HECHOS 10 - Dios Rimashcata Quillcashcami

Corneliomantapish, Pedromantapish

¹ Cesarea pueblopica, Cornelio shuti runami causarca. Paica Italia llactamanta patsac soldadocunata mandacmi carca.

² Paica Dios yuyaillami causac carca. Chaimantami tucui familiahuan Diosta manchashpa, mañashpa, israelcunapurapi huacchacunaman cullquita cushpa causac carca.

³ Shuc punzha, quimsa horas chishita Diosta mañacucpi, Dios cachashca ángel muscuipi shina cungailla ricurishpaca: —Cornelio— nirca.

⁴ Chaimanta Cornelio manchaihuan angelta ricushpaca: —Amito, ¿imatatac ningui?— nirca. Chashna nicpimi angelca: —Huacchacunaman cushcatapish, can Diosta mañashcatapish paica chasquishcami.

⁵ Cunanca, Jope pueblomanta Pedro nishca Simonta pushamuchun cachai.

⁶ Paica carata ñutuyachic Simonpac huasipimi pozacun. Chai huasica mama cucha patapimi. Pai shamushpami, can imata ruhuana cashcataca huillanga— nirca.

⁷ Paihuan parlacuc ángel ricpica, Cornelioca ishcai serviccunata shinallatac Dios yuyailla causac soldadotami cayarca.

⁸ Paicunaman tucui ima tucushcata parlashpami, Jope puebloman cacharca.

⁹ Cayandi punzha, chai runacuna Jope puebloman ñanta chayacucpica, chaupi punzha shina cacpimi, Pedroca pai pozana huasi jahuaman huichicushpa, Diosta mañacurca.

¹⁰ Pedroca yarcachishpami micunata munarca. Micuna ruhuaringacaman yalli yarcaihuan cashpami, muscuipi shina

¹¹ jahua pacha pascarictapish, shuc jatun lienzo chuscu puntapi huatashca, pai tiyacucman urai shamucuctapish ricurca.

¹² Chai lienzopica, tucui cai pachapi tiyac chuscu chaquiyuc animalcunapish, allpata aisarishpa puric animalcunapish, alasyuc animalcunapishmi carca.

¹³ Shuc rimashca uyarishpaca: —Pedro, jatari. Caicunata huañuchishpa micui— nirca.

¹⁴ Shina nicpimi Pedroca: —Mana, Apunchic Jesús. Mapa animalcunataca mana micushachu, jaicapi mana micushcanichu— nirca.

¹⁵ Shina nicpi, cutin rimashca uyarishpaca: —Dios chuyayachishcataca, ama mapami nichu— nirca.

¹⁶ Chai lienzo quimsa cutin ricurishpaca, jahua pachamanmi apashca carca.

¹⁷ Chaita Pedro ricushpa, mancharishpa shayacucpimi, Cornelio cachashca runacunaca tapushpa, tapushpa Simonpac huasiman cungailla chayarca.

¹⁸ Chaiman chayashpami, Pedro nishca Simonmanta tapurca.

¹⁹ Muscuipi shina ricushcata Pedro yuyaricucpimi, Diospac Espirituca: «Quimsa runacunami canta mashcacun.

²⁰ Paicunataca ñucami cacharcani. Chaimanta ama caita chaita yuyashpa uricui. Paicunahuan rilla» nirca.

²¹ Chaimanta Pedro Cornelio cachashca runacunapacman uricumushpaca: —Ñucami cancuna mashcacushca Simón Pedroca cani. ¿Imatatac nicunguichic?— nirca.

²² Chashna nicpimi paicunaca: —Pasac soldadocunata mandac Cornelio cachacpimi shamunchic. Paica Diosta cazucmi, shinallatac tucui israelcunapac alli nishca runami. Dios cachashca angelmi canta huasiman pushamuchun, shinallatac can ima huillashcata uyachun nishca— nirca.

²³ Chaimantami Pedroca pai pozacuc huasipi paicunata chai tutaca pozachirca. Cayandi punzhaca Pedroca paicunahuanmi rirca. Jope pueblo maijan criccunapish paicunahuan rircacunami.

²⁴ Quipa punzha ña Cesarea puebloman chayacpica, Cornelioca paipac familiacunahuan, paipac alli ricsishcacunahuanmi tandarishpa, shuyacushca carca.

²⁵ Pedro chayacpica, Cornelio tupangapac llucshishpami, paipac ñaupapi cungurishpa chasquirca.

²⁶ Chaimantami Pedroca: —Shayari, ñucapish can shina runallami cani— nishpa jatarichirca.

