HABACUC 3 - Dios Rimashcata Quillcashcami

Habacuc Diosta mañashcamanta

¹ Dios ima nishcata huillac Habacucca llaquillata cantashpami, Diosta mañarca.

² Mandac Dioslla, can rimashcata uyashpaca mancharircanimi. Mandac Dioslla, can ruhuashcacunata ricushpa mana amirinimi. ¡Ñaupa huatacunapi ruhuashcata cunan punzhacunapi ricuchiyari! Can piñarishca cashpapish llaquiyari.

³ Diosca Temán llactamantami shamun. Jucha illac Diosca Parán urcumantami shamun. Paipac sumaimana achicca jahua pachatami tapan. Cai pachapica paita alabashcami jundan.

⁴ Paica achic nicuc luz shinami. Paipac maquimantaca relampa achicyachicmi llucshin. Chai chaupipica paipac fuerzami pacalla tiyacun.

⁵ Paipac ñaupataca huañuchic ungüimi rin. Paipac chaquimantaca rupacuc ninami llucshin.

⁶ Pai shayaricpica, cai pachami chucchun. Pai ricucpica, llactacunami manchan. Ñaupa huatacunapi tiyac urcucunapish tuñirinmi. Lomacunapish urmanmi. Paipac ñancunaca huiñaicamanmi.

⁷ Cusán llacta carpa huasicunaca llaquilla cactami ricuni. Madián llacta carpa huasicunapish chucchunmi.

⁸ Mandac Dioslla, ¿callpac yacucunahuanchu piñarircangui? ¿Canca jatun yacuhuanchu nina japiric shina piñarircangui? ¿Cambac caballocunapi, cambac mishana carretacunapi tiyarishpaca, mama cuchatachu llaquichigringui?

⁹ Cambac arcopish allichishcami. Flechacunapish huacaichishcami. Yacuhuanmi huaicu huaicuta ruhuarcangui.

¹⁰ Canta ricushpaca urcucunapish mancharircami, yacu jundashcapish yallircami. Manchana jatun jutcupish caparircami. Mama cuchapish jahuata alzarircami.

¹¹ Cambac flechacunaca achicyachinmi, cambac achic nicuc lanzapish ricurinmi, Intipish, quillapish shayarinmi.

¹² Canca yallita piñarishpami, cai pachataca sarurcangui, shuctac llactacunataca nina japiric shina piñarishpami sarunacurcangui.

¹³ Canca acllashca llactata cacharichingapac, aceitehuan cahuishca jatun mandacta quishpichingapacmi llucshircangui. Canta mana manchac runapac huasi catataca urmachircanguimi. Callari rumicuna ricuringacamanmi tucui urmachircangui.

¹⁴ Soldadocunataca paicunapac flechacunallahuantacmi huañuchircangui. Paicunaca piñarishpami acapana huaira shina caita chaita shic-huanata yuyarca. Paicuna imatapish mana charic runata pacalla llaquichic shinami, jatun tucushpa llaquichinata munarca.

¹⁵ Mama cucha jahuatami, caballocunapi puscuta shitashpa purircangui.

¹⁶ Chaita uyashpaca, ñuca shungu mancharcami. Rimacta uyashpaca, ñuca shimipish chucchurcami. Ñuca tullucunapish ismucuc shinami tucurca. Ñuca changacunapish chucchucurcami. Chashna cashpapish ñucanchicta llaquichiccunata llaquichi punzhatami ñucaca casilla shuyacuni.

¹⁷ Higo yuracuna mana sisacpipish, uvas yuracunapi grano mana tiyacpipish, olivos mana pucucpipish, allpacuna mana cucpipish, oveja manada mana tiyacpipish, vacacuna corralpi mana tiyacpipish,

¹⁸ ñucaca Mandac Dios-huanmi cushicusha. Quishpichic Mandac Dios-huanmi yallita cushicusha.

¹⁹ ¡Mandac Diosca ñuca jarcarina sinchi torre shinami! Paica ñuca chaquicunata tarugapac chaqui shinata ruhuashpami, jahua urcucunata purichinga.