GÉNESIS 36 - Dios Rimashcata Quillcashcami

Esaupac huahua huahuacunamanta

¹ Edom nishca Esaupac huahua huahuacunaca caicunami.

² Esauca Canaán llactapi causac huarmicunahuanmi cazararca. Shuc huarmica heteopuramanta Elonpac ushi Adami carca. Cutin caishucca heveocunapuramanta Sibeonpac churi Aná runapac ushi Aholibamami carca.

³ Chaishucca Ismaelpac ushi Nebaiotpac pani Basematmi carca.

⁴ Adaca Elifaz huahuatami Esaupacta charirca. Basematca Reuel huahuatami charirca.

⁵ Aholibamaca Jeús, Jaalam, Coré huahuacunatami charirca. Chaicunami Esaú Canaán llactapi causacushpa charishca huahuacuna carca.

⁶ Esauca paipac huarmicunatapish, churicunatapish, ushicunatapish, tucui paihuan causaccunatapish, Canaán llactapi causacushpa, tucui imalla charishcacunatapish, animalcunatapish apashpami paipac huauqui Jacobomanta caruyashpa, shuctac llactapi causangapac rirca.

⁷ Esaupish, Jacobopish mai chayuccuna cashcamantami michina pambacunapish ña mana pactarca. Chaimantami chai llactallapitac ishcaitac mana causai pudirca.

⁸ Shina cacpimi, Edom nishca Esauca Seir urcupi causagrirca.

⁹ Seir urcupi causac ñaupa taita Esaupac huahua huahua edomitacunaca caicunami.

¹⁰ Esaú paipac huarmi Adapi charishca churica Elifazmi carca. Cutin Basematpi charishca churica Reuelmi carca.

¹¹ Elifazpac huahuacunaca: Temán, Omar, Zefo, Gatam, Cenazmi carca.

¹² Timnaca Esaupac churi Elifazpac caishuc huarmimi carca. Chai huarmimi Elifazpactaca Amalec huahuata charirca. Caicunami Esaú Adapi charishca churipac huahuacuna.

¹³ Reuelpac huahuacunaca: Nahat, Zera, Sama, Mizami carca. Caicunaca Esaupac huarmi Basematpac nietocunami.

¹⁴ Esaupac huarmi Oholibamapac cari huahuacunaca: Jeús, Jalam, Coremi carca. Oholibamaca Aná runapac ushi, Zibeonpac nietomi carca.

¹⁵ Esaupac huahua huahuacunapuramanta mandaccunaca caicunami. Esaupac punta churi Elifazpac huahuacunaca: Temán, Omar, Zefo, Cenaz,

¹⁶ Coré, Gatam, Amalecmi carca. Paicunaca Edom llactapi Elifazpac aillucunapuramanta mandaccunami carca. Caicunaca Ada huarmipac huahua huahuacunami carca.

¹⁷ Esaupac churi Reuelpac churicunaca: mandac Nahat, Zera, Sama, Mizami carca. Paicunami Reuelpac aillucunapuramanta Edom llactallapi mandaccuna carca. Paicunaca Esaupac huarmi Basematpac huahua huahuacunami carca.

¹⁸ Shinallatac Aná runapac ushi Aholibamapi Esaú charishca churicunaca: Mandac Jeús, Jaalam, Coremi carca. Paicunami Anapac ushi Esaupac huarmi Aholibama charishca mandaccuna carca.

¹⁹ Paicunami Edom nishca Esaupac churicunamanta mandaccunaca carca.

²⁰ Chai llactapi causac horeopuramanta Seirpac churicunaca: Lotán, Sobal, Zibeón, Aná,

²¹ Disón, Ezer, Disanmi carca. Paicunami Edom llactapi causac horeocunapuramanta Seirpac churicunata mandac carca.

²² Lotanpac churicunaca: Hori, Hemanmi carca. Timna huarmica Lotanpac panimi carca.

²³ Sobalpac churicunaca: Alván, Manahat, Ebal, Sefo, Onammi carca.

²⁴ Zibeonpac churicunaca: Ayía, Anami carca. Cai Aná runami paipac taita Zibeonpac burrocunata michicushpa, shitashca pambapi yacu tucyacucta tarirca.

²⁵ Aná runaca Disón churitapish, Aholibama ushitapish charircami.

²⁶ Disonpac churicunaca: Hemdán, Esbán, Itrán, Queranmi carca.

²⁷ Ezerpac churicunaca: Bilhán, Zaaván, Acanmi carca.

²⁸ Disanpac churicunaca: Uz, Aranmi carca.

²⁹ Horeocunata mandaccunaca: Lotán, Sobal, Zibeón, Aná,

³⁰ Disón, Ezer, Disanmi carca. Seir llactapi causac horeocunataca Disón, Ezer, Disanmi chican chican aillucunata mandashpa causacurca.

³¹ Edom llactapi israelcuna manarac mandacta charicpica, cai jatun mandaccunami mandacurca:

³² Edom llactataca Beorpac churi Belami mandacurca. Pai mandana puebloca Dinabami carca.

³³ Bela huañucpica, Bosramanta Zerapac churi Jobabmi paipac randi mandacurca.

³⁴ Jobab huañucpica, Temán llactamanta Husammi mandacurca.

³⁵ Husam huañucpica, Bedadpac churi Hadadmi mandacurca. Paimi Moab pambapi macanacushpa, madianitacunataca atirca. Pai mandashpa causana llactaca Avitmi carca.

³⁶ Hadad huañucpica, Masrecamanta Samlami paipac randi mandacurca.

³⁷ Samla huañucpica, Eufrates yacu ladopi tiyac Rehobotmanta Saulmi paipac randi mandacurca.

³⁸ Saúl huañucpica, Acborpac churi Baal-hananmi paipac randi mandacurca.

³⁹ Acborpac churi Baal-hanán huañucpica, Hadarmi paipac randi mandacurca. Pai mandana llactaca Paumi carca. Paipac huarmica Matredpac ushi Mehetabelmi carca. Matred huarmica Mezaabpac ushimi carca.

⁴⁰ Esaupac huahua huahuacunapuramanta mandaccunapac shuticunapish, paicuna causashca llactacunapac shuticunapish, paicunapac shuticunapish caicunami: Timna, Alva, Jetet,

⁴¹ Oholibama, Ela, Pinón,

⁴² Cenaz, Temán, Mibzar,

⁴³ Magdiel, Irammi carca. Paicunami Edom llactataca japishpa mandarcacuna. Edomitacunapac taitaca Edom nishca Esaumi carca.