GÉNESIS 7 - Dios Rimashcata Quillcashcami

Dios yacu juizhuta cachashcamanta

¹ Mandac Diosca Noetaca: «Cai tucui gentecunamantaca canllami allita ruhuashpa causashcangui. Chaimanta canpish, tucui familiacunapish huambuc huasiman yaicuichic.

² Shinallatac micuna animalcunataca canchis carita, canchis huarmita yaicuchingui. Cutin mana micuna animalcunataca shuc carita, shuc huarmita yaicuchingui.

³ Shinallatac jahuata volac animalcunatapish canchis carita, canchis huarmita chaipurallata yaicuchingui. Chashna ruhuacpimi, cai pachapica mirarishpa causanga.

⁴ Canchis punzha quipaca chuscu chunga punzhata, chuscu chunga tutatami yallita tamyachigrini. Chashna tamyachishpami, tucui cai pachapi ñuca ruhuashca causaita chariccunata tucuchisha» nirca.

⁵ Shina nicpica, Noeca Mandac Dios nishca shinami tucuita ruhuarca.

⁶ Cai pachapi yacu juizhu tiyacpica, Noeca sucta patsac huatayucmi carca.

⁷ Noeca yacu juizhupi mana huañungapacmi paipac huarmindi, huahuacunandi, nueracunandi huambuc huasiman yaicurca.

⁸ Shinallatac Noeca Diosman cuna animalcunatapish, mana Diosman cuna animalcunatapish, volac animalcunatapish, pambata aisarishpa puric animalcunatapish,

⁹ ishcai ishcaitami shuc carita, shuc huarmita Dios mandashca shina huambuc huasiman yaicuchirca.

¹⁰ Canchis punzha tucucpimi, yacu juizhuca cai pachapica callarirca.

¹¹ Noeca sucta patsac huatayuc cacpi, chai huata callarishca ishcai quilla, chunga canchisniqui punzhapimi allpa ucumantapish yacuca timbushpa llucshirca. Jahua pachamantapish yacu punguta pascac shinami tamyai callarirca.

¹² Chuscu chunga punzha, chuscu chunga tutami cai allpapica tamyacurca.

¹³ Tamyai callari punzhallatacmi Noeca Sem, Cam, Jafet churicunandi, paipac huarmindi, quimsa nueracunandi huambuc huasiman yaicurca.

¹⁴ Paicunapish, sacha animalcunapish, charina animalcunapish, pambata aisarishpa puric animalcunapish, volac animalcunapish chaipurallami yaicurca.

¹⁵ Noehuanca tucui causaita charic animalcunami ishcai ishcai huambuc huasiman yaicurca.

¹⁶ Dios nishca shinami Noehuanca shucca cari, shucca huarmi animalcuna yaicurca. Chai quipaca Diosllatacmi huambuc huasi pungutaca huichcarca.

¹⁷ Yacu juizhuca chuscu chunga punzhatami carca. Yacu ña jundamushpaca, huambuc huasiman chayashpami, chai huasita huambuchishpa catirca.

¹⁸ Shinami yacuca ashtahuan jundarishpa, tucui allpata ucuyachishpa catirca. Cutin huambuc huasica huambushpami catirca.

¹⁹ Yacuca tucui cai pachapi jundashpami, ashtahuan jatun urcucunacaman tucui ucuyachirca.

²⁰ Yacuca jatun urcumanta canchis metro yallimi jundarca.

²¹ Chashna tamyashpa, tucui cai pachapi yacu jundacpimi, gentecunapish, volac animalcunapish, charina animalcunapish, sacha animalcunapish, pambata aisarishpa puric animalcunapish tucui huañurca.

²² Samaita aisashpa allpapi causaccunaca tucuimi huañurca.

²³ Shinami gentecunapish, sacha animalcunapish, pambata aisarishpa puric animalcunapish, jahuata volac animalcunapish huañurca. Shina cacpipish, huambuc huasiman Noehuan yaicuccunaca mana huañurcachu.

²⁴ Yacuca patsac pichca chunga punzhacamanmi cai pacha junda tiyacurcalla.