GÉNESIS 4 - Dios Rimashcata Quillcashcami

Cainmantapish, Abelmantapish

¹ Adán paipac huarmi Evapi chayaricpica, Evaca huicsayuc tucushpami, Caín huahuata charirca. Chai huarmica: «Mandac Dios cucpimi, shuc cari huahuata charini» nirca.

² Quipaca Cainpac huauqui Abeltami charirca. Abelca ovejacunata michicmi carca. Cutin Cainca allpapi trabajacmi carca.

³ Ña asha huatacuna quipaca Cainca allpapi pucushca grano ofrendatami Mandac Diosman cungapac apamurca.

⁴ Abelpish punta huacharishca sumac huira ovejatami Mandac Diosman cungapac apamurca. Mandac Diosca Abelta cushilla chasquishpami pai cushca ovejatapish chasquirca.

⁵ Ashtahuanpish Mandac Diosca Caintapish, pai cushca ofrendatapish mana cushilla chasquircachu. Chaimantami Cainca ñahui shuctacyashpa, sinchita piñarirca.

⁶ Chaimantami Mandac Diosca Caintaca: —¿Ima nishpatac canca piñarishpa, ñahuipish shuctacyangui?

⁷ Allita ruhuashpaca, ¿manachu alli nishca canguiman? Cantaca juchami pungupi shuyac shina, mana allita ruhuachicun. Chai juchacunataca canllatacmi mishana cangui— nirca.

⁸ Cainca paipac huauqui Abeltaca: «Pambaman llucshishunchic» nirca. Ña pambapi puricushpami, Cainca paipac huauqui Abelta macashpa huañuchirca.

⁹ Chaimantami Mandac Diosca Caintaca: —¿Maipitac cambac huauqui Abelca?— nirca. Shina nicpimi Cainca: —Mana yachanichu. ¿Ñucaca ñuca huauquita cuidacchu cani, imatacyari?— nirca.

¹⁰ Mandac Diosca Caintaca: —¿Imamantatac chaitaca ruhuarcangui? Ashtahuanpish cambac huauquipac yahuarca pambamanta pachami ñucata caparicun.

¹¹ Cunanca, canca cambac huauquita huañuchishpa, pambapi yahuarta jichashcamantaca mana alli nishcami cangui. Cai allpami shimita pascac shina, cambac huauquipac yahuartaca chasquirca. Chaimantami cai allpamanta llucchishpa cachashca cangui.

¹² Can allpapi granota tarpucpipish, cutinca mana pucungachu. Cai allpapica maimanta shamushca shinami, maipi mana causai pudishpa puricunguilla— nirca.

¹³ Shina nicpimi, Cainca Mandac Diostaca: —Ñucaca cai llaquitaca mana apai pudishachu.

¹⁴ Cunanca, cai allpamanta llucchishpa cachacpica, cambac ñahuimanta caruyashpa, shuctac llactamanta shamushca shinami puricushalla. Shina puricucpica, pipish tupashpa huañuchingachari— nirca.

¹⁵ Shina nicpimi, Mandac Diosca: —Maijanpish canta huañuchicpica, chai huañuchicca canchis cutinmi llaquichishca canga— nirca. Mandac Diosca pipish tupashpa ama huañuchichunmi, Caintaca shuc señalta shina churarca.

¹⁶ Caín Mandac Diospac ñaupamanta rishpaca, Edén huerta inti llucshic lado Nod llactapimi causagrirca.

Cainpac huahua huahuacunamanta

¹⁷ Caín paipac huarmipi chayaricpica, huicsayuc tucushpami shuc cari huahuata charirca. Chai huahuataca Enoctami shutichirca. Chai quipaca Cainca shuc llactata ruhuashpami, chai llactataca Enocta shutichirca.

¹⁸ Enocca Irad churitami charirca. Iradca Mehujael churitami charirca. Mehujaelca Metusael churitami charirca. Metusaelca Lamec churitami charirca.

¹⁹ Lamecca ishcai huarmitami charirca. Shucca Adami carca, caishucca Zilami carca.

²⁰ Adaca Jabal huahuatami charirca. Jabalpac huahuacunaca carpa huasipi causashpami, animalcunata michiccuna carca.

²¹ Jabalpac huauquica Jubalmi carca. Jubalpac huahua huahuacunaca tucuimi arpacunapi, flautacunapi tocac carca.

²² Cutin Zila huarmipish Tubal-caín huahuatami charirca. Paica fierromanta, broncemanta imacunatami ruhuashpa causarca. Shinallatac Tubal-cainpac panica Naamami carca.

²³ Shuc punzha Lamecca paipac huarmicunataca: «Lamecpac huarmicuna, Adapish, Zilapish ñucata uyaichic. Shuc runataca chugrichishcamantami huañuchircani. Shuc huambrataca ñucata huactashcamantami huañuchircani.

²⁴ Cainta canchis cutinhuan llaquichishca cana cacpica, ñucacarin canchis chunga canchis cutinmi llaquichishca cana cani» nirca.

Adán Evapac quimsaniqui churimanta

²⁵ Adán cutinllatac paipac huarmi Evapi chayaricpica, shuc cari huahuatami charirca. Chai huahuataca: «Diosmi Caín huañuchishca Abelpac randi cun» nishpami Setta shutichirca.

²⁶ Shinallatac Setca shuc cari huahuatami charirca. Paitaca Enostami shutichirca. Chai punzhamantami gentecunaca Mandac Diosta mañai callarirca.