GÉNESIS 49 - Dios Rimashcata Quillcashcami

Jacobo paipac churicuna ima tucuna cashcata huillashcamanta

¹ Jacobo paipac churicunata cayashpaca: «Tandanacumuichic, cancuna quipaman ima tucuna cashcata huillasha.

² Jacobopac churicuna cuchuyashpa, cancunapac taita Israelta uyaichic.

³ Rubén, canmi ñuca punta churi cangui. Canca ñuca huambra fuerzahuan charishca churimi cangui. Canmi punta alli nishcapish, sinchi mandacpish cangui.

⁴ Canca yacu callpacuc shina, mana jarcaric cashpami, ñuca sueñuna camapi, ñuca caishuc huarmihuan sueñushpa, mana allita ruhuarcangui. Chaimanta ña mana punta churichu cangui.

⁵ Simeonpish, Levipish huauquindimi huañuchic macanacuna shina, millai canguichic.

⁶ Ñuca shungupica cancuna parlanacushcataca mana chasquishachu. Cancunaca yallita piñarishpami, gentecunata huañuchircanguichic. Huagracunatapish piñallamantami chaquita paquinacurcanguichic.

⁷ Cancuna piñarishcamantaca mana alli nishcami canguichic. Cancunaca Jacobopac familiamanta chicanyachishcami canguichic. Israelpuramantapish caita chaita rishpami causanguichic.

⁸ Judá, cambac huauquicunami alli ninga. Canta piñaccunataca cungapi japishpami atingui. Cambac huauquicunallatacmi cambac ñaupapi cumuringa.

⁹ Ñuca huahua Judalla, canca huahua león shinami cangui. Micushpaca jatun león shinami, aicha cuchullapitac sirirircangui. Chaipica, ¿pitac chayaringayari?

¹⁰ Judá, cambac mandana varataca pi mana quichungachu. Varataca chasquingacamanmi charicunguilla. Cantaca tucui gentecunami cazunga.

¹¹ Mama burropac huahua cari burrotaca uvas chagrapimi huatanga. Paipac churanataca vinopimi tacshanga. Pucanlla uvasta capishca yacupimi jahualla churanataca tacshanga.

¹² Paipac ñahuica vino colormi canga. Quiruca leche shina, yuranllami canga.

¹³ Zabulón mama cucha patapimi causangui. Cambac llactaca barcocuna shayanapimi canga. Cambac allpaca Sidoncamanmi canga.

¹⁴ Isacar, canca sinchi aparic burro corralpi siricuc shinami cangui.

¹⁵ Pai siricuc pushtu sumac cacpi, chai allpapish alli cacpimi, paipac lomotaca aparingapac ricuchirca. Chaipimi servishpa causasha ninga.

¹⁶ Dan, canca Israel aillu shinami, quiquin gentecunata mandashpa causangui.

¹⁷ Ñan ladopi cac culebra shinami cangui. Caballota chaquipi canishpami, caballopi ricta huashaiman urmachingui.

¹⁸ ¡Mandac Dioslla, can quishpichichunmi shuyacuni!

¹⁹ Gad, cantaca soldadocunami llaquichinga. Shina llaquichicpipish, quipata cungailla rishpami llaquichingui.

²⁰ Aser, canca jatun mandacpac micuna shina sumac micunatami charingui.

²¹ Neftalí, canca taruga shinami puringui. Taruga shinami sumacta huacangui.

²² Joseca yacu ladopi huiñashca achca granota yura shinami cangui. Ramacuna pirca jahuata ric shinami cangui.

²³ Paitaca piñashpami, flechacunahuan shitashpa llaquichirca.

²⁴ Paipac maquicunaca mana shaicushpami flechacunata charicurca. Rigracunapish sinchimi carca. Jacobopac imatapish ruhuaclla Diosmi chashna sinchita ruhuarca. Israelcunata michic sinchi Rumi shina Diosmi cuidacurca.

²⁵ Cambac taitapac Diosca ayudangami. Imatapish ruhuaclla Diosmi jahua pachamanta tamyachishpa, mama cuchamanta yacu cachashpa, achca huahuacunayucta ruhuashpa bendicianga.

²⁶ Ñaupa ñuca taita bendiciashcata yallimi, cambac taitaca bendicianga. Cambac bendicionca huiñaita tiyac jatun urcucaman shinami cambac jahuapi canga. Huauquicunamanta chicanyashca cashcamantami chai bendicionca Josepac canga.

²⁷ Benjamín, canca tutamanta huañuchishpa, puchutaca chishita raquic, piña atuc shinami cangui» nirca.

²⁸ Paicunaca taita Israelpac chunga ishcai aillucunami. Paicunatami shucllancaman bendiciashpa chashna nirca.

Jacobo huañushcamanta

²⁹ Chaimantami Jacoboca paipac churicunataca: «Ñucaca huañunallami cani. Ña huañucpica, ñuca ñaupa taitacuna enterrashca jutcullapitac enterranguichic. Paicunataca heteocunapura Efronpac allpapimi enterrarca.

³⁰ Chai allpataca Abrahammi tucui paipac familiacunata enterrangapac Macpela pamba jutcucunandi heteocunapuramanta Efronman randirca. Chai allpaca Canaán llactapi cac Mamremanta chimba ladopimi.

³¹ Chaipimi Abrahamtapish, paipac huarmi Saratapish, Isaactapish, paipac huarmi Rebecatapish enterrarca. Chaillapitacmi Leatapish enterrarcani.

³² Chai allpataca chaipi tiyac jutcucunandimi Hetpac churicunaman randirca» nirca.

³³ Jacobo tucui paipac churicunata mandashpaca, cutin camapi siririshpami, changacunata tandashpa, ñaupa taitacunahuan tandanacugrirca.