HECHOS 12 - Dios Rimashcata Quillcashcami

Jacobota huañuchishcamantapish, Pedrota carcelpi churashcamantapish

¹ Chai punzhacunallatacmi jatun mandac Herodesca maijan criccunata piñashpa, llaquichingapac japichi callarirca.

² Chashnami Juanpac huauqui Jacobota espadahuan huañuchichun mandarca.

³ Chashna ruhuashca israelcunaman alli ricuricpimi, Pedrotapish japichirca. Chai punzhacunaca, levadura illac tandata micuna fiestami carca.

⁴ Chaimantami Pedrota carcelpi churashpa, chunga sucta soldadocunata, chuscu chuscu chullayanacushpa cuidachun churarca. Pedrotaca Pascua punzhacuna quipa, tucui gentecunapac ñaupaman llucchishpa juchanchinatami yuyarca.

⁵ Chaimantami Pedrotaca carcelpi alli cuidaracurca. Ashtahuanpish tandanacushca criccunaca Pedromanta Diosta mañanataca manatac saquircachu.

Pedro carcelmanta llucchishcamanta

⁶ Mandac Herodesca cayandimi Pedrota carcelmanta llucchishpa, juchanchigricurca. Pedroca chai tutaca ishcai cadenacunahuan huatashca, ishcai soldadocunapac chaupipimi sueñucurca. Caishuc soldadocunaca cárcel pungupimi cuidacurca.

⁷ Chashna Pedro sueñucucpimi, Mandac Dios cachashca ángel cungailla ricurishpa, chai ucuta achicyachirca. Chai ángel Pedrota tuparishpa ricchachishpaca: «¡Utca jatari!» nirca. Chashna nicpica, huatashca cadenaca Pedropac maquicunamanta cacharirishpa urmarcallami.

⁸ Shinallatac angelca: «Chumbilliri, ushutatapish churari» nircami. Pedro chashna ruhuacpica, cutin chai angelca: «Jahualla churanatapish churarishpa, ñucata cati» nirca.

⁹ Chaimantami Pedroca chai angelta catishpa llucshirca. Pedroca ángel chashna llucchicushcataca mana yuyarcachu, ashtahuanpish muscuipi cashcatami yuyarca.

¹⁰ Paicuna punta cuidacuc soldadocunatapish, quipata cuidacuc soldadocunatapish pasashpa, canzha jatun fierro punguman chayacucpica, chai punguca paillatac pascarircallami. Ñanman llucshishpa, ashata ricucpica, chai angelca chingarircami.

¹¹ Chaimanta Pedro yuyaita japishpaca: «Cunanca, israelcunapac maquimantapish, Herodespac maquimantapish quishpichingapac Mandac Dios paipac angelta cachashcatami yachani» nirca.

¹² Chashna cashcata yuyashpami, Marcos nishca Juanpac mama Mariapac huasiman rirca. Chai huasipica achca criccunami tandanacushpa, Diosta mañacushca carca.

¹³ Pedro calle punguta huactacpica, Rode huarmi huambrami ricungapac llucshirca.

¹⁴ Chai huambra Pedropac rimaita ricsishpa, punguta manarac pascashpami, yallita cushicushpa, Pedro cashcata huillangapac ucuman callparca.

¹⁵ Chashna huillacpimi paicunaca: —¡Musparinguimi!— nirca. Chashna nicpi, chai huambraca: —¡Mana, paillatacmi!— nirca. Chashna nicpipish paicunaca: —¡Paihuan puric angelmi canga!— nirca.

¹⁶ Chaicamanca Pedroca pungupi huactacurcallami. Paicuna punguta pascashpa Pedrota ricushpaca, mancharishpami saquirircacuna.

¹⁷ Pedroca upalla cachun, maquihuan señata ruhuashpami, Mandac Dios ima shina paita carcelmanta llucchishcata parlarca. Chashna parlashpaca: —Caitaca Jacobomanpish, caishuc criccunamanpish parlanguichic— nishpaca, chaimanta llucshishpa, shuc llactaman rircallami.

¹⁸ Ña pacaricpi, cuidac soldadocunaca: —¿Maipitac Pedroca?— nishpami, caishuc chaishuc mancharishpa tapunacurca.

¹⁹ Herodesca Pedrota mashcachishpa, mana tarishpami, cuidac soldadocunata alli tapushpa, paicunata huañuchichun mandarca. Chai quipaca Judea llactamanta llucshishpa, Cesarea pueblopimi causagrirca.

Herodes huañushcamanta

²⁰ Mandac Herodesca Tiro pueblopi, Sidón pueblopi causaccunahuanmi yallita piñarirca. Chashna piñarishpami, chai llactapi causaccunaman ama imata catuchun mandarca. Chaimantami paicunaca shuc yuyailla tucushpa, Herodespac mayordomo Blastota Herodes-huan parlashpa cuchun mañarcacuna. Chai llactacunapi causaccunaca Herodespac llactamantami micunata randishpa causac carca. Chaimantami mana piñanacunata munarcacuna.

²¹ Chashna mañacpica, shuc punzhapacmi cayarca. Chai punzhapimi Herodesca mandac churanata churarishca, jatun tiyarinapi tiyarishpa, paicunataca sumacta rimarca.

²² Chaimanta chai gentecuna caparishpaca: “¡Canca Dios shinami rimangui, mana runa shinachu rimangui!” nircacuna.

²³ Herodes “Dios shinami cani” nishpa, Mandac Diosta mana jatunyachishcamantami chai rato ángel ungüita cachashpa huañuchirca. Chashnami curucuna micushca tucurirca.

²⁴ Diospac shimica ashtahuanmi huillarishpa catirca.

²⁵ Bernabepish, Saulopish paicuna ruhuana cashcata tucuchishpami, Jerusalenmanta Marcos nishca Juanta pushashpa, cutinllatac Antioquía puebloman cutircacuna.