HEBREOS 3 - Dios Rimashcata Quillcashcami

Jesusca Moisestapish yalli cashcamanta

¹ Chaimanta cuyashca criccuna, cancunaca jahua pacha Dios acllashcacunami canguichic. Dios cayashca cashcamanta Jesucristotaca apóstol cashcata, shinallatac jatun mandac cura cashcata yuyaichic.

² Jesusca Dios nishcata pactachicmi carca, chai shinallatacmi Moisespish Diospac huasipica, tucuita pactachirca.

³ Jesusca Moisesta yalli alli nishcami cana can. Chaica huasita ruhuacca, huasita yalli alli nishcami cana can.

⁴ Tucui huasicunami maijan ruhuashca can, shina cacpipish, tucuita ruhuacca Diosmi.

⁵ Moisesca Diospac huasipi tucuita cazuc servicmi carca. Chai shina ruhuashpami, Dios quipaman huillana cashcata ricuchicurca.

⁶ Ashtahuanpish Jesucristoca Diospac churi cashpami, Diospac huasita mandacun. Tucuri punzhacaman tucui shunguhuan cushicushpa shuyashpaca, ñucanchicmi chai huasica canchic.

Diospac huahuacuna samarinamanta

⁷ Chaimantami Diospac Espirituca: «Dios rimashcata cunan cancuna uyashpaca,

⁸ shitashca pambapi Diosta caita chaita mañashpa, piñachishca shina ama shunguta sinchiyachichicchu.

⁹ Chaipimi cancunapac ñaupa taitacunaca, chuscu chunga huatata ñuca ima ruhuashcata ricushpapish, cutin ricushun nishpa piñachircacuna.

¹⁰ Chaimantami chai gentecunahuan ñuca piñarishpaca: “Paicunaca shungupi chingarishpa puricushpami, ñuca ricuchishca ñantaca mana ricsinata munarcacuna” nircani.

¹¹ Chaimantami ñuca piñarishpa, ari nishpaca: “Ñucahuan samaringapacca manatac yaicungachu” nircani» nirca.

¹² Cuyashca criccuna, cancunapurapi millai yuyaihuan mana crisha nishpa, causac Diosmanta caruyaccuna shucllapish ama tiyachun.

¹³ Chaipac randica, cunan punzha tiyacpirac caishuc chaishuc yuyachinacushpa, cancunapac shungu rumiyashpa juchapi pandarichun ama saquinguichicchu.

¹⁴ Callaripi caticushca shina, Cristopi shunguta churashpa tucuringacaman catishpaca, Cristo japishca shinami ñucanchicpish japishun.

¹⁵ Chaimantami: «Dios rimashcata cunan uyashpaca, chai mana cazuccuna shina ama shunguta sinchiyachichicchu» nin.

¹⁶ Dios ima nishcata uyashpapish, ¿paita mana cazuccunaca picunatac carca? Chaicunaca Egipto llactamanta Moisés llucchishca tucui israelcunami carca.

¹⁷ Shinallatac Diosca, ¿picunahuantac chuscu chunga huatacunata piñarishca carca? Chai shitashca pambapi juchallishpa huañuccunahuanmi piñarishca carca.

¹⁸ Shinallatac Diosca, ¿picunatatac “ñucahuan samaringapacca, manatac yaicungacunachu” nishpa ari nirca? Chai mana cazuccunatami chashna nirca.

¹⁹ Shina cacpica, paicuna mana crishcamantami, chai samarinamanca mana yaicui pudishcata yachanchic.