GÉNESIS 46 - Dios Rimashcata Quillcashcami

Jacobo paipac familiacunandi Egiptopi causagrishcamanta

¹ Shinami taita Israelca tucui imalla charishcacunata pushashpa, Beersebaman chayarca. Chaipimi paipac taita Isaacpac Diosman animalta cushpa rupachirca.

² Chaipimi Diosca Israelman tuta muscuipi shina ricurishpaca: —Jacobo, Jacobo— nirca. Shina nicpimi Jacoboca: —Caipimi cani— nirca.

³ Chashna nicpimi Diosca: —Ñucaca Diosmi cani, cambac taitapac Diosmi cani. Egipto llactapimi cambac huahua huahuacunamantaca jatun llactata ruhuasha. Chaimanta ama manchashpa, chaiman rilla.

⁴ Ñucami cancunahuanca Egipto llactaman urai risha, shinallatac ñucallatacmi caiman cutichimusha. Can huañucpica, Josemi cambac ladopi canga— nirca.

⁵ Chai quipami Jacoboca Beersebamanta ringapac jatarirca. Paipac churicunami Faraón cachashca carretacunapi taita Jacobotapish, paicunapac huahuacunatapish, huarmicunatapish tiyachishpa pusharcacuna.

⁶ Paicunapac huagracunatapish, Canaán llactapi imalla charishcacunatapish apashpami, Jacoboca paipac huahua huahuacunandi Egiptoman rirca.

⁷ Paipac tucui huahua huahuacunata pushashpa, churicunandi, ushicunandi, nietocunandi, nietacunandimi Egipto llactaman rirca.

⁸ Egipto llactaman yaicuc Israelpac churicunaca: Punta churica Rubenmi carca.

⁹ Rubenpac churicunaca: Hanoc, Falú, Hezrón shinallatac Carmimi carca.

¹⁰ Simeonpac churicunaca: Jemuel, Jamín, Ohad, Jaquín, Zohar shinallatac cananea huarmipi charishca Saulmi carca.

¹¹ Levipac churicunaca: Gersón, Cohat, Merarimi carca.

¹² Judapac churicunaca: Er, Onán, Sela, Fares, Zarami carca. Shinallatac Er, Onanca Canaán llactapimi huañurca. Farespac churicunaca: Hezrón, Hamulmi carca.

¹³ Isacarpac churicunaca: Tola, Fúa, Job, Simronmi carca.

¹⁴ Zabulonpac churicunaca: Sered, Elón, Jahleelmi carca.

¹⁵ Paicunami Padan-aram llactapi causacushpa, Jacobo Lea huarmipi charishca huahuacunaca. Shinallatac Dina ushitapish charircami. Tucui churicunandi, ushicunandica quimsa chunga quimsami carca.

¹⁶ Gadpac churicunaca: Zifión, Hagui, Ezbón, Suni, Eri, Arodi, Arelimi carca.

¹⁷ Aserpac churicunaca: Imna, Isúa, Isúi, Beriami carca. Paicunapac panica Serami carca. Beriapac churicunaca: Heber, Malquielmi carca.

¹⁸ Paicunami Jacobo Zilpa huarmipi charishca huahuacunaca carca. Zilpataca Labanmi paipac ushi Leata servichun curca. Chai huarmipac huahuacunata yupacpica, chunga suctami carca.

¹⁹ Jacobopac huarmi Raquelpac huahuacunaca: José, Benjaminmi carca.

²⁰ Joseca Egiptopi causacushpami, Asenat huarmipi Manasés, Efraín churicunata charirca. Asenatca On llactapi causac Potiferapac ushimi carca.

²¹ Benjaminpac huahuacunaca: Bela, Bequer, Asbel, Gera, Naamán, Ehi, Ros, Mupim, Hupim, Ardmi.

²² Paicunami Jacobo Raquel huarmipi charishca huahuacunaca. Tucui paicunaca chunga chuscumi carca.

²³ Danca Husim churitami charirca.

²⁴ Neftalipac churicunaca: Jahzeel, Guni, Jezer, Silemmi carca.

²⁵ Labán paipac ushi Raquelman servichun cushca Bilha huarmipi Jacobo charishca huahuacunaca canchismi carca.

²⁶ Jacobomanta mirarishca tucui churicunahuanmi Egiptoman rirca. Paipac churicunapac huarmicunata mana yupashca, tucui gentecunaca sucta chunga suctami rirca.

²⁷ Egipto llactapi huacharishca Josepac churicunaca ishcaimi carca. Paicunandi tandachicpica, Jacobopac huasi ucupuraca canchis chungami Egiptoman carca.

²⁸ Jacoboca Gosén llactapi José tupac shamuchunmi Judata ñaupachishpa cacharca. Paicunaca Gosén llactamanmi chayarca.

²⁹ Chaita yachashpami, Joseca paipac carretata allichishpa, Gosén llactapi paipac taita Jacobota tupangapac rirca. Paipac taitapac ñaupapi ricurishpaca, cungapi ucllarishpami, unaicaman huacarca.

³⁰ Shina huacacucpimi, taita Israelca Josetaca: —Can causacushcataca ñuca ñahuihuanmi ricuni, cunanca ña huañunallami cani— nirca.

³¹ Shina nicpimi, Joseca paipac huauquicunatapish, paipac taitapac huasi ucu familiatapish rimashpaca: —Faraonpacmanmi rini, chaiman chayashpaca: “Canaanpi causac ñuca huauquicunapish, ñuca taitapac huasi ucu familiapishmi ñucahuan causangapac shamushca.

³² Paicunaca oveja michiccunami. Chaimantami ovejacunatapish, vacacunatapish, tucui ima charishcacunatapish pushashpa shamushca” nishpami huillasha.

³³ Faraón cancunata cayashpa: “¿Imatac ruhuashpa causaccunata canguichic?” nicpica,

³⁴ cancunaca: “Canta servic ñucanchicca, ñucanchic ñaupa taitacuna shinallatac huambramanta pacha animalcunata michishpa causaccunami canchic” ninguichic. Shinami Gosén llactapi causai pudinguichic. Egipto runacunaca tucui ovejata michiccunataca millanayachishpa piñancunami— nirca.