HEBREOS 8 - Dios Rimashcata Quillcashcami

Jesusca mushuc ari ninacuita pactachic cashcamanta

¹ Ñucanchic nicushcamanta ashtahuan yallica, jatun mandac curatami charinchic. Paica jahua pacha Dios mandacucpimi alli maquiman tiyacun.

² Paica, Diospaclla cac huasipimi curacuna shina servicun. Chai huasica mana gentecunachu ruhuashca ashtahuanpish Mandac Diosllatac ruhuashcami can.

³ Tucui jatun mandac curacunami, Diosman ofrendata cungapac, animalcunata huañuchishpa Diosman cungapac acllashca can. Chaimantami Apunchic Jesucristopish Diosmanca imata cuna can.

⁴ Cai pachapica Moisés mandashca shina, Diosman cushpa, rupachic curacuna tiyanmi. Chaimanta paica cai pachapi cashpaca, curallapish mana canmanchu carca.

⁵ Dios-huan tupana huasita Moisés ruhuagricucpimi, Dios rimashpaca: “Riqui, urcupi ricuchishca shina, chai huasita ruhuangui” nirca. Chaimantami cai pachapi cac curacuna servishpaca, jahua pachapi tiyashcata ricuchic llandu shinallatac ruhuacuncuna.

⁶ Ashtahuanpish ñucanchic jatun mandac curaca, Apunchic Jesucristomi. Paica caishuc curacunata atishpami, ruhuangapac chasquishca. Paica tucuimanta yalli ari ninacuitami ruhuashca, chai ari ninacuimi yallita valin.

⁷ Punta ari ninacui alli cashca cacpica, quipa ari ninacuica mana tiyanmanchu carca.

⁸ Mandac Diosca gentecuna mana alli pactachic cashcata ricushpami: «Israel gentecunahuan Judá gentecunahuan mushuc ari ninacuita ruhuana punzhacunaca pactamungami.

⁹ Caica mana paicunapac ñaupa taitacunahuan ari nishca shinachu canga. Paicunataca maquimanta japishpami, Egipto llactamanta llucchircani. Shina cashpapish, chai ari nishcata mana pactachishcamantaca saquircanimi.

¹⁰ Quipa punzhacunapi israelcunahuan ari ninacushpaca, ñuca mandashcacunataca paicunapac yuyaipimi churasha. Paicunapac shungupimi, quillcashca shina churasha. Ñucaca paicunapac Diosmi casha, paicunaca ñuca huahuacunami canga.

¹¹ Chashna cacpica pipish paipac ricsishcacunata paipac aillucunataca “Mandac Diostaca ricsiyari” mana ningachu, ashtahuanpish uchillamanta callarishpa, jatuncunacamanmi tucui mashna ñucataca ricsic chayangacuna.

¹² Ñucami tucui paicunapac juchacunata perdonasha, shinallatac paicunapac juchacunatapish ña mana ashtahuan yuyarishachu» ninmi.

¹³ Mushuc ari ninacuimanta Dios rimashpaca, ñaupa ari nishcaca ña mauca cashcatami ricuchin. Chai maucayashcaca ña tucurimugricucmi can.