cancunataca paicunata cuidashpa michic cachunmi churarca.

²⁹ Ñuca rishca quipaca shuccuna shamushpami, ovejacunata manchachishpa, caita chaita cachac shina, criccunata chingachinga.

³⁰ Cancunapuramantapish maijanca: “Ñucata catichic” nishpami, llullashpa huillanga.

³¹ Chaimanta alli yuyaihuan caichic. Ñucaca quimsa huatacamanmi tutapish, punzhapish mana samarishpa, tucui cancunata shucllancaman huacashpa cunacurcani.

³² Cunanca, Dios cuyashpa, pai rimashca shimicunahuan sinchiyachichunmi, cancunataca paiman mingani. Pai acllashcacuna japina cashcatapish, paillatacmi cunga.

³³ Ñucaca pipac cullquitapish, curitapish, churanatapish mana munarcanichu.

³⁴ Chaipac randica ñucamanpish, ñucahuan puriccunamanpish ima illashcata charingapacca, ñuca maquihuanmi trabajarcani. Chaitaca cancunallatac yachanguichicmi.

³⁵ Chashna trabajashpami huacchacunata ayudana canguichic. Chaitami yachachicurcanilla. Apunchic Jesusca: “Ayudacmi, chasquicta yalli cushicun” nircami. Chaita yuyaringuichic» nirca.

³⁶ Chaita nishca quipami, Pabloca tucui paihuan caccunahuan cungurishpa, Diosta mañarca.

³⁷ Chai quipaca, tucui chaipi caccunami Pablota ucllarishpa, muchashpa huacanacurca.

³⁸ Chaica, “ñucataca ña mana ashtahuan ricunguichicchu” nishcamantami llaquirishpa, barcocaman Pablohuan rircacuna.