HECHOS 19 - Dios Rimashcata Quillcashcami

Efeso pueblopi Pablo huillashcamanta

¹ Corinto pueblopi Apolos cacpimi, Pabloca urcu urcuta rishpa, Efeso puebloman chayarca. Chaipi tauca criccunahuan

² tupashpaca: —Cancuna crishpaca, ¿Diospac Espirituta chasquircanguichicchu?— nirca. Chashna nicpimi paicunaca: —Diospac Espíritu tiyashcataca, jaicapi mana uyashcanchicchu— nirca.

³ Shina nicpimi Pabloca: —¿Ima bautismotatac chasquircanguichic?— nirca. Shina nicpimi paicunaca: —Ñucanchicca Bautizac Juan yachachishcamantami bautizarircanchic— nirca.

⁴ Shina nicpimi Pabloca: —Juanca Diosman cuti richun nishpami: “Ñucapac quipa shamucta cringuichic” nishpa bautizarca. Chai shamucca Quishpichic Cristomi— nirca.

⁵ Chashna nishcata uyashpaca, Apunchic Jesuspac shutipimi bautizarircacuna.

⁶ Pablo paicunapac uma jahuapi maquita churacpica, Diospac Espirituta chasquishpami, shuctac rimaicunata rimashpa, Dios yuyaita cushcata huillarcacuna.

⁷ Paicunaca chunga ishcai shinami carcacuna.

⁸ Pabloca quimsa quillatami israelcuna tandanacuna huasiman yaicushpa, gentecuna crichun, Dios mandacucmanta mana manchashpa huillarca.

⁹ Maijancunaca rumi shungu tucushpa, crinata mana munashpami tucuipac ñaupapi “Jesusta crinaca mana allichu” nishpa rimarcacuna. Chaimantami Pabloca tucui criccunata Tirano runa yachachina huasiman pushashpa, punzhanta yachachirca.

¹⁰ Chashnami Pabloca chai Asia llactapica ishcai huatata causarca. Chaipi Apunchic Jesusmanta alli huillaita huillacpica, tucui israelcunapish, mana israelcunapish uyarcacunami.

¹¹ Diosca mancharina milagrocunata ruhuachumi Pabloman poderta curca.

¹² Chaimantami Pablo tuparishca churanacunatapish, lienzocunatapish ungushcacunapac jahuapi churangapac apaccuna carca. Shina churacpica, ungushcacunaca alliyarcacunami. Millai Supaicunapish runamanta llucshicmi carca.

¹³ Rimarishpalla supaicunata llucchic maijan israelcunapish Apunchic Jesuspac shutita rimashpa, supaicunata llucchinatami yuyarcacuna. Chaimantami supaicunataca: «Pablo huillacuc Jesuspac shutipimi llucshi nini» nirca.

¹⁴ Israel curacunata mandac Escevapac canchis churicunami chashna ruhuaccuna carca.

¹⁵ Chashna nicucpimi, millai supaica: «Jesustaca ricsinimi, Pablo pi cashcatapish yachanimi. Ashtahuanpish cancunaca, ¿picunatac canguichic?» nirca.

¹⁶ Chashna nincami, chai supai japishca runaca jatarishpa, paicunata chugriricta macashpa, churanacunatapish lliquirca. Chaimantami paicunaca huasimantaca miticushpa lluchulla rircacuna.

¹⁷ Efeso pueblo israelcunapish, mana israelcunapish chashna tucushcata uyashpaca mancharishpami, Apunchic Jesustaca “allimari cangui” nircacuna.

¹⁸ Tauca criccunami paicuna manarac crishpa, mana allita ruhuashcacunata llaquirishpa, tucuipac ñaupapi huillarca.

¹⁹ Shinallatac maijan brujocunapish brujianata yachachic librocunatami tucui gentecunapac ñaupapi rupachingapac apamurca. Chai tucui librocunaca pichca chunga huaranga dracma cullqui valicmi cashca carca.

²⁰ Apunchic Jesusmanta maipipish huillacpimi, ashtahuan crishpa mirarirca.

²¹ Chai quipami, Pabloca Macedonia llactata, Acaya llactata rishpa, Jerusalenman rinata yuyacurca. Chaimantami: «Roma pueblomanpish rinami cani» nicurca.

