HABACUC 2 - Dios Rimashcata Quillcashcami

¹ Cuidac runa shinami chaparacusha. Torre jahuapimi chapashpa shayacushalla. Ñuca caparishpa mañashcata uyangacamanmi chaparacushalla.

Habacucman Mandac Dios huillashcamanta

² Chaimantami Mandac Diosca: “Muscuipi shina ricurishcata rezanallata rumi tablacunapi quillcai.

³ Muscuipi shina ricushcaca tauca huatacunata mana pactashpapish, mana llullangachu, pactangatacmi. Mana utca pactacpipish chaparacuilla, pactangatacmi, mana unayangachu.

⁴ Millai shungu runaca jatun tucunllami. Ashtahuanpish cashcata ruhuac runaca crishcamantami causanga” nirca.

⁵ Jatun tucushca vino shinami llaquiman apan. Seol pascaric shinami imatapish mashcanga. Huañui shinami mana shaicunga. Shinallatac paipaclla cachunmi tucui llactacunata munan. Chashna jatun tucushca runaca mana causangachu.

⁶ ¿Manachu shuctac llactacuna yuyarina rimaicunahuan, paita burlashpa cantanga? Chai llactacunaca: “¡Aij, manapish quiquinpac cashcahuan mirachiccunalla! ¿Ima punzhacamantac prendacunata japishpa montonacungalla?” ningami.

⁷ Can llaquichishca gentecunaca cungaillami canta llaquichingapac jataringa. Paicunaca canta llaquichishpami can ima charishcacunata quichunga.

⁸ Tauca llactacunamanta imacunata quichushcamantami shuctac gentecunapish can ima charishcacunata quichunga. Huañuchishpa, yahuarta jichashpa llactacunata, pueblocunata quichushcamantami chai llactacunaca tandanacushpa, can charishcacunata quichushpa apanga.

⁹ ¡Canca ashtahuan charina yuyaihuanmi shuhuashpa huasipi jundachircangui! ¡Llaquimanta miticungapacmi huasitaca pipish mana chayaipac jahua altopi churangui! ¡Aij, imachari tucungui!

¹⁰ Achca gentecunata pandachishpami, canllatac pandarishcangui. Tucui chaicunata ruhuashpami, cambac huasitaca pingaipi churarcangui.

¹¹ Chaimantami pircashca rumipish, huasipi churashca vigapish cambac contra caparinga.

¹² ¡Canca gentecunata huañuchishpami pueblota shayachircangui! ¡Mana allita ruhuashpami pueblota callarichircangui! ¡Aij, imachari tucungui!

¹³ ¿Manachu tucuita Mandac Diosca gentecuna imata ruhuashcataca ninapi rupachic shina tucuchinga? Llactacunapi causaccuna imata ruhuashpaca yangami shaicunga.

¹⁴ Mama cucha yacuhuan junda cac shinami, cai pachapi causaccunaca Mandac Diospac poderta ricsina yuyaihuan canga.

¹⁵ ¡Canca ubiachishpami machachingui! ¡Vinohuan machachishpami pingaichingui! ¡Aij, imachari tucungui!

¹⁶ Canca alli nishca canapac randica, mana alli nishca pingaichishcami cangui. Canpish ubiashpa, lluchulla tucuiyari. Mandac Diospac alli lado maquipi tiyacuc vasomantami canmanca ubiachinga. Chashna ubiachishpami, can alli nishca runataca cumurichinga.

¹⁷ Líbano urcuta llaquichishcamanta, sacha animalcunata huañuchishcamanta, chaipi causaccunata huañuchishpa yahuarta jichashcamanta, paicunapac allpata shuhuashcamanta, pueblocunatapish, chaipi causaccunatapish shuhuashpa llaquichishcamantami cantapish llaqui japinga.

¹⁸ Artesano ruhuashca diosca, ¿imapactac valin? Yacuyachishpa ruhuashca diosca, ¿imapactac valin? Chai diosca llullamanmi apan. Imamanpish riccha, mana rimaric dioscunata ruhuacca, ¿ima shinatac chai dioscunapi shunguta churanga?

¹⁹ ¡Canca caspi diostami: “Ricchariyari” ningui! ¡Mana rimac rumi diostami: “Jatariyari” ningui! ¡Aij, imachari tucungui! ¿Chai diosca imatapish yachachi pudingachu? Chai diosca jahuallata curihuan, cullquihuan tapashcami. Samaitapish mana charinchu.

²⁰ Ashtahuanpish Mandac Diosca paipaclla chicanyachishca huasipimi causan. ¡Cai pachapi tucui causaccuna paipac ñaupapi upalla caichic!