GÉNESIS 50 - Dios Rimashcata Quillcashcami

¹ Taita Jacobo huañucpica, Joseca paipac taitata ucllarishpami, huacashpa mucharca.

² Quipaca paita serviccunatami paipac taita Israelpac cuerpo ama ismuchun, jambichun mandarca. Chashna mandacpica jambircacunami.

³ Jambinaca ima shina ruhuana cashca shinallatacmi chuscu chunga punzhapi jambinata tucurirca. Egipto runacunaca taita Israel huañushcamantaca canchis chunga punzhacamanmi sharpa churanahuan carca.

⁴ Duelo cana punzhacuna tucuricpi, Joseca Faraonpac huasipi causaccunataca: —Ñuca cancunapac ñahuipi alli ricurishca cacpica, Faraontaca:

⁵ “Ñuca taita huañugricushpaca: ‘Canaán llactapi ñuca allichishca enterrana jutcupi enterrangui’ nishpa, ñucataca Diospac shutipi ari nichirca. Cunanca ñuca taitata enterragrichun cachai. Ña enterrashpaca cutishallami” ninmi nishpa cui— nirca.

⁶ Shina nicpimi Faraonca: —Cambac taita ari nichishca shinallatac paita enterrangapac rilla— nirca.

⁷ José paipac taitata enterrangapac ricpica, Faraonta serviccunapish, Faraonpac huasipi mandaccunapish, Egipto llactapi mandaccunapish,

⁸ Josepac familiacunapish, huauquicunapish, Jacobopac familiacunapish paihuanmi rirca. Gosén llactapica huahuacuna, shinallatac animalcunallami saquirirca.

⁹ Chashnami achca gentecuna caballopi, carretacunapi rirca.

¹⁰ Jordán yacu chimba ladopi cac Atad nishca trillana pambaman chayashpaca tucuilla tandanacushpami, llaquilla huacarca. Joseca paipac taita huañushcamantami canchis punzhacaman churashca llaquilla carca.

¹¹ Chaimantami Canaán llactapi causaccuna ricushpaca: «Chai Atad nishca trillana pambapimi Egipto runacuna llaquilla huacacun» nirca. Chaimantami chai pambataca Abel-mizraimta shutichirca. Chaica, Jordán yacu chimba ladopimi carca.

¹² Jacobopac churicunaca paipac taita imata nishca shinallatacmi ruhuarca.

¹³ Canaán llactaman apashpami, Macpela pambapi tiyac jutcupi enterrarca. Chai allpataca Abrahammi paicuna enterraringapac heteocunapuramanta Efronman randishca carca. Chai allpaca Mamremanta inti llucshina ladomanmi saquirin.

¹⁴ Paipac taita Jacobota enterrashpaca, Joseca paipac huauquicunandi, shinallatac tucui paihuan ric gentecunandimi Egiptoman cutirca.

José huañushcamanta

¹⁵ Josepac huauquicunaca paicunapac taita huañucpica: —Joseca, ñucanchic tucui mana allita ruhuashpa, paita llaquichishcamantaca ñucanchictapish llaquichingami —ninacurcami.

¹⁶ Chaimantami paicuna Joseman tapuchun cachashpaca: —Cambac taita manarac huañushpaca:

¹⁷ “Cambac huauquicuna canta llaquichishpa juchallishcataca perdonachun” ningui. Cantaca llaquichircatacmi. Cunanca, cambac taitapac Diosta serviccuna mana allita ruhuashcata perdonai ningui— nirca. Chashna nicpica, Joseca huacarcami.

¹⁸ Cutin Josepac huauquicunapish paipacman chayashpa, paipac ñaupapi pambacaman cumurishpaca: —Cunanca, canta servingapacmi caipi canchic— nirca.

¹⁹ Chashna nicpimi Joseca: —Ama manchaichicchu. Ñuca cancunata llaquichingapacca, ¿Dioschu cani, imtacyari?

²⁰ Cancunaca ñucata llaquichinatami yuyarcanguichic. Ashtahuanpish Diosmi ñucanchicpac allipac chashnaca ruhuachirca. Chaitaca cunanmi ricucunchic. Paica achca gentecunaman causaita cungapacmi chashnaca ruhuarca.

²¹ Chaimanta ama manchaichicchu, ñucami cancunamanpish, cancunapac huahuacunamanpish micunata carasha— nirca. José paipac huauquicunata chashna sumacta rimacpimi, paicunapac shungupish cushicurca.

²² Joseca Egiptomi paipac taitapac familiahuan causarca. Joseca patsac chunga huatatami causarca.

²³ Chaimantami Efrainpac churicuna quimsa miraicaman mirashcata ricsirca. Chashnallatac Manasespac churi Maquirpac huahuacunapish paipac maquipimi huiñarca.

²⁴ Chai quipaca Joseca paipac huauquicunataca: —Ñucaca ñallami huañusha. Shina cacpipish, Dios shamushpami, cai llactamanta llucchishpa Abrahamman, Isaacman, Jacoboman cungapac ari nishca allpaman pushanga— nirca.

²⁵ Joseca taita Israelpac churicunataca: —Dios shamushpaca, cancunataca pushangatacmi. Chashna pushacpica, ñuca tullucunatapish apanguichic— nishpami, Diospac shutipi ari nichirca.

²⁶ Joseca patsac chunga huatayuc cashpami, Egiptopi huañurca. Paipac cuerpotaca ama ismuchunmi jambicunahuan jambishpa, ataudpi churarca.