GÉNESIS 42 - Dios Rimashcata Quillcashcami

Josepac huauquicuna Egipto llactaman rishcamanta

¹ Egipto llactapi grano tiyacta yachashpami, Jacoboca paipac churicunataca: —¿Ima nishpatac ñahuipura ricunacucunguichic?

² Egipto llactapi grano tiyan nictami uyani. Ñucanchic yarcaihuan ama huañungapac, granota randingapac richic— nirca.

³ Shina nicpimi, Josepac chunga huauquicunaca Egipto llactapi trigota randingapac rirca.

⁴ Shina paicuna ricpipish, taita Jacoboca Josepac huauqui Benjamintaca mana cacharcachu. Chaica: «Imapish llaqui tucungami» nishpami mana cacharca.

⁵ Canaán llactapi yalli yarcai tiyashcamantami Israelpac churicunaca shuctac randiccunahuan rirca.

⁶ Josemi chai llactataca mandacurca. Paillatacmi tucui shuctac llactamanta shamuc gentecunamanpish granota catucurca. Chashna catucpimi, paipac huauquicuna chayashpaca, pambacaman cumurirca.

⁷ Joseca paipac huauquicunata ricushcahuanmi ricsirca. Shina cashpapish, mana ricsic tucushpami: —¿Cancunaca maimantatac shamunguichic?— nishpa, sinchita rimarca. Shina rimacpimi paicunaca: —Canaán llactamantami granota randingapac shamunchic— nirca.

⁸ Joseca paipac huauquicunata ricsircami, ashtahuanpish paicunaca paitaca mana ricsircacunachu.

⁹ Chaimantami Joseca paicunamanta muscushcata yuyarishpaca: —Cancunaca pacalla ricushpa puriccunami canguichic. Cai llactaman ima shina yaicunata ricushpami puricunguichic— nirca.

¹⁰ Shina nicpimi paicunaca: —Mana, ñucanchic amito, canta servic ñucanchicca granota randingapacllami shamurcanchic.

¹¹ Tucui ñucanchicmi shuclla taitapac churicuna canchic. Ñucanchicca mana pi juchanchipac gentecunami canchic. Mana ricushpa puricunchicchu— nirca.

¹² Shina nicpipish Joseca: —¡Mana chashnachu! Cancunaca cai llactaman ima shina yaicunata ricushpami puricunguichic— nirca.

¹³ Shina nicpimi paicunaca: —Canta servic ñucanchicca chunga ishcai huauquipurami canchic. Canaán llactapi causac shuc taitapac churicunami canchic. Ñucanchic quipa huauquica taitahuanmi huasipi saquirirca. Shucca ña chingarircami— nirca.

¹⁴ Shina nicpipish Joseca: —Ña nishca shinallatac, ricushpa puriccunami canguichic.

¹⁵ Cunanmi cancuna nishcata ricusha: Cancunapac quipa huauqui shamungacaman caimantaca manatac llucshinguichicchu.

¹⁶ Cancunapuramanta maijanta quipa huauquita pushamuchun cachaichic. Cancunaca caipi prezu saquirichic. Chashna ruhuacpimi, cancuna mana llulla cashcataca yachasha. Faraonpac shutipimi nini— nirca.

¹⁷ Shina nishpami, quimsa punzhacaman carcelpi churarca.

¹⁸ Quimsa punzhapica Joseca: —Ñucaca Diosta manchanimi, cancuna mana huañungapacca caita ruhuaichic:

¹⁹ Cancuna mana juchanchina gentecuna cashpaca, cancunapuramanta maijan shuc prezu saquirichic. Caishuccunaca granota apashpa, huasi ucupura micugrichic.

²⁰ Shina rishpaca, quipa huauquita apamunami canguichic. Chashna apamushpami cancuna mana llulla cashcata ricuchishpa, mana huañunguichic— nirca. Shina nicpica, paicunaca chashnami ruhuarca.

²¹ Shina cashpapish paicunapura ricunacushpaca: —Ñucanchic huauquita llaquichishcamantami ñucanchictapish cai llaquica japin. Pai shungumanta llaquirishpa, mañacucpipish ñucanchicca mana uyarcanchicchu. Chaimantami ñucanchictaca llaqui japin— nirca.