²⁷ Pedroca Corneliohuan parlashpa, ucuman yaicushpaca, achca gentecuna tandanacushcatami ricurca.

²⁸ Chaipimi Pedroca: —Israelcuna, mana israelcunahuan mana tandanacuc cashcataca, cancunallatac yachanguichicmi. Paicunapac huasillamanpish mana chayarina cashcatapish yachanguichicmi. Shina cacpipish, Dios ñucaman ricuchishpaca: “Pitapish ama mana alli nishpa, millanguichu” nirca.

²⁹ Chaimantami can cachashca runacuna ñucapacman chayacpica, imamantapish mana jarcarishpa shamuni. Cancunaca, ¿imapactac cayachircanguichic?— nirca.

³⁰ Shina nicpimi Cornelioca: —Ñami chuscu punzha tucun. Chaica, cunan shina chishimi, cai ñuca huasipi ayunashpa, Diosta mañacurcani. Chaipimi jagan nicuc churanata churashca runa ñapish ricurirca.

³¹ Chashna ricurishpaca: “Cornelio, can mañashcataca Diosca uyashcami. Can huacchacunaman imallata cushcatapish ricushcami.

³² Cunanca, Jope pueblomanta Pedro nishca Simonta pushamuchun cachai. Paica carata ñutuyachic Simonpac huasipimi. Chai huasica mama cucha patapimi. Pai shamushpami, can imata ruhuana cashcata huillanga” nirca.

³³ Chaimantami canta pushamuchun cacharcani. Allitami shamushcangui. Cunanca tucuimi Diospac ñaupapi canchic. Pai tucui imata ñucanchicman huillachun nishcataca huillailla. Ñucanchicca uyashun ninchicmi— nirca.

Corneliopac huasipi Pedro huillashcamanta

³⁴ Chaimantami Pedro huillai callarishpaca: —Cunanmi allita entendini. Chaica, Diosmanca, tucuimi chai shinallatac canchic.

³⁵ Mai llactapipish Diosta manchashpa, cashcata ruhuacpica, Diosca chasquinmi.

³⁶ Diosca Jesucristotami israelcunaman paihuan alli tucushpa, sumacta causachun, alli huillaita huillachirca. Paica tucuita mandac Jesucristomi.

³⁷ Juan bautizarinamanta huillashca quipa, Galilea llactamanta callarishpa, Judea llactacaman ima tucushcataca cancunallatac yachanguichicmi.

³⁸ Diosca Nazaret pueblomanta Jesusman paipac Espirituta cushpami, poderyucta ruhuarca. Dios paihuan cashcamantami Jesusca maipipish allita ruhuashpa, llaquichic Satanás japishcacunatapish alliyachishpa purirca.

³⁹ Ñucanchicca Jerusalén pueblopipish, Judea llactapipish Jesús tucui imalla ruhuashcacunata ricushpa, huillaccunami canchic. Chai tucui allita ruhuacucpipish, paitaca cruzpi chacatashpami huañuchirca.

⁴⁰ Chashna huañuchicpipish, Diosca quimsa punzhapi causachishpami, ñucanchicman cutin ricuchirca.

⁴¹ Mana tucuimanchu ricuchirca. Ñucanchic imalla ricushcata huillachun, Dios ñaupaman acllashcacunallamanmi ricuchirca. Huañushcacunapuramanta Jesús causaricpica, ñucanchicca paihuanmi micurcanchic, ubiarcanchic.

⁴² Diosca ñucanchictami huañushcacunatapish, causaccunatapish taripacca Jesús cashcata huillachun mandarca.

⁴³ Dios ima nishcata tucui huillaccunami: “Jesusmi, paita criccunapac juchacunata perdonanga” nishpa huillarca— nirca.

Mana israelcunamanpish Diospac Espíritu shamushcamanta

⁴⁴ Pedro huillacucpiracmi, chai huillashcata tucui uyaccunapacman Diospac Espíritu shamurca.

⁴⁵ Pedrohuan shamuc Jesusta cric israelcunaca, Diospac Espíritu mana israelcunapacmanpish shamushcata ricushpami mancharircacuna.

⁴⁶ Chaica, shuctac rimaicunatami rimacurca. Diostapish “allimari cangui” nicurcami.

⁴⁷ Chaimantami Pedroca: —Cai runacunapish ñucanchic shinallatacmi Diospac Espirituta chasquincuna. Chaimanta paicuna bautizarichunca, pi mana jarcangachu— nirca.

⁴⁸ Shina nishpami Pedroca Apunchic Jesuspac shutipi paicunata bautizachun mandarca. Chaimantami Pedro asha punzhacunata paicunahuan saquirichun mañarcacuna.