HECHOS 15 - Dios Rimashcata Quillcashcami

Jerusalenpi tandanacushcamanta

¹ Chai punzhacunapi Judea llactamanta Antioquía puebloman maijancuna shamushpa, criccunata yachachishpaca: «Moisés mandashca shina circuncisionta mana ruhuashpaca, mana quishpiringuichicchu» nishpami yachachirca.

² Chaimantami Pablopish, Bernabepish chai yachachic runacunahuan sinchita rimanacurca. Chaimantami criccunaca Pablotapish, Bernabetapish, maijan criccunatapish Jerusalenman rishpa, apostolcunahuan, criccunata pushaccunahuan parlashpa, allichichun cacharca.

³ Tandanacushca criccuna paicunata cachacpica, Fenicia llactata, Samaria llactatami mana israelcunapish Diosman cutirishcata parlashpa rircacuna. Chashna parlacpica, chai criccunaca tucuimi yallita cushicurca.

⁴ Paicuna Jerusalenman chayacpica, apostolcuna, criccunata pushac yuyaccuna shinallatac tucui criccunami chasquirca. Pablopish, Bernabepish Dios paicunahuan ima shina cashcatami parlarca.

⁵ Chashna parlacpipish, fariseopuramanta maijan criccuna shayarishpaca: —Mana Israel criccunataca circuncisionta ruhuashpa, Moisés mandashcacunata pactachichunmi yachachina canchic— nirca.

⁶ Chaimantami apostolcunapish, pushac yuyaccunapish allita yuyarinacungapac tandanacurca.

⁷ Chashna unaita rimanacushca quipa, Pedro shayarishpaca: —Huauquicunalla, alli huillaita ñuca huillacpi, mana israelcunapish crishpa quishpirichunmi, Diosca ña utcaman ñucata acllarca. Chaitaca cancunallatac yachanguichicmi.

⁸ Tucuipac shunguta yachac Diosmi mana israelcunamanpish Espirituta curca. Chashnami ñucanchicta chasquishca shina paicunatapish chasquirca.

⁹ Paicuna cricpica, paicunapac shungumantapish juchacunata anchuchircami. Chaimantami ñucanchicpish, paicunapish chashnallatac canchic.

¹⁰ Cunanca, ¿ima nishpatac ñucanchicpish, ñaupa taitacunapish maita mana pactachi pudishcata, pactachichun nishpa, Diosta piñachicunguichic?

¹¹ Ashtahuanpish Apunchic Jesús cuyashcallamantami, ñucanchicpish, paicuna shinallatac quishpichishca cashun. Chaitami crinchic— nirca.

¹² Shina nicta uyashpami, tucui gentecuna upalla tucushpa, Bernabepish, Pablopish Dios-huan cashpa, mana israelcunapac ñaupapi milagrocunata, mancharinacunata ruhuashcata parlashcata uyarcacuna.

¹³ Paicuna tucui parlashca quipaca Jacoboca: —Huauquicuna, ñuca nishcata uyaichic.

¹⁴ Dios llaquishpa, mana israelcunatapish paipaclla cachun acllai callarishcatami, Simón Pedroca ña ñucanchicman parlarca.

¹⁵ Caica, Dios ima nishcata huillaccunaman pai quillcachishca shinami tucushca. Chaipica:

¹⁶ “Chai quipaca cutimushpa, Davidpac huahua huahuacunataca urmashca huasita jataric shinami, cutin jatarichisha. Urmashpa chingarishca shinatapish, allichishpa jatarichishami.

¹⁷ Chashna ruhuacpimi, tucui llactamanta mana israelcuna cashpapish, ñuca cuyashcacunaca ñucata mañanata yuyaringa.

¹⁸ Ñaupamanta pacha tucui ima tucuna cashcata huillac Mandac Dios ñucami, chashnaca nini” ninmi.

¹⁹ Chaimanta mana israelcunapish Diosta catisha nicpica, mana ruhuanacunata ruhuachun nishpa, pandachinaca, mana allichu yuyachin.

²⁰ Chaipac randica, paicunataca ruhuashcalla dioscunaman ima cushcatapish, yahuartapish, sipishpa huañuchishca aichatapish ama micuchun, shinallatac ama huacllirichun, cunashpa, quillcashpa cachashunchic.

