GÉNESIS 31 - Dios Rimashcata Quillcashcami

Jacobo Labanmanta miticushpa rinata yuyarishcamanta

¹ Jacoboca Labanpac churicuna parlanacushpa: «Jacoboca tucui ñucanchic taitapac charishcatami japishca, tucui chaicunahuanmi chayucyashca» ninacuctami yachac chayarca.

² Shinallatac Jacoboca Labán piñashca ñahuihuan ricuc cashcatapish ricurcami.

³ Mandac Dios Jacobota rimashpaca: —Cambac taitacunapac causana llactaman rishpa, cambac familiacunahuan causagri. Ñucaca canhuanmi casha— nirca.

⁴ Jacoboca paipac ovejacuna shayana pambamanmi Raqueltapish, Leatapish cayachun cacharca.

⁵ Chaiman chayacpimi Jacoboca: —Cancunapac taita mana utcapi shina cuyac cashcatami ricushcani. Shina cacpipish, ñuca taitapac Diosca ñucahuanmi cashca.

⁶ Ñuca pudishcahuanmi cancunapac taitataca servishcani, chaitaca cancunallatac yachanguichicmi.

⁷ Ashtahuanpish paica ñucaman pagashpapish chunga cutincamanmi umashca. Shina cacpipish, pai ima millaita ruhuachunca, Diosca mana saquishcachu.

⁸ Pai: «Tucui muru ovejacunatami can servishcamantaca cusha» nicpica, tucui ovejacunami muru ovejacunata huacharca. Cutin: «Tucui yana ovejacunatami cusha» nicpica, tucui ovejacunami yana ovejacunata huacharca.

⁹ Chashnami Diosca Labanmanta tucui animalcunata quichushpa, ñucaman curca.

¹⁰ Animalcuna chayarina punzhapi huarmi ovejacunapi muru, shuyu listado cari ovejacuna chayaricuctami muscuipi ricurcani.

¹¹ Chai muscuillapitacmi Diospac angelca: “Jacobo” nicpi, ñucaca: “Caipimi cani” nircani.

¹² Chaipimi angelca: “Labán canta tucui mana allita ruhuashcatami ricushcani. Chaimanta can huichailla ricui, tucui muru, shuyu cari ovejacunami huarmi ovejacunapi chayaricun.

¹³ Ñucaca Bet-el pambapi ricurishca Diosmi cani. Chaipimi aceiteta rumipi tallishpa, ñucaman allicunata cushami nircangui. Cunanca jatari, caimanta llucshishpa, can huacharishca llactaman cuti” nircami— nirca.

¹⁴ Shina nicpi, Raquelpish, Leapish rimashpaca: —Ñucanchicca taitamanta ima herenciata mana charinchicchu.

¹⁵ Ñucanchictaca pi mai cashca shinatami charin. ¡Ashtahuancarin can ñucanchicmanta trabajashcatapish paillami tucui japirca!

¹⁶ Chaica, Dios ñucanchic taitamanta quichushcacunaca ñucanchicpacpish, ñucanchic huahuacunapacpishmi can. Shinaca Dios canta nishca shinallatac tucui ruhuailla— nirca.

Jacobo Labanpacmanta miticushpa rishcamanta

¹⁷ Shinami Jacoboca jatarishpa churicunatapish, huarmicunatapish camellocunapi tiyachishpa,

¹⁸ paipac taita Isaac causana Canaán llactaman cutingapac, Padan-aram llactapi mirachishca animalcunatapish, servishcamanta paiman cushca animalcunatapish ñanpi churarca.

¹⁹ Labán ovejacunata rutungapac ricpimi, Raquelca paipac taitapac dioscunata shuhuarca.

²⁰ Jacoboca arameopuramanta Labantaca chaimanta llucshigricushcata mana huillashpami umarca.

²¹ Chashnami tucui pai charishcacunata apashpa, Eufrates yacuta pasashpa, Galaad urcuman rirca.

²² Quimsa punzha quipami, Labanca Jacobo rishcataca yachac chayarca.

²³ Chaimantami paipac familiacunahuan Jacobota japingapac catishpa llucshirca. Canchis punzhapimi Galaad urcupi japirca.

²⁴ Chai tutami Mandac Diosca arameopuramanta Labanman muscuipi ricurishpaca: «Jacobotaca maipish cachun rimarinamantaca cuidaringui» nirca.

²⁵ Labanca Galaad urcupi Jacobo carpa huasicunapi samaricucpimi chayarca. Chaillapitacmi Labanpish, familiacunandi saquirirca.

Labanhuan Jacobohuan alli tucushcamanta

²⁶ Chaipimi Labanca Jacobotaca: —¿Imatatac ruhuarcangui? ¿Ima nishpatac ñucata umashpa, ñuca ushicunataca prezuc shina apamurcangui?

²⁷ ¿Ima nishpatac mana huillashpa, miticushpa llucshishpa ñucataca umarcangui? Ñucaca can llucshigricushcata yachashpaca, cushicushpa tamboracunahuan, arpacunahuan caya minchacaman nimanmi carcani.