²² Shina nicpimi Rubenca: —¿Manachu ñucaca, huambrata ama imata ruhuaichicchu nircani? Shina nicpipish, mana uyarcanguichicchu. Paita huañuchishcamantami llaquipi canchic— nirca.

²³ Joseca shuc entendichic-huanmi parlac carca. Chaimantami paicunaca José paicunahuan parlashcataca mana entendicushcata yuyarca.

²⁴ Joseca paicunapacmanta caruyashpaca huacarcami. Cutin paicunapacman cutimushpaca, paicunahuan parlashpami, paicuna ricucucpi, Simeontaca chicanyachishpa, carcelpi churarca.

²⁵ Chai quipami Joseca granota tulucunapi jundachichun, granomanta cushca cullquitapish cutichishpa, chai tulucunallapitac chican chicanpi churashpa cachachun, ñanpi micuna cucayutapish cuchun mandarca. Shina mandacpica, chai shinami ruhuarca.

²⁶ Chaimantami paicunaca granota burrocunapi apachishpa chaimanta llucshirca.

²⁷ Ashtahuanpish samanaman chayashpaca, paicunapuramanta shucca paipac tuluta pascashpami, granota llucchishpa burroman caragrirca. Shina caragricushpami, tulu shimillapi cullquita tarirca.

²⁸ Shina tarishpami, paipac huauquicunataca: —¡Riquichic, ñuca cullquitaca cutichishcami! ¡Riquichic, ñuca tulupimi cashca!— nirca. Shina nicpica, tucui paicunami shungu chucchushpa, yallita mancharishpa, caishuc chaishuc tapunacushpaca: —¿Imatac caica? ¿Diosca imatatac ruhuarca?— nircacuna.

²⁹ Canaanman chayashpa, taita Jacoboman tucui ima tucushcacunata parlashpaca:

³⁰ —Chai llactata mandacca ñucanchicta sinchita rimarircami. Pacalla ricushpa puriccunami canguichic nishpami juchanchirca.

³¹ Shina nicpimi, ñucanchicca: “Pipacpish mana juchanchina gentecunami canchic. Mana pacalla ricushpa puriccunachu canchic.

³² Ñucanchicca chunga ishcai huauquipurami canchic. Shuc taitapac huahuacunami canchic. Shucca ña chingarircami. Ashtahuanpish tucuipac quipa huauquimi ñucanchic taitahuan Canaanpi saquirirca” nircanchicmi.

³³ Shina nicpimi, chai llactata mandacca: “Shinashpaca, cunan cancuna mana juchanchina gentecuna cashcata ricungapacca, cancunapuramanta maijan shuc huauquita caipi ñucahuan saquishpa, shuccunaca granota apashpa huasi ucupura micugrichic.

³⁴ Cancunapac quipa huauquita pushamucpimi, cancunataca mana pacalla ricushpa puriccuna cashcata, shinallatac mana juchanchina gentecuna cashcataca yachasha. Cancunapac huauquitapish cacharisha. Shinallatac cancunapish mashna cutinpish trigota randingapac shamui pudinguichicmi” nircami— nirca.

³⁵ Paicuna tulu granota tallicucpica, paicunapac quiquin tulucunapica tucui tulucunapimi uchilla tulitopi cullquica tiyacushca carca. Paicunapac tulucuna cullquihuan tariricpica, paicunapish, taita Jacobopish mancharircami.

³⁶ Chaimantami Jacoboca: —Cancunaca, ñucataca churi illactamari saquicunguichic. Josepish chingarircami, shinallatac Simeonpish ña illanmi. Cunanca, Benjamintapish pushashun ninguichicmi. ¡Tucui chaicunaca ñucamanmi llaqui!— nirca.

³⁷ Shina nicpimi, Rubenca taitataca: —Benjamintaca ñucahuan cachailla, ñuca pushashallami. Paita mana pushamucpica, ñucapac ishcai churita huañuchingui— nirca.

³⁸ Shina nicpimi, taita Jacoboca: —Ñuca churica mana cancunahuan ringachu. Paipac huauqui Joseca ña huañurcami, paillami saquirin. Cancuna rina ñanpi ima llaqui tucucpica, yurac acchayuc ñucaca llaquiricushpalla huañushpa Seolman risha— nirca.