GÉNESIS 9 - Dios Rimashcata Quillcashcami

Dios Noehuan ari nishcamanta

¹ Diosca Noetapish, paipac churicunatapish bendiciashpaca: «Achca huahuacunayuc tucushpa, mirarishpa, tucui cai pachapi jundarichic.

² Cai pachapi tiyac tucui animalcunami manchashpa chucchunga. Volac animalcunapish, allpapi causacuc animalcunapish, mama cuchapi causac challuacunapish cancunapac maquipimi canga.

³ Tucui causaita charic animalcunatapish, verdinlla quihuatapish, llullu micunatapish cancuna micuchunmi saquini.

⁴ Aichataca ama yahuarndi micunguichicchu. Yahuarmi causaitaca cun.

⁵ Causaita cuc yahuarmantaca huañuchishcami canga. Maijan huañuchictaca huañuchishcami canga. Maijan animal huañuchicpica, chaitapish huañuchishcami canga.

⁶ Diosca pai shinatacmi runataca ruhuarca. Chaimanta maijan shuc runata huañuchictaca huañuchishcami canga.

⁷ Ashtahuanpish cancunaca achca mirashpa, achca tucushpa, cai pachapi jundaichiclla» nirca.

⁸ Dios Noetapish, paipac churicunatapish rimashpaca:

⁹ «Riquichic, canhuanpish, cancunapac huahua huahuacunahuanpish,

¹⁰ huambuc huasimanta llucshic animalcunahuanpish, volac animalcunahuanpish, sacha animalcunahuanpish, tucui cai pachapi causac animalcunahuanpish shuc ari ninacuitami ruhuagrini.

¹¹ Chaitaca pactachishatacmi. Cunanmantaca causaita chariccunataca manatac yacu juizhuhuanca tucuchishachu. Cutinca yacu juizhuca cai pachapica manatac tiyangachu» nirca.

¹² Chaimantami Diosca: «Ñucahuan, cancunahuanpish, cancunahuan cac causaita charic animalcunahuanpish huiñaicamanmi ari nishca señalta ruhuani.

¹³ Ñucaca cuichitami puyupi churani. Caimi ñucahuan, cai pachahuan ari nishca señal canga.

¹⁴ Cai pachaman ñuca puyuta cachacpica, ñuca churashca cuichitami ricunguichic.

¹⁵ Chaita ricushpami cancunahuanpish, tucui causaita charic animalcunahuanpish, ñuca ari nishcata yuyarisha. Cai pachapi tucui causaita chariccunataca yacu juizhuhuanca manatac tucuchishachu.

¹⁶ Ñuca puyupi cuichita ricushpaca, tucui cai pachapi causac gentecunahuanpish, animalcunahuanpish huiñaipac ari nishcatami yuyarisha» nirca.

¹⁷ Dios Noetaca: «Caimi cai pachapi causac runacunahuanpish, animalcunahuanpish ari nishcata ricuchic señal» nirca.

Noemantapish, paipac churicunamantapish

¹⁸ Huambuc huasimanta llucshic Noepac quimsa churicunaca Sem, Cam, Jafetmi carca. Cammi Canaanpac taitaca carca.

¹⁹ Caicunami Noepac quimsa churicunaca. Paicunamantami cutinllatac cai pachapica jundarimurca.

²⁰ Noé allpapi trabajai callarishpaca, uvastami tarpurca.

²¹ Chai uvas vinota ubiashpami Noeca machashpa, chai carpa huasi ucu pambapi lluchulla siricurca.

²² Chaipimi Canaanpac taita Camca paipac taita lluchulla siricucta ricushpa, canzhapi cac caishuc ishcai huauquicunaman huillangapac rirca.

²³ Shina huillacpimi, Sempish, Jafetpish churanata rigra jahuapi churashpa, huashaiman rishpa, paicunapac taita lluchulla cashcata catachirca. Paicunaca shucman tigrarishca cashpami, taita lluchulla cashcata mana ricurca.

²⁴ Noé maillacyashpaca paipac quipa churi Cam imata ruhuashcatami yachac chayarca.

²⁵ Chaimantami paica: «Canaán, mana alli nishcami cangui. Cambac huauquicunata serviccunamantapish yalli yanga servicmi cangui» nirca.

²⁶ Cutinllatac rimashpaca: «Ñucata Mandac Dioslla, ñuca churi Semca alli nishca cachun. Canaanca paita servic cachun.

²⁷ Diosca Jafettaca achcata mirachishpa, jatun llactata ruhuachun. Paipac aillucunaca Sem ruhuashca carpa huasicunapi causachun. Canaanca paita servic cachun» nirca.

²⁸ Yacu juizhu tiyashca quipaca Noeca quimsa patsac pichca chunga huatatami causarcarac.

²⁹ Noeca iscun patsac pichca chunga huatata causashpami huañurca.