GÉNESIS 37 - Dios Rimashcata Quillcashcami

Joseta paipac huauquicuna catushcamanta

¹ Jacoboca paipac taita causana Canaán llactapimi causarca.

² Cashnami Jacobopac familiacunaca causarca. Joseca chunga canchis huatayuc cashpami, paipac huauquicunahuan ovejata michic carca. Chashnami huambraca paipac taitapac huarmi Bilhapac, Zilpapac huahuacunahuan michic carca. Joseca paipac huauquicuna mana allita ruhuashcata shuccuna parlanacucta uyashpaca paipac taitamanmi huillac carca.

³ Taita Israelca Josetaca ña yuyac cashpa charishcamantami tucui huauquicunata atishpa ashtahuan cuyac carca. Chaimantami paimanca tucuilaya color sumac jahualla churanata ruhuarca.

⁴ Taita Israelpac caishuc churicunata paicunata atishpa, Joseta ashtahuan cuyac cashcamantami Josetaca mana ricunayachishpa, piñashcalla parlac carca.

⁵ Joseca shuc muscuita muscushpami, paipac huauquicunaman parlarca. Chashna parlacpicarin, ashtahuanmi mana ricunayachirca.

⁶ Chai muscushcata pai parlashpaca: —Cunanca, ñuca muscushcata uyaichic:

⁷ Ñucanchicca trigo chagra chaupipimi trigota huatacushcarcanchic. Chashna huatacucpimi, ñuca huataica jatarirca. Cutin cancunapac huataicunaca ñuca huataipac ñaupapimi muyundita cumurirca— nirca.

⁸ Chashna parlacpimi, Josepac huauquicunaca: —¿Canchu ñucanchicta mandangapac shayarigringui?— nirca. Josetaca muscushcamantapish, parlashcamantapish piñashpami, ashtahuan mana ricunayachirca.

⁹ Joseca cutinllatac shuc muscuita mushcushpa, paipac huauquicunaman parlashpaca: —Cutinmi shuc muscuipica caita ricurcani: Intipish, quillapish, chunga shuc lucerocunapish ñucapac ñaupapimi cumurirca— nirca.

¹⁰ Joseca pai muscushcataca paipac taitamanpish, huauquicunamanpishmi parlarca. Chashna parlacpimi, paipac taitaca: —¿Canca imatatac muscurcanguiyari? Shinaca, ¿ñucapish, cambac mamapish, huauquicunapish cambac ñaupapi cumuringapac shamuchunchu ningui?— nirca.

¹¹ Paipac huauquicunaca piñashpami, mana ricunayachirca. Cutin taitaca cai muscui imata nisha nishcatami yuyacurcalla.

¹² Chai quipaca Josepac huauquicunaca Siquem ladopimi taitapac ovejacunata michingapac rirca.

¹³ Taita Israelca Josetaca: —Cambac huauquicunaca Siquem ladopimi ovejacunata michicun. Shamui, paicunata ricugringui— nirca. Shina nicpimi paica: —Caipimi cani— nirca.

¹⁴ Chashna nicpimi, taita Israelca: —Cunanca, cambac huauquicunatapish, ovejacunatapish ima shina cashcata ricushpa, ñucaman huillangapac cutimugri— nirca. Chashna nishpami, taita Israelca paipac churi Josetaca Hebrón pambamantaca Siquemman cacharca.

¹⁵ Chaiman chayashpa, José chingarishpa puricucpimi, shuc runa tupashpaca: —¿Imatatac mashcacungui?— nirca.

¹⁶ Shina nicpimi Joseca: —Ñuca huauquicunatami mashcacuni, paicuna maipi ovejata michicucta ricushca cashpaca huillaiyari— nirca.

¹⁷ Chashna nicpimi, chai runaca: —Caimanta ñami rirca. Ñucaca paicuna: “Dotanman jacuchic” ninacuctami uyarcani— nirca. Chashna nicpimi, Joseca huauquicunata catishpa, Dotán ladopi huauquicunahuan tuparca.