²¹ Chaica, ñaupa punzhacunamanta pachami mai pueblocunapipish, tandanacuna huasicunapipish, samana punzhacunapi Moisés mandashcacunata rezashpa, uyachincuna— nirca.

²² Shina nishcaca apostolcunamanpish, pushac yuyaccunamanpish, tandanacushca criccunamanpish allimi carca. Chaimantami tucui criccuna cuyashca Barsabás nishca Judastapish, Silastapish Pablohuan, Bernabehuan Antioquía puebloman richun acllarca.

²³ Chai quipaca paicuna apachunmi cartaca quillcarca: «Apostolcunapish, pushac yuyaccunapish Antioquía pueblopi, Siria llactapi, Cilicia llactapi causac mana Israel criccunatapish saludanchicmi.

²⁴ Manapish ñucanchic mandacpi, ñucanchicpuramanta maijancuna cancunapacman rishpa: “Circuncisionta ruhuashpa, Moisés mandashcacunata pactachinami canguichic” nishpa, pandata yachachishcatami uyashcanchic.

²⁵ Chaimantami ñucanchic tucui mashna alli yuyarishpa, ñucanchicpurallamantatac cai huauquicunata cancunapacman cachanata yuyarircanchic. Paicunatami ñucanchic cuyashca Bernabehuan, Pablohuan cachanchic.

²⁶ Bernabepish, Pablopish huañunata mana manchashpami, Apunchic Jesucristomanta huillarca.

²⁷ Paicuna quiquin parlachunmi, Judastapish, Silastapish cancunapacman cachanchic.

²⁸ Diospac Espiritumanpish, ñucanchicmanpish alli cacpimi, cancunata mana ashtahuan piñachishpa, cai ruhuanallata ruhuachun ninchic:

²⁹ Ruhuashcalla dioscunaman cushca ofrendatapish, yahuartapish, sipishpa huañuchishca aichatapish ama micunguichicchu, shinallatac ama huaclliringuichicchu. Caicunata cazushpaca, allitami ruhuanguichic. Allilla cashca cachun» nishpami quillcarca.

³⁰ Chashnami chai acllashca runacuna Antioquía puebloman rishpa, criccunata tandachishpa, chai quillcata curcacuna.

³¹ Chai quillcata rezashcata criccuna uyashpaca, tucuimi yallita cushicurca.

³² Judaspish, Silaspish Dios ima nishcata huillaccuna cashpami, chai criccunataca tauca cutin alli cunashpa yachachirca. Chashna yachachicpimi, criccunaca cushicushpa, ashtahuan catina yuyaita japirca.

³³ Chaipi tauca punzhacunata criccunahuan cashpaca, paicunata cachaccunapacmanmi cutishun nirca. Chaimantami chai criccunaca: “Allilla ringuichic” nishpa cacharca.

³⁴ Shina nicpipish, Silasca saquirina yuyaita charishpami, chaipi saquirirca.

³⁵ Pablopish, Bernabepish, Antioquía pueblollapitac saquirishpami, Apunchic Jesusmanta alli huillaita taucacunahuan huillarca.

Pabloca Bernabemanta raquirishpa, cutin huillagrishcamanta

³⁶ Tauca punzhacuna quipami, Pabloca Bernabetaca: —Sarun Apunchic Jesusmanta alli huillaita ñucanchic huillacucpica, tauca pueblocunapimi uyashpa crirca. Cunanca, paicuna ima shina caticucta jacu ricungapac— nirca.

³⁷ Shina nicpimi Bernabeca: —Marcos nishca Juanta pushashun— nirca.

³⁸ Chashna nicpimi Pabloca: —Sarun ñucanchic huillanata manarac tucuchicpimi, Panfilia llactacaman rishpa, ñucanchicta shitashpa cutimurca. Chaimantami mana pushasha nini— nirca.

³⁹ Chashna rimanacushpami, chicanyarinacushpa, Bernabeca Marcosta pushashpa, barcopi Chipre llactaman rirca.

⁴⁰ Pabloca Silasta acllashpami ri callarirca. Chaimantami criccunaca Dios cuyashpa alli pushachun, Diosman mingarca.

⁴¹ Chashnami Siria llacta, Cilicia llacta tandanacushca criccunata yuyaita cushpa, cushichishpa rircacuna.