GÉNESIS 8 - Dios Rimashcata Quillcashcami

Yacu juizhu tucurishcamanta

¹ Chai quipami, Diosca Noetapish, tucui animalcunatapish jatun huambuc huasipi cacta yuyarishpa, huairata cacharca. Chai huairami yacutaca ashancaman chaquichirca.

² Allpa ucumanta llucshic yacupish jahua pachamanta shamuc tamyapish pararircami.

³ Cai pacha yacuca ashancamanmi chaquirishpa catirca. Patsac pichca chunga punzhacamanca ashtahuanmi chaquirca.

⁴ Ña canchis quilla chunga canchis punzhapica huambuc huasica Ararat urcupimi saquirirca.

⁵ Yacuca chunganiqui quillacamanmi chaquirishpa catirca. Chai quilla callari punzhami ña jatun urcucuna ricurirca.

⁶ Chai quipa, chuscu chunga punzhapica Noeca pai ruhuashca huambuc huasi ventanata pascarcami.

⁷ Shina pascashpami, cuervota cacharca. Chai cuervoca cai allpapi yacu chaquingacamanmi huairapi caiman chaiman puricurcalla.

⁸ Shinallatac cai allpapi yacu chaquishcata alli yachangapacmi shuc palomata cacharirca.

⁹ Cai pachapi yacu tiyacpiracmi, chai palomaca maipi mana tiyarinata pudishpa, huambuc huasiman cutimurca. Shina cutimucpimi, Noeca chai palomata japishpa, yaicuchirca.

¹⁰ Canchis punzhapica Noeca cutinllatacmi palomata cacharirca.

¹¹ Amsayagricucpimi, palomaca picopi shuc uchilla olivos ramata apashca chayamurca. Chaita ricushpami, Noeca yacu chaquishpa caticushcata yachac chayarca.

¹² Chaimanta canchis punzhata shuyashpami, cutinllatac palomata cacharirca. Chashna cacharicpica, palomaca ña mana cutircachu.

¹³ Noé sucta patsac shuc huatayuc cacpi, callari quilla, punta punzhapimi yacuca chaquirca. Chaimantami Noeca huambuc huasi catata anchuchishpa, ña chaquishca cashcata ricurca.

¹⁴ Ishcai quilla, ishcai chunga canchis punzha tucucpica, allpaca ña chaquishcami carca.

¹⁵ Chaimantami Diosca Noetaca:

¹⁶ «Cambac huarmindi, churicunandi nueracunandi huambuc huasimanta llucshi.

¹⁷ Canhuan cac tucuilaya animalcunatapish llucchi. Volac animalcunatapish, sacha animalcunatapish, pambata aisarishpa puric animalcunatapish, tucui cai pachata rishpa, mirarishpa achca tucuchun llucchi» nirca.

¹⁸ Shina nicpimi, Noeca paipac huarmindi, churicunandi, nueracunandi huambuc huasimanta llucshirca.

¹⁹ Tucui animalcunapish llucshircami. Chaica volac animalcunapish, pambata aisarishpa puric animalcunapish, chaipurami huambuc huasimanta llucshirca.

²⁰ Chai quipami Noeca Mandac Diosman altarta ruhuarca. Chaipimi Mandac Diosman cuna animalcunamantapish, volac animalcunamantapish shucta Mandac Diosman cushpa rupachirca.

²¹ Shina rupachicpi, Mandac Diosman mishquilla ashnashpa chayacpimi paica: «Runapac juchamantaca cai pachataca jaicapi mana llaquichishachu. Runaca huambramanta pacha millaita yuyacunllami. Shinallatac mana cunan tucuchishca shina, tucui causaita charic animalcunataca tucuchishachu.

²² Cai pacha tucuringacamanca tarpushcapish, tamyapish, usyaipish, chiripish, cunucpish, tutapish, punzhapish manatac tucuringachu» nirca.