GÉNESIS 40 - Dios Rimashcata Quillcashcami

Muscuicuna imata nisha nishcata José huillashcamanta

¹ Chai quipami Egipto llactata jatun mandacman vinota servicpish, tandata ruhuacpish Egipto llactata jatun mandacta mana allita ruhuashpa piñachirca.

² Chaimantami Faraonca vinota serviccunata mandac-huanpish, tandata ruhuaccunata mandac-huanpish piñarirca.

³ Shina piñarishpami soldadocunata mandacpac huasipi prezu churarca. Chaillapitacmi Josepish prezu carca.

⁴ Soldadocunata mandacca Josemanmi chai serviccunata ricuchun mingarca. Paicunaca tauca punzhacunatami carcelpi carca.

⁵ Shuc tutami carcelpi cac vinota servicpish, tandata ruhuacpish chican chicanta muscurcac. Chai muscushcacunaca paicuna quiquinllatac ima tucuna cashcatami huillacurca.

⁶ Tutamanta paicunapacman José chayamushpaca, llaquilla tiyacushcatami ricurca.

⁷ Chaimantami paipac amopac huasipi prezu tiyacuc Faraonta serviccunataca: —Cunanca, ¿ima nishpatac llaquilla ñahuicuna tiyacunguichic?— nirca.

⁸ Shina nicpimi paicunaca: —Shuc muscuitami charircanchic, chai muscui imata nisha nicushcataca pi mana huillac tiyanchu— nirca. Shina nicpimi Joseca: —Cai muscui imata nisha nicushcataca Diosllami huillanga. Imata muscushcata parlaichic— nirca.

⁹ Shina nicpimi, vinota serviccunata mandacca: —Ñucaca shuc uvas yuratami ñuca ñaupapi shayacucta ricurcani.

¹⁰ Chai yurapica quimsa ramami tiyarca. Chai ramacunaca sisashpami, sumac pucushca uvas huayungahuan ñapish ricurirca.

¹¹ Ñucaca Faraón ubiana vasopi uvasta capishpa, Faraonpac maquipi churacushcarcani— nirca.

¹² Shina nicpimi Joseca: —Can muscushca quimsa ramaca, quimsa punzhatami nisha nin.

¹³ Quimsa punzha quipami Faraonca carcelmanta llucchishpa, cutinllatac Faraonman ima ruhuanata ruhuacushcallapitac churanga. Chaipimi canca utcapi ima shina Faraonman vinota servic cashca shinallatac servingui.

¹⁴ Can alli cashpa, ñucata llaquishpa, Faraonman ñucamanta parlangui. Shina parlashpa, ñucata cai carcelmanta llucchingui.

¹⁵ Ñucataca hebreocunapac llactamantami shuhuashpa pushamurca. Ñuca carcelpi cangapacca, ima millaita mana ruhuashcanichu— nirca.

¹⁶ Chai muscui imata nisha nishcata José alli huillacpimi, tandata ruhuaccunata mandacca: —Ñucaca quimsa yuranlla taza tanda uma jahuapi cashcatami muscurcani.

¹⁷ Chai ashtahuan jahuaman cac tazapica Faraonman ruhuashca tucuilaya sumac tandacunatami volac animalcuna shamushpa, ñuca uma jahuallapitac micurca— nirca.

¹⁸ Shina nicpimi Joseca: —Can muscushca quimsa tazaca, quimsa punzhatami nisha nin.

¹⁹ Quimsa punzha quipami jatun mandac Faraonca sipina yurapi huarcushpa huañuchinga. Chaipimi cambac aichataca volac animalcuna shamushpa micunga— nirca.

²⁰ Quimsa punzha quipaca jatun mandac Faraonpac huacharishca punzha pactacpimi, jatun mandacca tucui paita serviccunaman jatun micuita caracurca. Chai serviccunapac ñaupapimi, vinota serviccunata mandacta, shinallatac tandata ruhuaccunata mandacta carcelmanta llucchimuchun cacharca.

²¹ Vinota serviccunata mandacca cutinllatac utcaman ruhuana cashcallapitac churacpimi, cutinllatac Faraonman vino vasota cui callarirca.

²² Ashtahuanpish tandata ruhuaccunata mandactaca José nishca shinallatacmi sipina yurapi huarcuchun cacharca.

²³ Shina tucucpipish, vinota serviccunata mandacca Josetaca mana yuyarishpa cungarircallami.