HABACUC 1 - Dios Rimashcata Quillcashcami

¹ Dios ima nishcata huillac Habacucmi Dios huillashcata muscuipi shina ricurca.

² Mandac Dioslla, ¿ima horacamantac ñuca mañashcata mana uyagringui? ¿Ima horacamantac ama llaquichichu nishpa caparicushalla? ¿Imamantatac mana quishpichingui?

³ ¿Ima nishpatac mana allicunata ricuchingui? ¿Ima nishpatac llaquicunata ricuchun saquingui? Ñuca ñaupapica piñanacui, rimarinacui, macanacui, huañuchishpa tucuchinacuimi ricurin.

⁴ Mandashcacunataca pipish mana cazunchu. Allita ruhuanataca saruc shinami yangata ruhuan. Canta mana manchacca cashcata ruhuactami llaquichingapac caticun. Chaimantami cashcata ruhuana tiyanapac randica, mana alli ruhuashca ricurin.

Habacuc mañashcata Mandac Dios uyashcamanta

⁵ Mandac Diosca: «Shuctac llactacunata ricushpa manchaichic. Ñucaca cancuna causacui punzhacunapimi chai shina mancharinacunata ruhuasha. Chai ruhuashcata maijan huillacpipish, mana cringuichicchu.

⁶ Ñucaca caldeocunamanmi cancunata llaquichichun yuyaita cugrini. Paicunaca pitapish mana llaquic, tucui llactacunata purishpa, shuccunapac huasicunata quichuc runacunami.

⁷ Paicunaca yalli millai runacunami. Ima mandashcatapish mana cazushpa, quiquin munashcata ruhuashpami, jatun tucuncuna.

⁸ Paicunapac caballocunaca leopardocunatapish yalli callpac, amsata llucshic atuccunatapish yalli millaicunami canga. Caballopi ric soldadocunaca tandanacushpami huaicashpa carumanta shamunga. Paicunaca angacuna ima animalta japingapac jahuata shamuc shinami shamunga.

⁹ Tucui paicunami llaquichingapac shamunga. Ñaupata ricurashpa shamushpami tucuita manchachinga. Shinallatac tiyu allpata tandachic shinami prezu japinga.

¹⁰ Jatun mandaccunatapish, shuctac mandaccunatapish, burlashpa asishpami pingaichinga. Muyundita pircashca llactata ricushpaca asingacunami. Macanacuna pushtucunata ruhuashpami llactata quichunga.

¹¹ Chai quipaca acapana huaira shina yaicushpami, tucui tucuchinga. Paicunapac diosca fuerzami can» nirca.

Habacuc Mandac Diosta mañashcamanta

¹² Mandac Dioslla, jucha illac Dioslla, canca, ¿manachu imapish manarac tiyacpi, ña tiyarcangui? ¡Shina cashcamantaca ñucanchicca mana huañushunchu! Mandac Dioslla, llaquichichunmi Babilonia runacunataca caipi churarcangui. Jatun Rumi shina Dioslla, canca llaquichinpacmi paicunataca cacharcangui.

¹³ Canca jucha illac cashpami, millaitaca mana ricusha ningui. Ima mana allitapish mana ricusha ninguichu. ¿Ima nishpatac mana cazuccunataca ricucunguilla? ¿Ima nishpatac canta mana manchac runa cashcata ruhuac runata llaquichicucta ricucunguilla?

¹⁴ Canca runacunataca mama cuchapi tiyac challuacuna shina cachunmi saquingui. Llucashpa puric animalcuna shinatami mandac illacta saquingui.

¹⁵ Babilonia runacunaca anzuelohuanmi tucuita japinga. Linchita shitashpa, tandachishpami, yallita cushicushpa asinga.

¹⁶ Chaimantami paicunapac linchiman animaltapish, inciensotapish rupachinga. Chai linchihuanmi ima charinacunata yallita mirachirca. Shinallatac sumac micunatami micurca.

¹⁷ ¿Paicunaca chai shinachu llactacunata mana llaquishpa tucuchishpa caticungalla?