HEBREOS 2 - Dios Rimashcata Quillcashcami

Sumac quishpirinata mana cungarinamanta

¹ Chaimantami alli ñanta mana chingachingapac ñucanchic uyashcataca yuyarashpa cana canchic.

² Dios paipac angelcunaman huillachishcaca, mana llullachu carca. Chaimantami maijanpish juchallishpa mana cazuccunataca, llaquichina cashca shinallatac llaquichishca carca.

³ Shina cacpica, sumac quishpirinata yangapi churashpaca, ¿ima shinatac jatun llaquimantaca quishpirishunyari? Cai quishpirinataca Apunchic Jesusmi punta huillarca. Pai huillashcata uyaccunami chashnatac cashcata huillarca.

⁴ Diospish mancharinacunata, milagrocunata ruhuashpa, pai munashca shina paipac Espirituta cushpa, chashnatac cashcata ricuchirca.

Jesucristoca ñucanchicta quishpichic cashcamanta

⁵ Ñucanchic parlacushca, chai shamuna cashca mushuc llacta mandanataca, Diosca mana angelcunamanchu curca.

⁶ Ashtahuanpish Dios quillcachishcapica maijancharica: “¡Dioslla! Gentecuna, ¿ima cacpitac yuyaringuiyari? Huañuclla runataca, ¿ima nishpatac llaquinguiyari?

⁷ Runataca ashallamantami mana angelcuna shinata ruhuashcangui. Jatun mandacta shina nishcatami ruhuashcangui, alli nishcatami ruhuashcangui. Can imata ruhuashcacunata mandactapish paitaca ruhuashcanguimi.

⁸ Pai tucuita mandachunmi, paipac chaqui sarunapi churashcangui” ninmi. Diosca imatapish mana saquishpami tucuita pai mandachun churarca. Shina cashpapish pai tucuita mandacuctaca manarac ricunchicchu.

⁹ Ashtahuanpish Jesusta, ashacamanlla angelcunamanta asha yangallata ruhuashpapish, llaquita apashpa huañushcamantami sumacyachishca, alli nishcata ruhuashca. Chaica, Dios cuyashcamantami, Jesusca tucuipac allipac huañurca.

¹⁰ Tucui ima tiyashcatapish Diosmi ruhuashca. Diosca tucui paipac huahuacuna sumaimana cushicuita japichunmi munan. Chaimantami Diosca Quishpichic Jesucristotaca, pai llaquita apashcamanta sumacyachirca.

¹¹ Jucha illacta ruhuacpish, jucha illaccunapish shuc Taitapac huahuacuna shinami canchic. Chaimantami Jesusca mana pingashpa: “Ñuca huauquicunami canguichic” nin.

¹² Paillac rimashpaca: “Cambac shutitami ñuca huauquicunamanca huillasha, shinallatac sumac cantotami tandanacushcacunapac chaupipi cantasha” ninmi.

¹³ Shinallatac: “Paita crishpami shuyasha” ninmi. Cutinllatac: “Caipica Dios cushca huahuacunahuanmi cani” ninmi.

¹⁴ Ima shinami shuc huahuacuna aichayuc, yahuaryuc can, chai shinallatacmi Jesuspish ñucanchic shina aichayuc, yahuaryuc carca. Shina cashpami, huañuiman apac diablotaca, pai huañushpa chingachirca.

¹⁵ Chashna huañushpami, tucui causaipi huañuita manchashpa, huatashca shina causacuccunata quishpichirca.

¹⁶ Jesusca mana angelcunata ayudangapacchu shamurca, ashtahuanpish taita Abrahampac huahua huahuacunata ayudangapacmi shamurca.

¹⁷ Paica, ayudangapacca paipac huauquicuna shinami tucurca. Chashna ayudashpami jatun mandac cura tucushpa, llaquishpa tucui gentecunapac juchacunata anchuchirca. Chashnami Diosta tucuita cazushpa servirca.

¹⁸ Paica, diablo pandachisha nicpi, pai llaquita apac cashcamantami, maijanpish chai shina llaquihuan caccunata, ayudangapac poderta charin.