HAGEO 1 - Dios Rimashcata Quillcashcami

Diospac huasita ruhuachun mandashcamanta

¹ Jatun mandac Darío ishcai huata, sucta quilla, shuc punzhata mandacucpimi, Mandac Diosca pai ima nishcata huillac Hageota Salatielpac churi Judá llactata mandac Zorobabelman, Josadacpac churi curacunata mandac Josueman huillachirca. Chashna huillachishpaca:

² «Tucuita Mandac Diosca: Cai gentecunaca: “Mandac Diospac huasita cutin ruhuana punzhacunaca manarac chayamunchu” nincunami» nirca.

³ Chaimanta Mandac Dios pai ima nishcata huillac Hageota huillachishpaca:

⁴ «¿Ñuca huasi llaquinayaita siricucpipish, cancuna sumac huasicunapi causana punzhachu shamushca?

⁵ Cancuna ima shina causacushcata alli yuyarichic. Tucuita Mandac Dios ñucami nini:

⁶ Cancunaca achcata tarpushpapish, ashallatami japinguichic. Micushpapish mana sacsanguichicchu. Yacuta ubiashpapish, yacunayaita mana pasachinguichicchu. Churarishpapish, mana cunuringuichicchu. Cullquimanta trabajac runaca lliqui mochilapimi cullquita huacaichin.

⁷ Cancuna ima shina causacushcata alli yuyarichic.

⁸ Urcumanta caspicunata apamushpa, ñuca huasita cutin shayachichic. Chashna ruhuacpimi, yallita cushicushpa, alli nishcapish casha. Chaitaca tucuita Mandac Dios ñucami nini.

⁹ Cancunaca achcata cosechanata munashpapish, ashallatami japinguichic. Cancunapac huasicunapi huacaichishcataca pucushpami tucui chingachisha. ¿Imamantatac chashna ruhuasha? Chaica, ñuca huasi llaquinayaita siricucpipish, cancunapac huasicunatarac sumacta allichishcamantami chashna ruhuasha.

¹⁰ Cancuna chashna ruhuashcamantami jahua pachapish tamyata mana ashtahuan cacharca. Allpapipish mana ashtahuan pucurcachu.

¹¹ Ñucami cai llactapica mana tamyachircani. Ñucami urcunamanpish, chagramanpish usyai punzhacunata cacharcani. Chaimantami trigopish, vinopish, aceitepish, tarpuna allpapish, gentecunapish, animalcunapish, gentecuna trabajashcacunapish tucui chingachirca» ninmi.

¹² Shina nicpimi, Salatielpac churi Zorobabelpish, Josadacpac churi curacunata mandac Josuepish, saquirishca gentecunapish Mandac Dios rimashcata uyarca. Chashnami Dios ima nishcata huillac Hageo huillashcata uyashpa, Mandac Diospac ñaupapi yallita mancharirca.

¹³ Chaimantami Dios ima nishcata huillac Hageo gentecunaman huillashpaca: Mandac Diosca: «Cancunahuanmi cani» ninmi nirca.

¹⁴ Mandac Diosmi Salatielpac churi Judá llactata mandac Zorobabelpac yuyaitapish, Josadacpac churi curacunata mandac Josuepac yuyaitapish, caishuc saquirishca gentecunapac yuyaitapish pascarca. Chaimantami tucuita Mandac Diospac huasitaca allichi callarirca.

¹⁵ Chaitaca jatun mandac Darío ishcai huata, sucta quilla, ishcai chunga chuscu punzhata mandacucpimi, allichic callarirca.