GÉNESIS 39 - Dios Rimashcata Quillcashcami

Josemantapish, Potifarpac huarmimantapish

¹ Ismaelitacuna Joseta Egiptoman apashca quipaca, Potifarmi randirca. Potifarca Faraonta cuidac soldadocunata mandacmi carca.

² Ashtahuanpish Mandac Dios Josehuan cacpimi, paica imapipish alli llucshirca. Paica Egiptomanta paipac amopac huasipimi causacurca.

³ Paipac amoca Mandac Dios Josehuan cashcata, shinallatac José imata ruhuacpipish, Mandac Dios allita ruhuachicushcatami ricurca.

⁴ Chashnami Joseca Potifarpac ñahuipi alli ricurishpa servicurca. Chaimantami Potifarca paipac huasitapish, pai tucui charishcatapish Joseman ricuchun curca.

⁵ Potifar paipac huasitapish, tucui charishcacunatapish Joseman cushca punzhamanta pachami Mandac Dios Egiptomanta mandacpac huasitaca Josemanta bendiciarca. Chashnami huasipipish, pambapipish tucui pai imalla charishcacunata Mandac Diosca bendiciarca.

⁶ Potifarca tucui charishcacunata Josepac maquipi churashpami, José ricucucpica, ima tiyashcacunataca mana yuyashpa, micunallata yuyarishpa causacurca. Joseca carilla, sumac ñahui mosomi carca.

⁷ Chaimantami asha punzhacuna quipaca Josepac amopac huarmica yallita munashpa: —Ñucahuan sueñuiyari— nirca.

⁸ Joseca mana uyashpami, paipac amopac huarmitaca: —Riqui, ñuca amoca paipac huasipi tiyashcacunataca tucui shunguhuanmi ricuchun curca. Tucui pai charishcacunatami ñuca maquipi churashca.

⁹ Cai huasipica ñucata yalli ricucca pi mana tiyanchu. Imata mana misashpa, ricuchun cushpapish, cantaca mana curcachu. Canca ñuca amopac huarmimi cangui. Chashna cashcamantaca, ¿maitatac millaita ruhuashpa, ñuca Diosta llaquichishpa juchallishayari?— nirca.

¹⁰ Chai huarmi Joseta punzhanta ñucahuan sueñui nicucpipish, Joseca mana sueñusha nishpami, paipac ladopi canallatapish mana munarca.

¹¹ Shuc punzhaca, Joseca pai imata ruhuana cashcata ruhuangapacmi, chai huasiman yaicurca. Chai huasipi causaccunaca tucui illarcami.

¹² Chaipimi chai huarmica Josepac churanapi japirishpaca: —Ñucahuan sueñuiyari— nirca. Chashna ruhuacpimi, Joseca paipac churanata chai huarmipac maquipi saquishpa, llucshishpa callparca.

¹³ Chashna churanata paipac maquipi saquishpa canzhaman callpacpimi,

¹⁴ chai huarmica chai huasipi serviccunata cayashpaca: —Riqui, ñucanchicta burlachunmi, cai hebreo runataca pushamushca. Cai runaca ñucahuan sueñusha nishpami cuchuyarca. Chaimantami ñucaca sinchita caparircani.

¹⁵ Chashna sinchita caparicpimi, paipac churanata ñuca ladopi shitashpa, miticushpa callpan— nirca.

¹⁶ Chai quipaca paipac cusa shamungacamanmi Josepac churanataca paipac ladopi huacaichishpa charicurca.

¹⁷ Cusa shamucpica, huasipi serviccunaman nishca shinallatacmi: —Ñucanchicta servichun can pushamushca hebreo runami ñucata japirishpa burlasha nirca.

¹⁸ Shinapish paica ñuca sinchita caparicpimi, churanata ñuca ladopi shitashpa, canzhaman callpan— nirca.

¹⁹ Paipac huarmi: «Canta servicca chashnami ruhuasha nirca» nicpimi, Josepac amoca yallita piñarirca.

²⁰ Chaimantami Joseta japishpa, jatun mandaccunapac prezucunahuan pacta churacpi, paica chaipi saquirirca.

²¹ Shina cacpipish, Mandac Diosca Joseta llaquishpami prezucunata mandacpac ñahuipi alli ricurichun, paihuan carca.

²² Chaimantami prezucunata mandacca carcelpi caccunata cuidachun, paipac maquipi churarca. Shinallatac tucui imata ruhuanacunatapish paimi ricucurca.

²³ José imata ruhuacucpipish, Mandac Diosca paihuanmi carca. Joseca imata ruhuashpapish Mandac Dios paihuan cashcamantami allita ruhuarca. Chaimantami prezucunataca ricunallatapish mana ricuc carca.