²² Chashna yuyashpami, paita ayudac Timoteotapish, Erastotapish Macedonia llactaman cacharca. Paica chai Asia llactallapitacmi asha punzhacaman saquirirca.

Efeso pueblopi piñanacui tiyashcamanta

²³ Chai punzhacunami Efeso pueblopi Jesusta catinamanta huillashcamanta piña jatarircacuna.

²⁴ Chaipica cullquimanta imatapish ruhuac Demetriomi causarca. Paica Diana diosta adorana uchilla huasicunatami, cullquimanta ruhuac carca. Chashna ruhuashpaca paipish, paita ayudaccunapish achca cullquitami japic carca.

²⁵ Chaimantami paita ayudaccunatapish, shuctac runacunatapish tandachishpaca: —Huauquicuna, cai ñucanchic yachashcata ruhuashpallami charicyanchic. Chaitaca cancunallatac yachanguichicmi.

²⁶ Chai Pablo imata nishpa puricuctaca cancunallatac ricunguichicmi, uyanguichicmi. Paica: “Maquihuan ruhuashcaca mana dioschu” nishpami puricun. Mana cai Efeso pueblollapi, ashtahuanpish tucui Asia llactapimi achcacunata crichishca.

²⁷ Mana ñucanchic cullqui japinallachu chingaringa. Ñucanchic Diana diosca tucui Asia llactapipish, shuctac llactacunapipish tucuipac alli nishcami. Cunanca jatun llaquimi tucugrin yuyachin. Diana diosta adorana huasita shitashpa, paita cungaringacunami— nirca.

²⁸ Paicuna chaita uyashpa, yallita piñarishpaca: «¡Ñucanchic cai Efeso pueblopi causaccunapac Dianaca allimari!» nishpa caparca.

²⁹ Chaimantami tucui gentecuna ashtahuan piñarishpa caparicurca. Chashnami Pablohuan puric Macedonia llactamanta Gayotapish, Aristarcotapish japishpa, tandanacuna jatun ucuman aparcacuna.

³⁰ Chai gentecunaman huillangapac Pablo yaicusha nicpipish, criccunaca mana yaicuchun saquircachu.

³¹ Asia llactamanta Pablopac ricsishca mandaccunapish Pablo ama chai ucuman yaicuchun jarcaccunata cacharca.

³² Chai ucupi caccunaca imapac tandanacushcatapish mana yacharcachu. Chaimantami shuccunaca caita, shuccunaca chaita nishpa caparicurca.

³³ Chai tandanacushcacunapac chaupimantami, israelcunaca imallatapish nichun, Alejandrota tangashpa cacharcacuna. Chashna cachacpi, Alejandro tucui chaipi caccunapac ñaupapi shayarishpa, upallachun maquihuan señata ruhuashpa, rimanata munarca.

³⁴ Ashtahuanpish Alejandrotaca israelcunapura cashcata ricsishpami, tucui chaipi cac gentecunaca: «¡Efeso pueblopac Diana diosca jatunmi!» nishpa, ishcai hora shinata caparirca.

³⁵ Chaimanta, chai pueblota mandacpac quillcac gentecunata upallachishpaca: «Huauquicuna, cai Efeso pueblopi causaccunami, tucuipac alli nishca Dianata adorana huasitaca ricuna canchic. Chaitaca tucuimi yachancuna. Chai Dianaca Júpiter nishca luceromanta shamushca diosmi.

³⁶ Chaitaca pi mana negai pudinchu. Chaimanta upalla caichic. Imata ruhuacushcataca allita yuyarichic.

³⁷ Chaica, cancuna apamushca runacunaca ñucanchic diostaca mana camishcachu. Paita adorana huasimantapish mana imata apashcachu.

³⁸ Cai runacuna Demetriotapish, paita ayudaccunatapish piñachishca cacpica, mandaccunapacman, juezcunapacman richun. Chaipi ñahui ñahui juchanchichun.

³⁹ Ima shucmanta juchanchina cacpica, mandashcapi nishca shinami, tandanacushpa, yuyarina canchic.

⁴⁰ Cunan cashna bullata ruhuashcamantaca pacta Roma llacta soldadocuna juchanchinman. Paicuna: “¿Imamantatac caita ruhuarcanguichic?” nicpica, imata mana ni pudishunchu» nirca.

⁴¹ Chashna nishpami, chai tucui tandanacushcacunata huasiman cacharca.