HEBREOS 10 - Dios Rimashcata Quillcashcami

¹ Moisés mandashcacunaca Dios quipata allita cugricushcata ricuchicllami, ashtahuanpish mana chai shamuc shinachu. Chaimantami Moisés mandashcacunata pactachishpa, huatanta animalta rupachishpaca, Diospac ñaupapi jaicapi mana jucha illac cai pudin.

² Mandashcacuna jucha illacta ruhuac cacpica, animalta Diosman cushpa rupachinata saquishpami, jucha illac canmancuna.

³ Ashtahuanpish animalta Diosman cushpa rupachishpaca, huatantami juchayuc cashcata yuyarincuna.

⁴ Huagracunapac, chivocunapac yahuarpish juchacunataca mana anchuchi pudinchu.

⁵ Chaimantami Apunchic Jesús cai pachaman shamushpaca, Diostaca: «Animalta cushpa huañuchishcatapish, ofrendatapish mana munarcanguichu. Ashtahuanpish ñucataca shuc cuerpotami ruhuarcangui.

⁶ Animalta cushpa tucui rupachichunpish, juchacunamanta cuchunpish mana mañashcanguichu.

⁷ Chaimantami ñucaca: “¡Jatun Dioslla, quillcachishcapi nishca shinami, can munashcata ruhuangapac shamuni!” nircani» nirca.

⁸ Ñaupa quillcachishcapica: “Animalta Diosman cushpa huañuchishcatapish, ofrendacunatapish, juchacunata anchuchingapac animalta cushpa rupachishcatapish mana munanchu, paitaca mana cushichinchu” ninmi.

⁹ Cristoca: «Can munashcata ruhuangapacmi shamuni» ninmi. Chaica, ñaupaman imata ruhuana cashcata anchuchishpami, mushucta ruhuarca.

¹⁰ Ñucanchicta jucha illacta ruhuangapacmi Jesucristoca Dios munashca shina, shuc cutinlla huiñaipac huañurca.

¹¹ Tucui curacunami, punzhanta animalta rupachishpa, Diosman cuncuna. Shina cacpipish, caicunaca jaicapi juchacunataca mana pichanchu.

¹² Jesucristoca pai quiquinllatac tucuipac juchacunamanta huiñaipac huañushpami, Diospac alli maquiman tiyarigrirca.

¹³ Chaipimi paita piñaccunata Dios paipac chaqui sarunapi churangacaman shuyacun.

¹⁴ Paica shuc cutinlla huañushpami, huiñaipac paipaclla caccunata jucha illacta ruhuarca.

¹⁵ Chaimanta Diospac Espíritu huillashpaca:

¹⁶ «Mandac Diosca: “Shamuc punzhacunapica, paicunahuan ari nishpami, ñuca mandashcacunata paicunapac shungupi churasha. Paicunapac yuyaipimi, quillcashca shinami churasha” ninmi.

¹⁷ Shinallatac: “Paicuna ima mana allita ruhuashpa juchallishcatapish, mana yuyarishachu” ninmi» nirca.

¹⁸ Chaimanta ñucanchic juchacunata perdonashca cacpica, juchamanta ashtahuan mana ofrendata cunachu.

Diosman cuchuyana cashcamanta

¹⁹ Cuyashca criccuna, cunanca Apunchic Jesucristopac yahuarmantaca Diospaclla chicanyachishca ucuman yaicui pudinchic.

²⁰ Jesucristo huañushpami, Diospaclla chicanyachishca ucuman yaicuna jarcashca pañota anchuchirca. Chashnami causaita cuc mushuc ñanta pascarca.

²¹ Apunchic Jesucristoca jahua pacha Diospac huasipimi jatun mandac cura can.

²² Chaimanta tucui shunguhuan crishpa, ñucanchic shungumanta millai yuyaicunata anchuchishpa, chuya yacuhuan chuyayashpa, Diospacman cuchuyashunchic.

²³ Dios pactachina cashcata crishpa, mana caita chaita yuyashpa shuyashunchiclla. Chai shuyacushcamantami shuccunaman huillacunchic.

²⁴ Caishuc chaishuc cuyaihuan ayudanacungapac allita ruhuana yuyaita cushunchic.

²⁵ Ama maijancuna shina tandanacunata saquishunchic. Chaipac randica, caishuc chaishuc tandanacushpa, Apunchic Jesús ñalla cutimuna cashcata yuyachinacushpa, ashtahuan catina yuyaita cushunchic.

Mana juchallina cashcamanta

²⁶ Cashcata nic huillashcata yachashca jahua juchata ruhuashpaca, quishpiringapacca imata mana cui pudinchicchu.

²⁷ Ashtahuanpish manchana taripana punzha, rupachishpa chingachic ninallami shuyacun. Chai ninaca Diosta mana cazuccunatami tucuchinga.

²⁸ Moisés mandashcata maijan mana cazucucta ishcai, mana cashpa quimsa ricuc tiyacpica, mana llaquishpami huañuchina can.

²⁹ ¡Ashtahuanpish Diospac Churita sarushpa, paipac jichashca yahuarta yangapi churashpa, Diospac cuyac Espirituta camishpa rimacca yalli llaquitami apanga! Chai yahuarmi mushuc ari ninacuita pactachin, shinallatac juchata pichan.

³⁰ Mandac Diosca: «Ñucami llaquichiccunataca llaquichisha. Ñucami paicuna japina cashcata cusha» ninmi. Shinallatacmi: «Ñuca huahuacunataca ñucami taripasha» ninmi. Chaitaca yachanguichicmi.

³¹ ¡Causac Diospac maquimanta urmanaca yalli llaquimi!

³² Ñaupa punzhacuna Dios yuyaita achicyachicpi, yalli llaquicunata apashcataca cancunallatac yachanguichicmi.

³³ Maijancunaca tucuipac burlashca, rimashcacunami carcanguichic. Maijancunaca chai llaquichishcacunahuan tandanacushpami, paicuna shina llaquita aparcanguichic.

³⁴ Carcelpi caccunamantaca yallita llaquirircanguichicmi. Cancuna jahua pachapi huiñai huiñaipac tucuimanta yalli allita charishcamantami ima charishcata quichucpipish, cushilla carcanguichic.

³⁵ Cancuna shuyacushcataca, amatac chingachinguichicchu. Chashna causashpami, sumac japinata japinguichic.

³⁶ Cancunaca llaquita apacushpapish mana piñarishpami, Diospac munaita pactachina canguichic. Chashnami pai cusha nicushcataca chasquinguichic.

³⁷ Dios quillcachishcapica: «Shamucca ñallami shamunga, mana unaiyangachu.

³⁸ Cashcata ruhuacca crishcallamantami causanga. Ashtahuanpish mana catictaca piñashami» ninmi.

³⁹ Ñucanchicca mana catinata saquishpa, llaquiman riccuna shinachu canchic, ashtahuanpish quishpiringapac Jesusta criccunami canchic.