GÉNESIS 34 - Dios Rimashcata Quillcashcami

Dina solterata japirishpa llaquichishcamanta

¹ Lea huarmipi Jacobo charishca Dina solterami chai llactapi causac solteracunata ricungapac rirca.

² Chashna ricpimi, chai llactata mandac heveocunapuramanta Hamorpac churi Siquemca chai solterata ricushpa, japirishpa llaquichirca.

³ Chai mosoca Jacobopac ushi Dinata tucui almahuan cuyashpami, pai rimashcacunahuan Dinapac shungupi yaicurca.

⁴ Chaimantami Siquemca paipac taita Hamortaca: —Cai solterahuan cazarachi— nirca.

⁵ Jacoboca paipac ushi Dinata Siquem moso japirishpa llaquichishcata yacharcami. Shina yachashpapish paipac churicuna michina pambapi animalcunata cuidacucpimi, paicuna shamungacaman mana huillarca.

⁶ Chashna cacpimi, Siquempac taita Hamorca Jacobohuan parlangapac rirca.

⁷ Jacobopac churicuna michina pambamanta cutishpa, paicunapac pani Dina ima tucushcata yachashpaca yallitami llaquirirca. Israelcunapurapica Siquem Dinata japirishpa llaquichishcaca jatun pingaimi carca. Pipish mana ruhuashcatami ruhuashca carca. Chaimantami Jacobopac churicunaca yallita piñarirca.

⁸ Hamor paicunahuan parlashpaca: —Ñuca churi Siquemca cancunapac panipac shunguman yaicushcami. Chaimanta ñuca churihuan cazarachun cuichic.

⁹ Ñucanchicpish cancunapac ushicunahuan, cutin cancunapish ñucanchic ushicunahuan cazarashpa, familiapura tucushun.

¹⁰ Allpaca cancunapac maquipimi. Chaimanta ñucanchic-huan causangapac caipi saquirichic. Imatapish randishpa, catushpa cai allpapi causaichiclla— nirca.

¹¹ Siquempish Dinapac taitata, turicunataca: —Cancunapac ñahuipi ñuca alli ricuricpica, cancuna imata mañashcatami cusha.

¹² Shuc huarmimanta cuna cashcamanta ashtahuan yallitapish cushallami, ima caranatapish cushallami, Dinataca ñucahuan cazarachun cuichicyari— nishpa mañarca.

¹³ Shina nicpipish, Siquem moso Dinata japirishpa llaquichishcamantaca paitapish, paipac taitatapish Jacobopac churicuna umashpaca:

¹⁴ —Mana circuncisionta ruhuashca runamanca ñucanchic panitaca mana cui pudinchicchu. Chashna cucpica, ñucanchicmanca pingaimi canga.

¹⁵ Ashtahuanpish ñucanchic shinallatac cancunapurapipish tucui caricuna circuncisionta ruhuana cacpica cushunllami.

¹⁶ Shina ruhuashpaca, ñucanchic ushicunahuan cazarai pudinguichicmi, shinallatac ñucanchicpish cancunapac ushicunahuan cazarashpa, cancunahuan causashpa, shuc llactallami tucushun.

¹⁷ Cutin cancuna mana circuncisionta ruhuasha nicpica, ñucanchic panita apashpa, caimanta llucshishunllami— nirca.

¹⁸ Hamorpish, paipac churi Siquempish paicuna nishcataca chasquircami.

¹⁹ Jacobopac ushita yallita munashcamantami chai mosoca utca circuncisionta ruhuarca. Siquemca paipac taitapac huasi ucupica mai alli nishcami carca.

²⁰ Chaimantami paipish, paipac taitapish chai llacta yaicunaman rishpa, chaiman yaicuccunataca:

²¹ —Cai runacunaca ñucanchic-huan apanacucmi, cai llactapimi randishpa, catushpa causagrincuna. Caipica achca allpami tiyan, shinallatac ñucanchicpish paicunapac ushicunahuan cazarai pudinchicmi, cutin paicunapish ñucanchic ushicunahuan cazarai pudincunami.

²² Shina cacpipish, shuc llactalla tucushpa, cai llactapi causachunca, paicuna shinallatacmi ñucanchicpurapipish tucui caricuna circuncisionta ruhuana canchic.

²³ Shina ruhuacpica, tucui paicuna charishcapish, paicunapac animalcunapish ñucanchicpacmi canga. Cai nishcacunata ari nicpica, paicunaca ñucanchic-huan causangapac saquiringallami— nirca.

²⁴ Hamor, shinallatac paipac churi Siquem nishcataca tucui chai punguta yaicuccunami chasquishpa, tucui caricuna circuncisionta ruhuarca.

²⁵ Shina cacpipish, quimsa punzha quipa, circuncisionta ruhuashcamanta yalli nanaihuan cacpimi, Jacobopac churi Simeón, Leví espadahuan cungailla rishpa, tucui caricunata huañuchirca. Paicunaca Dinapac turicunami carca.

²⁶ Hamortapish, paipac churi Siquemtapish espadahuan huañuchishpami, Dinataca Siquempac huasimanta aparirca.

²⁷ Jacobopac churicunaca paicunapac pani Dinata japirishpa llaquichishcamantami chai huañushcacunapac jahuata rishpa, chaipi ima tiyashcacunata tucui shuhuashpa aparca.

²⁸ Shinallatac llactapi tiyashcacunatapish, michina pambapi tiyashca ovejacunatapish, vacacunatapish, burrocunatapish,

²⁹ huasipi tucui ima tiyashcacunata tucuimi shuhuashpa aparca. Huarmicunatapish, huahuacunatapish prezu aparcami.

³⁰ Chaimantami Jacoboca Simeontapish, Levitapish rimashpaca: —Cancuna chashna ruhuashpaca, cai llactapi causac cananeocunapac, ferezeocunapac piñanatami ñucataca ruhuashcanguichic. Cunanca piñangacunami. Ñucanchicca ashalla runacunatami charinchic. Paicuna tandanacushpa, jahualla ñucatapish, ñuca familiatapish huañuchingami— nirca.

³¹ Shina nicpimi paicunaca: —¿Ñucanchic panitaca cullquimanta huainayac huarmi shinatachu ruhuana carca?— nirca.