GÉNESIS 45 - Dios Rimashcata Quillcashcami

Paipac huauquicuna ricsichun José saquishcamanta

¹ Joseca paipac ladopi caccunapac ñaupapi huacanayaihuan mana jarcari pudishpami, paita serviccunata caparishpaca: —Ñucapac ñaupamanta tucui canzhaman llucshichic— nirca. Chashna tucui canzhaman llucshicpimi, Joseca paicunapac huauqui cashcata ricsichirca.

² Chashna ricsichishpami, Joseca caparishpa huacai callarirca. Chaitaca Egipto runacunapish, Faraonpac huasipi causaccunapish uyarcami.

³ Joseca paipac huauquicunataca: —Ñucaca Josemi cani. Ñuca taitaca, ¿causacunracchu?— nirca. Chashna nicpica, paicunaca upayashpa, imatapish mana ni pudircacunachu.

⁴ Chashna cacpimi Joseca: —Ñucapacman cuchuyaichic— nirca. Shina cuchuyacpimi paica: —Ñucaca cancuna Egiptoman catushca, cancunapac huauqui Josemi cani.

⁵ Cunanca, ama llaquirichicchu. Caiman catushpa cachashcamantapish ama shungupi nanarichicchu. Mana cancunapac munaimantachu cacharcanguichic, ashtahuanpish Diosmi cancuna ama yarcaihuan huañuchun, ñaupachishpa ñucataca cacharca.

⁶ Ña ishcai huatatami jatun yarcai tiyashca. Chairac pichca huatata yarcai tiyangaracmi. Chai huatacunapica yapunapish, cosechanapish ima mana tiyangachu.

⁷ Cancunapish, cancunapac huahua huahuacunapish causaita charichun, shinallatac cancunata cushicuihuan cacharichichunmi, ñucata ñaupachishpa cacharca.

⁸ Shinaca, mana cancunachu ñucataca caiman cacharcanguichic, ashtahuanpish Diosmi Faraonta cunachun, paipac huasipi mandac cachun, shinallatac tucui Egipto llactapi mandac cachun ñucata cacharca.

⁹ Cunanca, ñuca taitapacman utca rishpa, cambac churi Joseca: “Ñucataca Diosmi tucui cai Egipto llactata mandac cachun churarca. Utcashpa ñucapacman shamui.

¹⁰ Canpish, cambac huahua huahuacunapish, paicunapac huahuacunapish, tucui animalcunata, tucui ima charishcacunata apashpa, Gosén llactapi causangapac shamui. Chaipi causashpami, ñuca ladollapi causangui.

¹¹ Caipica canmanpish, cambac familiamanpish ima mana illangachu. Shinallatac animalcunamanpish micuna mana illangachu. Chai llactapica pichca huatata yarcai tiyangaracmi” nishpa huillanguichic.

¹² Cancunapac ñahuihuan, ñuca huauqui Benjaminpac ñahuihuanmi ñuca cancunahuan imata nicushcataca ricunguichic.

¹³ Egipto llactata allita mandacuctapish, cai llactapi tucui ricushcatapish, ñuca taitaman huillagrichic. Chaimanta utcashpa ñuca taitata pushamugrichic— nirca.

¹⁴ Shina nishpami, Joseca paipac huauqui Benjaminta ucllarishpa huacarca. Benjaminpish Joseta ucllarishpa huacarcami.

¹⁵ Joseca tucui huauquicunahuan ucllarishpami huacarca. Chai quipami, Josepac huauquicunaca paihuan parlarca.

¹⁶ Faraonpac huasipi caccunapish «Josepac huauquicuna shamushcami» nishcatami uyarca. Chaita uyashpami, Faraonpish, paita serviccunapish cushicurca.

¹⁷ Chaimantami Faraonca Josetaca: —Cambac huauquicunataca: “Cancunapac animalcunapi apachishpa, Canaanman cutichic.

¹⁸ Cancunapac taitatapish, familiatapish ñucapacman pushamugrichic. Ñucaca cai Egiptopi tiyac alli allpata acllashpami cusha. Cai allpapi sumac grano pucushcatami micunguichic” nigri.

¹⁹ Cutin canca: “Paicunapac huahuacunatapish, huarmicunatapish pushamungapac cai Egiptomanta carretacunata apaichic, shinallatac taitatapish caiman pushamuichic.

²⁰ Canaanpi ima charishcacunataca ama llaquishpa saquimuichiclla, cai Egipto llactapi tucui alli tiyashcacunaca cancunapacmi canga” nishpa mandai— nirca.

²¹ Chashnami taita Israelpac churicunaca ruhuarca. Joseca Faraón mandashca shinallatacmi carretacunatapish, ñanpi micuna cucayutapish curca.

²² Tucui paicunamanmi mushuc churanacunata cushpa, Benjaminmanca quimsa patsac cullquitapish, pichca mushuc churanatapish curca.

²³ Cutin paipac taita ñanpi micuchunca, chunga burropica Egiptopi tiyashca tucuimanta yalli allicunata apachishpa, cutin shuctac chunga burropica trigotapish, micunatapish apachishpami cacharca.

²⁴ Paipac huauquicuna caya minchacaman nishpa ricpimi Joseca: —Ñanpi ama piñanacunguichicchu— nishpa cacharca.

²⁵ Shinami Egiptomanta rishpa, Canaanman chayashpa, paicunapac taitapacman chayarca.

²⁶ Taita Jacobopacman chayashpaca: —Joseca causacushcaracmi, paica tucui Egipto llactatami mandacun— nishpami huillarca. Shina huillacpica, taita Jacoboca mana crishpami upayashpa saquirirca.

²⁷ Jacobomanca José nishca shinallatacmi paicunaca tucui huillarca. Jacoboca paita apachun, José cachashca carretacunata ricushpami, paipac shungupica cushicurca.

²⁸ Chaimantami taita Israelca: —¡Ñuca churi Joseca causacushcaracmi! Cunanca manarac huañushpa ricugrisha, chaillatacmi yachasha nircani— nirca.