GÉNESIS 48 - Dios Rimashcata Quillcashcami

Efraintapish, Manasestapish bendiciashcamanta

¹ Asha punzhacuna quipa Josemanca: “Cambac taita Jacoboca ungushcami” nishpami huillarca. Chaita uyashpami, Joseca paipac ishcai churi Efraintapish, Manasestapish pushashpa, ricungapac rirca.

² Chaimantami Jacobomanca: —Cambac churi Josemi canta ricungapac shamushca— nishpa huillarca. Chashna huillacpimi, Jacoboca sinchicushpa jatarishpa, camallapitac tiyarirca.

³ Shina tiyarishpami Josetaca: —Canaán llactapi tiyac Luz llactapi ricuric imatapish ruhuaclla Dios ñucata bendiciashpaca:

⁴ “Riqui, ñucami achca huahuacunayucta ruhuashpa, cantaca tucui llactacunapac sapita shina ruhuani. Cambac huahua huahuacunamanpish huiñaipacmi cai allpataca cusha” nirca.

⁵ Chaica, ñuca manarac cai Egipto llactapi canhuan causangapac shamucpi, cai llactapi huacharishca ishcai churi Efrainpish, Manasespish ñuca quiquin churicunami. Paicunaca ñuca churi Rubén, Simeón shinallatacmi ñuca churicuna can.

⁶ Paicunapac quipata charishca churicunami cambacca canga. Efrainpac, Manasespac huauquicuna cashcamantami herenciataca japinga.

⁷ Cambac mama Raquelca ñuca Padan-aram llactamanta shamucucpimi, Efrataman chayana Canaanpi huañurca. Paitaca Efrataman rina ñanllapitacmi enterrarcani. Chai pushtuca Belenmi— nirca.

⁸ Taita Israel Josepac huahuacunata ricushpaca: —¿Paicunaca picunatac?— nircami.

⁹ Shina nicpimi, Joseca paipac taitataca: —Paicunaca cai Egiptopi ñucaman Dios cushca churicunami— nirca. Shina nicpimi, paipac taitaca: —Paicunata bendiciangapac ñuca cuchuman cuchuyachi— nirca.

¹⁰ Taita Israelca yallita yuyac cashpami ñahuipish mana alli ricuc carca. José paipac churicunata chayachicpimi, ucllashpa mucharca.

¹¹ Chaipimi taita Israelca Josetaca: —Cambac ñahuitaca ña mana ashtahuan ricushachu yuyarcanimi. Shina cacpipish, Diosmari cambac churicunatapish ricuchun munashca— nirca.

¹² Joseca ishcai churicunata taitapac changamanta anchuchishpami, pambacaman cumurirca.

¹³ Chaimantami Joseca Efraintaca paipac alli maquihuan, cutin Manasestaca paipac lluqui maquihuan japishpa, taita Israelpacman chayachirca. Shinami Efrainca taita Israelpac lluqui maquiman, cutin Manasesca alli maquimanmi saquirirca.

¹⁴ Taita Israelca quipa churi cacpipish, paipac alli maquitaca Efrainpac uma jahuapimi churarca. Cutin punta churi cacpipish, paipac lluqui maquitaca Manasespac uma jahuapimi churarca.

¹⁵ Shina churashpa Joseta bendiciashpaca: «Taita Abrahampac, Isaacpac Dioslla, cambac ñaupapimi paicunaca purirca. Ñucatapish huacharishcamanta cunan punzhacaman huacaichic Dios,

¹⁶ ñucata mana allimanta cuidac ángel cai huambracunataca bendiciachun. Paicunamanta ñuca shutitapish, taita Abrahampac, Isaacpac shutitapish huiñaita yuyarichun. Achca huahuayuc tucushpa, cai allpapi jundarichun» nircami.

¹⁷ Shina paipac taita alli maquita Efrainpac umapi churacpica, Josemanca mana alli ricurircachu. Chaimantami Joseca paipac taitapac maquitaca Efrainpac umamanta anchuchishpa, Manasespac uma jahuapi churashpa,

¹⁸ paipac taitataca: —Mana taitito, mana chashnachu, paimi punta churi. Cambac alli maquitaca paipac uma jahuapi churai— nirca.

¹⁹ Chaimantami taitaca: —¡Huahua, ñucaca yachanillatacmi! Manasespish tucuita yalli jatun llactami tucunga. Shina cacpipish, paipac quipa huauquimi punta huauquita atishpa, ashtahuan jatun nishca canga. Paipac huahuacunaca achcata mirarishpami, jatun llactacuna tucunga— nishpami, mana chashna churasha nirca.

²⁰ Chai punzhapi Jacobo bendiciashpaca: —Israelcuna paicunapac shutipi bendiciashpaca: “Efrainta shina, Manasesta shina Dios bendiciachun” nishpami bendicianga— nirca. Chashna nishpami, Efraintaca Manasespac ñaupapi churarca.

²¹ Quipaca taita Israelca Josetaca: —Ñucaca ña huañunallami cani. Shina cacpipish, Diosca cancunahuanmi. Paimi cancunataca, cancunapac ñaupa taitapac llactaman cutin pushanga.

²² Ñuca espadahuan, arcohuan macanacushpa, amorreocunamanta quichushca Siquem allpataca canmanmi caishuc huauquicunamanta yallita cusha— nirca.