¹⁸ José paicunapacman manarac chayashpa, carupi cacpiracmi, paicunaca huañuchinata yuyarinacurca.

¹⁹ Chashna yuyarinacushpami, caishuc chaishuc parlanacushpaca: —¡Riquichic, muscuc huambrami chaita shamucun!

²⁰ Cunanca, paipac muscushca pactacta ricungapac huañuchishpa, jutcupi shitashunchic. Shina huañuchishpaca taitamanca: “Ima sacha animalcunami micushca canga” nishunllami— nircacuna.

²¹ Paicuna chashna parlanacucta Rubén uyashpaca, huauquicunapac maquimanta quishpichisha nishpami: —Ama huañuchishunchic.

²² Ñucanchic huauquitaca ama yahuarta jichaichicchu. Cancunapac huauquitaca imata mana ruhuanachu canguichic, ashtahuanpish shitashca pambapi tiyac jutcupi shitaichic— nircapishmi. Rubenca paipac huauquicunapac maquimanta quishpichishpa, taitapacman cutichingaraicumi, chashnaca nirca.

²³ José ña paipac huauquicunapacman chayacpica, paipac tucuilaya color sumac jahualla churanata quichushpami,

²⁴ paita japishpa, yacu jundachina jutcupi shitarca. Shina cacpipish, jutcupica yacu mana tiyarcachu.

²⁵ Chai quipami paicunaca micungapac tiyarirca. Chashna micucushpami, huichailla ricushpaca, achca ismaelitacuna Galaad llactamanta sumac mishquilla ashnacucta, mirrata shinallatac balsamota camellocunapi apachishpa, Egiptoman ricucta ricurca.

²⁶ Chaita ricushpami, Judaca paipac huauquicunataca: —Ñucanchic huauquita huañuchishpa, upalla saquishpaca, ¿imatatac llucchishun?

²⁷ Paica ñucanchic huauqui, quiquin yahuarllatacmi. Chaimanta ima millaita mana ruhuashpa, ismaelitacunaman catushpa cachashunchic— nirca. Shina nicpica, caishuc huauquicunaca allimi nishpami,

²⁸ chai catushpa, randishpa puric madianitacuna chaita pasacucpica, Josetaca jutcumanta llucchishpa, ismaelitacunaman ishcai chunga cullquipi catungapac apamurca. Chashna catucpica, Josetaca Egiptomanmi aparca.

²⁹ Chai quipami Rubenca chai jutcuman cutishpa, Joseta mana tarishpaca, paipac churanata lliquirirca.

³⁰ Chaimanta paipac huauquicunapacman cutishpaca: —¡Huambraca jutcupica mana ricurinchu! ¿Cunanca imatac tucushayari?— nirca.

³¹ Chaimantami paicunaca shuc uchilla huahua chivota huañuchishpa, chai yahuarhuan Josepac jahualla churanata cahuirca.

³² Chai quipaca Josepac tucuilaya color sumac churanatami paipac taitaman ricuchichun cacharca. Shina cachacpimi: —Caitami tarinchic. ¿Cambac churipac jahualla churanachu? Paipac cashcata, mana cashcata alli ricsi— nirca.

³³ Jacoboca paipac churipac churanata ricsishpaca: «¡Ari, caica ñuca churipac churanami! ¡Ima sacha animalmi micushca canga, Josetaca tucuimi pitinacushca!» nirca.

³⁴ Chaimantami taita Jacoboca paipac churanata lliquirishpa, sharpa churanata churarishpa, paipac churi José huañushcamantaca tauca punzhacunata llaquilla causacurca.

³⁵ Jacobo chashna llaquilla cacpi, paipac churicunapish, ushicunapish cushichishun nircami. Shina cashpapish, mana cushichi pudircacunachu, ashtahuanpish paica: «¡Ñuca churihuan pacta Seolman ringacaman sharpa churanata churarishpa causacushallami!» nishpami huacacurca.

³⁶ Madianitacunaca Josetaca Egiptopimi soldadocunata mandac Faraonta servic Potifarman caturca.