HECHOS 1 - Dios Rimashcata Quillcashcami

Diospac Espirituta cachanamanta

¹ Cuyashca Teófilo, punta quillcashcapimi Jesús imacunata ruhuashcatapish, yachachishcatapish callarimanta pacha quillcashpa cacharcani.

² Chaica, Diospac Espíritu apostolcunata poderhuan mandashca quipa, Apunchic Jesusta jahua pachaman pushashca punzhacaman ima tucushcatami quillcani.

³ Jesús huañushpa causarishca quipaca, chuscu chunga punzhacamanmi tauca cutin apostolcunaman ricurishpa, pai causacushcata allita ricuchirca. Chashnami Dios mandacucmantapish paicunaman yachachirca.

⁴ Paicunahuan cashpa, Jesús paicunata mandashpaca: —Ñuca huillashca shina, ñuca Taita cusha nishca Espíritu shamungacaman, Jerusalén pueblomanta maiman mana rishpa, chaipi shuyacunguichic.

⁵ Juanca yacullahuanmi bautizarca, ashtahuanpish asha punzhacuna quipaca, Diospac Espirituhuanmi bautizashca canguichic— nirca.

Jahua pachaman Jesús rishcamanta

⁶ Apostolcuna tandanacushpa, Jesusta tapushpaca: —Apunchic Jesús, ¿cunanllatacchu Israel llactata mandanata cutin allichigringui?— nirca.

⁷ Chashna nicpimi Jesusca: —Chaitaca ñuca Taitallami yachan. Cancunaca ima punzha, ima hora chashna tucunataca mana yachai pudinguichicchu.

⁸ Diospac Espíritu cancunapacman shamucpimi, poderta chasquinguichic. Chaimantami Jerusalén pueblopipish, tucui Judea llactapipish, Samaria llactapipish, tucui llactacunapipish ñucamanta huillanguichic— nirca.

⁹ Chaita nishca quipami, paicuna ricucucpi, Jesusca jahua pachaman apashca carca. Paita puyu pacacpica, ña mana ricurcacunachu.

¹⁰ Jesús huichai ricucta paicuna ricuracucpimi, ñapish ishcai yuranlla churarishca runacuna paicunapac cuchupi ricurirca.

¹¹ Chashna ricurishpaca: —Galilea llacta runacuna, ¿ima nishpatac huichailla ricucunguichic? Cai cancunapacmanta jahua pachaman pushashca Jesusllatacmi, cutin shamunga. Ima shinami pai ricta ricurcanguichic, chashnallatacmi cutimunga— nirca.

Matiasta Judaspac randi acllashcamanta

¹² Chai quipami, apostolcunaca Olivos urcumantaca Jerusalén puebloman cutimurca. Chai urcuca Jerusalenmanta shuc kilómetro shinapimi carca.

¹³ Jerusalenman chayashpaca, paicuna pozacushca huasi altomanmi huichicurca. Chaipimi Pedropish, Jacobopish, Juanpish, Andrespish, Felipepish, Tomaspish, Bartolomepish, Mateopish, Alfeopac churi Jacobopish, Celote nishca Simonpish, Jacobopac huauqui Judaspish carca.

¹⁴ Tucui paicunami shuc yuyailla Diosta mañacurca. Jesuspac huauquicunapish, paipac mama Mariapish, caishuc huarmicunapishmi chaipi carca.

¹⁵ Chai punzhacunapica, patsac ishcai chunga criccunami tandanacushca carcacuna. Paicunapac ñaupapi Pedro shayarishpaca:

¹⁶ «Huauquicuna, Jesusta Judas japichina cashcataca, ñaupamanmi Diospac Espíritu yuyaita cucpi, Davidca quillcachishca. Chaica pactanami carca.

¹⁷ Judasca ñucanchicpuramantami carca. Paipish ñucanchic shinallatac shuc ruhuaita ruhuachun acllashcami carca.

¹⁸ Judasca millaita ruhuashcamanta japishca cullquihuanca allpatami randirca. Chai allpallapitacmi jahuamanta urai singa urmashpa, huicsa tucyashpa, chunzhulli tallirishpa huañurca.

¹⁹ Chashna tucushcataca tucui Jerusalenpi causaccunami yachac chayarca. Chaimantami chai allpataca quiquin rimaipi “Aceldamata” shutichirca. “Acéldama” nishpaca, “Yahuar Allpa” nisha ninmi.

²⁰ Salmos libropica: “Paipac huasica shitashca saquirichun, chai huasipica pipish ama causachun” nicunmi. Chashnallatac: “Pai ruhuanataca, shuc runa ruhuachun” nicunmi.

²¹ Apunchic Jesus-huan ñucanchic puricucpi, punzhanta ñucanchic-huan puric runacunaca tiyanmi.

²² Paicunaca Juan bautizacui punzhamanta pacha, Jesús jahua pachaman ringacamanmi ñucanchic-huan puric carca. Paimanta shucta Jesús causarishcata ñucanchic-huan huillachun acllashunchic» nirca.

²³ Pedro chashna nicpimi, ishcai runata chicanyachirca. Shucca Justo nishca José Barsabasmi carca. Cutin caishucca Matiasmi carca.

²⁴ Chaimanta Diosta mañashpaca: «Mandac Dioslla, canmi tucuipac shunguta ricsingui. Cunanca, cai ishcai runacunamanta, maijan can acllashcata ricuchiyari.

²⁵ Maijan can acllashcataca Judaspac randi ñucanchic-huan canmanta huillachunmi munanchic. Judasca millaita ruhuashcamantami canmanta huillanata saquishpa huañushpa, llaqui tucurca» nirca.

²⁶ Chashna mañashpami suerteta ruhuacpica, Matiasman urmarca. Chaimantami Matiasca chunga shuc apostolcunahuan tandanacurca.