HEBREOS 7 - Dios Rimashcata Quillcashcami

Jesusca Melquisedec shinallatac cura cashcamanta

¹ Melquisedecca jahua pacha Diospac curapish, Salem llactata jatun mandacpishmi carca. Abraham jatun mandaccunahuan macanacushpa, mishashpa shamucpica, Melquisedecca tupangapac llucshishpami, Dios bendiciachun nirca.

² Chaimantami Abrahamca macanacushpa quichushcacunata, chungamanta shucta Melquisedec curaman curca. Melquisedec shutica: “Cashcata ruhuac jatun mandac” nisha ninmi. Shinallatac: «Salem llactata mandac» nishcapish, “cushi causac mandac” nisha ninmi.

³ Melquisedecpac taita mamamantapish, paipac aillucunamantapish pi cashcaca mana yacharinchu. Pai huacharishcamantapish, huañushcamantapish pi mana yachanchu. Chaimantami Diospac Churi shina huiñai huiñaita Diospac cura can.

⁴ Chaimanta Melquisedectaca, jatun cashcatami yuyanchic. Ñucanchic taita Abraham mandaccunahuan macanacushpa quichushcacunata chungamanta shuctami Melquisedecman curca.

⁵ Moisés mandashcapish nishca shina, Levipac huahua huahuapuracunami curacuna cashpaca, israelcuna chungamanta shucta cushcata japicmi carca. Chashnami Abrahampac huahua huahuacuna cashpapish ruhuac carca.

⁶ Ashtahuanpish Melquisedecca mana Levipac huahua huahuapura cashpapish, Dios cushami nishcata chasquic Abrahammanta chungamanta shucta chasquircami. Chashnami, Melquisedecca Abrahamman Dios bendiciachun nirca.

⁷ Chaica maijanpish bendiciacmi bendicionta chasquicmanta yalli. Chaitaca pi mana chashnachu mana ni pudinchu.

⁸ Huañunalla runacunami chungamanta shucta chasquincuna huañunalla runacunami, ashtahuanpish Melquisedecmantaca nishpaca, mana huañushca shinatami Dios quillcachishcapica nicun.

⁹ Chungamanta shucta chasquic Leví curacunapish, Abraham Melquisedecman cuc shinami cuncuna.

¹⁰ Melquisedec Abrahamta tupangapac llucshicpica, Levipac huahua huahuapuracunaca manarac huacharishpa, Abrahampac cuerpopiracmi carca.

¹¹ Israelcunaca Aarón huahua huahuapuramanta cac Leví curacunamantami Moisés mandashcacunataca chasquirca. Chai curacuna gentecunata allichishca cacpica, shucta cura mana ricurinmanchu carca. Chai curaca mana Aarón shinachu carca, ashtahuanpish Melquisedec cura shinami carca.

¹² Shuctac cura shamucpica, mandashcacunapish shuctacyarinmi.

¹³ Chashna nishpaca, Apunchic Jesusmantami nicun. Paica mana Levipac huahua huahuapurachu, paipac ñaupa taitacunapish jaicapi mana curacunachu cashca.

¹⁴ Ashtahuanpish ñucanchic Apunchic Jesusca Judapac aillumantami carca. Shina cacpipish, Moisesca chai aillupuramanta cura shamuna cashcataca, jaicapi mana nircachu.

¹⁵ Melquisedec shina shuc mushuc cura ricuricpica, ñucanchic nicushcaca chashnatac cashcatami ricuchin.

¹⁶ Mana runacuna mandacushca shina, mana maijan aillumanta, nishca shinachu carca, ashtahuanpish mana tucuric, causaita charicmi carca.

¹⁷ Dios quillcachishcapica paimantaca: “Canca Melquisedec shinami, huiñai huiñaipac cura cangui” nin.

¹⁸ Chaimantami ñaupa mandashcataca imapac mana alli, mana ruhuaipac saquirin.

¹⁹ Moisés mandashcacunaca pactachishpaca, pita jucha illacta ruhuarca. Chaimantami Diospacman chayaringapacca shuc sumac shuyana cashcata shuyacunchic.

²⁰ Chai curaca Dios-huan ari nishcamantami tiyarca. Shuctac curacunaca mana chai shinachu carca,

²¹ ashtahuanpish Apunchic Jesusca Dios-huan ari nishcamantami cura carca. Chaimantami Dios quillcachishcapica: “Ñuca shimihuan pactachishatacmi nishcataca mana shuctacyachishachu. ‘Canca huiñai huiñaipacmi cura cangui’ nini” ninmi.

²² Chaimantami Jesusca tucuimanta yalli alli mushuc ari ninacuita ruhuan.

²³ Caishuc curacunaca mana huañuita servi pudircachu. Chaimantami tauca curacuna tiyashca.

²⁴ Ashtahuanpish Apunchic Jesucristoca huiñaitami causacun. Chaimanta pai cura shina ruhuacca mana shuctacyanchu.

²⁵ Paimanta Diospacman cuchuyaccunataca, huiñai huiñaipacmi quishpichin. Paica huiñaitami causacun, chashnami huiñaita mañacun.

²⁶ Paica ñucanchic charishun nishca jatun mandac curami. Paica jucha illac, ima mapa illac, ima millaita mana ruhuac, shinallatac juchayuccunamantapish anchurishcami can. Paitaca jahua cielomanta yalli jahuapimi Diosca churashca.

²⁷ Jesusca mana shuctac curacuna shina puntaca paipac juchacunamanta, quipaca tucui gentecunapac juchacunamanta animalta Diosman cushpa, rupachicchu, ashtahuanpish Apunchic Jesucristoca huiñaipac shuc cutinlla huañushpami, paillatac Diosman curishpa huañurca.

²⁸ Moisés mandashcaca juchayuc runacuna jatun mandac cura cachun nin, ashtahuanpish Dios, pai ari nishpaca, Moisés mandashcacunamanta quipa cashpapish, huiñaita pactachic paipac Churitami jatun mandac cura cachun nin.