GÉNESIS 5 - Dios Rimashcata Quillcashcami

Adanpac huahua huahuacunamanta

¹ Caicunami Adanpac huahua huahuacunapac shuticunaca. Diosca runata ruhuashpaca, pai shinatami ruhuarca.

² Diosca shuc carita, shuc huarmita ruhuashpami bendiciashpa, chai punzhallatac paicunataca Runata shutichirca.

³ Adanca patsac quimsa chunga huatayuc cashpami, pai shinatac shuc churita charirca. Paitaca Settami shutichirca.

⁴ Adán Setta charishca quipaca pusac patsac huatata causashpami churicunatapish, ushicunatapish charirca.

⁵ Adanca iscun patsac quimsa chunga huatata causashpami huañurca.

⁶ Setca patsac pichca huatayuc cashpami, Enós churita charirca.

⁷ Setca Enós churita charishca quipaca pusac patsac huatata causashpami churicunatapish, ushicunatapish charirca.

⁸ Setca iscun patsac chunga ishcai huatata causashpami huañurca.

⁹ Enosca iscun chunga huatayuc cashpami, Cainán churita charirca.

¹⁰ Enosca Cainán churita charishca quipaca pusac patsac chunga pichca huatata causashpami churicunatapish, ushicunatapish charirca.

¹¹ Enosca iscun patsac pichca huatata causashpami huañurca.

¹² Cainanca canchis chunga huatayuc cashpami, Mahalaleel churita charirca.

¹³ Cainanca Mahalaleel churita charishca quipaca pusac patsac chuscu chunga huatata causashpami churicunatapish, ushicunatapish charirca.

¹⁴ Cainanca iscun patsac chunga huatata causashpami huañurca.

¹⁵ Mahalaleelca sucta chunga pichca huatayuc cashpami, Jared churita charirca.

¹⁶ Mahalaleelca Jared churita charishca quipaca pusac patsac quimsa chunga huatata causashpami churicunatapish, ushicunatapish charirca.

¹⁷ Mahalaleelca pusac patsac iscun chunga pichca huatata causashpami huañurca.

¹⁸ Jaredca patsac sucta chunga ishcai huatayuc cashpami, Enoc churita charirca.

¹⁹ Jaredca Enoc churita charishca quipaca pusac patsac huatata causashpami churicunatapish, ushicunatapish charirca.

²⁰ Jaredca iscun patsac sucta chunga ishcai huatata causashpami huañurca.

²¹ Enocca sucta chunga pichca huatayuc cashpami, Matusalén churita charirca.

²² Enocca Matusalén churita charishca quipaca Dios munashca shinami causarca. Shinallatac quimsa patsac huatata causashpami churicunatapish, ushicunatapish charirca.

²³ Enocca quimsa patsac sucta chunga pichca huatatami causarca.

²⁴ Enocca Dios munashca shinami causarca. Chaimantami Dios apacpi chingarirca.

²⁵ Matusalenca patsac pusac chunga canchis huatayuc cashpami, Lamec churita charirca.

²⁶ Matusalenca Lamec churita charishca quipaca canchis patsac pusac chunga ishcai huatata causashpami churicunatapish, ushicunatapish charirca.

²⁷ Matusalenca iscun patsac sucta chunga iscun huatata causashpami huañurca.

²⁸ Lamecca patsac pusac chunga ishcai huatayuc cashpami, shuc churita charirca.

²⁹ Chai huahuataca: «Dios allpata mana alli nishcamanta allpapi yalli ñucanchic rigracunahuan sinchita trabajacucpimi, samachinga» nishpami Noeta shutichirca.

³⁰ Lamecca Noé churita charishca quipaca pichca patsac iscun chunga pichca huatata causashpami churicunatapish, ushicunatapish charirca.

³¹ Lamecca canchis patsac canchis chunga canchis huatata causashpami huañurca.

³² Noeca pichca patsac huatayuc cashpami, Sem, Cam shinallatac Jafet churicunata charirca.