HECHOS 11 - Dios Rimashcata Quillcashcami

Jerusalén criccunaman Pedro huillashcamanta

¹ Dios rimashcata mana israelcunapish chasquishcatami, apostolcunapish, Judea llacta criccunapish yachac chayarca.

² Chaimantami Jerusalenman Pedro cuticpica, circuncisionta ruhuashca criccunaca rimarirca.

³ Paicunaca: —¿Ima nishpatac mana circuncisionta ruhuashca gentecunapac huasiman yaicushpa, paicunahuan micurcangui?— nirca.

⁴ Chaimanta Pedro sumacta parlashpaca:

⁵ —Ñucaca Jope pueblopi Diosta mañacushpami, muscuipi shina, jatun lienzo chuscu puntapi huatashca, jahua pachamanta ñucapacman shamucucta ricurcani.

⁶ Chaita alli ricushpaca, charina animalcuna, piña sacha animalcuna, pambata aisarishpa puric animalcuna, alasyuc animalcuna chaipi cactami ricurcani.

⁷ Chaimanta shuc rimashca uyarishpaca: “Pedro, jatari. Caicunata huañuchishpa micui” nirca.

⁸ Shina nicpimi ñucaca: “Mana, Apunchic Jesús. Mapa animalcunataca mana micushachu, jaicapi mana micushcanichu” nircani.

⁹ Ñuca chashna nicpi, jahua pachamanta cutin rimashca uyarishpaca: “Dios chuyayachishcataca, ama mapami nichu” nirca.

¹⁰ Chai lienzo quimsa cutin ricurishpaca, jahua pachamanmi apashca carca.

¹¹ Chai ratomi Cesarea pueblomanta cachashca quimsa runacuna ñuca maipi cac huasiman chayarca.

¹² Chashna paicuna shamucpica, Diospac Espiritumi mana caita chaita yuyashpa, paicunahuan richun nirca. Caishuc sucta criccunapish ñucahuanmi rirca. Chashna rishpami, chai runapac huasiman yaicurcanchic.

¹³ Chai runaca paipac huasipi ángel ricurishpa: “Pedro nishca Simonta Jope pueblomanta pushamuchun cachai.

¹⁴ Paimi canpish, cambac huasi familiacunapish ima shina quishpirina cashcataca huillanga” nishca carca.

¹⁵ Ñuca paicunaman huillai callaricpica, sarun ñucanchicman shamuc shinallatacmi, Diospac Espíritu paicunapacmanpish shamurca.

¹⁶ Chashna shamucpimi, Apunchic Jesús huillashcataca yuyarircani. Paica: “Juanca yacullahuanmi bautizarca. Ashtahuanpish cancunaca asha punzhacuna quipaca, Diospac Espirituhuanmi bautizashca canguichic” nircami.

¹⁷ Ñucanchic Apunchic Jesucristota cricpi, Dios paipac Espirituta cushca shinami, paicunamanpish curca. Dios chashna ruhuacucta jarcangapacca ñucaca, ¿imatac caniyari?— nirca.

¹⁸ Chashna nicta paicuna uyashpaca, mana imata nircacunachu. Ashtahuanpish Diostaca “allimari cangui” nishpami: —¡Diosca mana israelcunapish Diosman cutirishpa, huiñai causaita charichunmi munan!— nirca.

Antioquía pueblo criccunamanta

¹⁹ Estebanta huañuchishca quipa, llaquichi callaricpimi, criccunaca Fenicia, Chipre llactacunaman, Antioquía puebloman miticushpa rircacuna. Chai llactacunapica pimanpish mana huillashpa, israelcunallaman huillashpami rircacuna.

²⁰ Chashna cacpipish, Chipre llactamanta, Cirene pueblomanta, Antioquía puebloman shamuc maijan criccunaca, mana israelcunamanpish Apunchic Jesusmanta alli huillaita huillarcami.

²¹ Diosca paicunahuanmi carca. Chaimantami achcacuna Apunchic Jesusta crishpa, ñaupa mana alli causaita saquircacuna.

²² Jerusalenpi tandanacushca criccuna chaita yachashpaca, Bernabetami Antioquía puebloman cacharca.

²³ Bernabé chaiman chayashpaca, Diosca yallita cuyashpa, quishpichishcata ricushpami cushicurca. Tucui criccunatami Apunchic Jesusllata tucui shunguhuan cazuchun rimarca.

²⁴ Bernabeca alli runa, alli cric, Diospac Espíritu jundami carca. Chaimantami pai huillacpica, achca gentecuna Apunchic Jesusta crirca.

²⁵ Chaimantami Bernabeca Tarso pueblopi Saulota mashcangapac rirca. Chaipi tupashpaca, Antioquía pueblomanmi pushamurca.

²⁶ Chaipica huata jundatami achca gentecunaman yachachishpa, criccunahuan tandanacushpa causarca. Chai pueblopimi Apunchic Jesusta caticcunataca: “Criccuna” nishpa, cayai callarirca.

²⁷ Chai punzhacunapimi, Dios ima nishcata huillaccunaca Jerusalenmanta Antioquía puebloman shamurca.

²⁸ Agabo shuti runa shayarishpa, Diospac Espíritu yuyaita cucpi, tucui llactacunapi ima mana pucucpi yarcai tiyanamanta huillarca. Chaica, jatun mandac Claudio mandacui punzhacunapimi, chashna tucurca.

²⁹ Chashna huillacpimi, Antioquía pueblo criccunaca paicuna imallata cui pudishcata Judea llacta criccunaman cuchun cachanata yuyarirca.

³⁰ Paicuna chashna ruhuashpaca, Judea llacta criccunata pushaccunaman cuchunmi, Bernabeta, Saulota cacharca.