²⁸ Ñuca huahuacunatapish, ñuca ushicunatapish muchashpa, caya minchacaman nichunllapish mana saquishcanguichu. ¡Canca juizhu illac shinami ruhuashcangui!

²⁹ Ñucaca cancunata llaquichisha nishpapish llaquichimanllami, ashtahuanpish cambac taita Isaacpac Dios muscuipi tuta ricurishpa: “Jacobotaca maipish cachun rimarinamantaca cuidaringui” nirca.

³⁰ Ña cambac taitapac huasita yuyarishpa, cutina munaita charishpaca, ¿ima nishpatac ñuca dioscunata shuhuamurcangui?— nirca.

³¹ Chashna nicpimi, Jacoboca Labantaca: —Ñucaca cambac ushicunataca uyai mana uyai quichunga yuyarcanimi, chaimantami mancharcani.

³² Maijan caipi caccunapi cambac dioscuna tariricpica, chai charicucca, ¡huañungami! Ñucanchic cambacta apamushcata ricsishpaca, familiacuna ricucucpi apailla— nirca. Jacoboca Raquel paipac taitapac dioscunata shuhuashcataca mana yacharcachu.

³³ Labanca Jacobopac, Leapac shinallatac ishcai servic huarmicunapac carpa huasiman yaicushpapish paipac dioscunataca mana tarircachu. Leapac carpa huasimanta llucshishpaca, Raquelpac carpa huasimanmi yaicurca.

³⁴ Chaipimi Raquelca shuhuashca dioscunataca camello parejo ucupi churashpa, chai jahuapi tiyarirca. Labanca tucui carpa huasi ucupi mashcashpapish mana tarircachu.

³⁵ Shina mashcacucpimi, Raquelca paipac taitataca: —Ñuca taitalla, quilla ungüihuan cashcamantami cambac ñaupapi mana jatari pudini, chaimanta ama piñaringuichu— nirca. Labanca tucuita mashcashpapish mana tarircachu.

³⁶ Chashna mana taricpimi, Jacoboca yallita piñarishpa Labantaca: —¿Ima mana allitatac ruhuashcani? Can yallita piñarishpa, ñucata cati shamuchunca, ¿ima mana allitatac ruhuashcani?

³⁷ Tucui ñuca imalla charishcacunapi mashcashpapish, ¿imatatac cambac cashcataca tarircangui? ¡Imata tarishpaca, cai cambac familiacunapac, ñuca familiacunapac ñaupapi churai! Paicunami ñucanchic imata ruhuacushcataca ricunga.

³⁸ Ishcai chunga huatatami canhuan cashcani. Ovejacunapish, chivocunapish mana shullurcachu. Cambac manada ovejacunamantapish jaicapi shuc cari ovejallatapish mana micushcanichu.

³⁹ Sacha animalcuna huañuchishca ovejacunatapish mana apamushpa, chaipac randica, ñucami chai ovejacunamantaca cutichic carcani. Tuta cashpa, punzha cashpa, cambac animalcunata shuhuacpica, ñucatami cutichichic carcangui.

⁴⁰ ¡Tutaca chiripi, punzhaca rupaipi, mana sueñushpami llaquita aparcani!

⁴¹ Chashnami ishcai chunga huatata cambac huasipi carcani. Cambac ishcai ushimantaca chunga chuscu huatatami servircani. Animalcunamantaca sucta huatatami servircani. Chunga cutinmi umashpa mana pagarcangui.

⁴² Abrahampacpish, ñuca taita Isaacpacpish manchana Dios mana ñucahuan cacpica, chushac maquitami cachanguiman carcangui. Shina cacpipish, Diosmi ñuca llaquilla cashcata, ñuca servishcata ricushpa, tuta ricurishpa, cantaca rimarca— nirca.

⁴³ Shina nicpimi, Labanca Jacobotaca: —Cai huarmicunaca ñuca ushicunami, ushicunapac huahuacunapish ñuca nietocunami, ovejacunapish ñuca ovejacunami. ¡Tucui caipi ricushcacunami ñucapac! Shina cacpipish, ñuca ushicunatapish, paicunapac huahuacunatapish, ¿imatatac ruhuasha?

⁴⁴ Cunanca shamui, canhuan ñucahuan alli tucungapac ari ninacushun— nirca.

⁴⁵ Shina nicpimi, Jacoboca shuc rumita japishpa, pilar shinata shayachirca.

⁴⁶ Shina shayachishpami, paipac huasi ucupuracunataca: —Rumicunata tandachichic— nirca. Chashna nicpica, tucuimi rumita tandashpa, shuc montonta ruhuarca. Shinami chai rumi jahuapi micurcacuna.

⁴⁷ Chai rumi montontaca «Labanca Jegar Sahadutatami» shutichirca. Cutin Jacoboca «Galaadtami» shutichirca.

⁴⁸ Shinallatac Labanca: —Cai rumi montonmi ñucanchic ishcai alli tucushcataca huillacun— nirca. Chaimantami chaitaca “Galaadta” shutichirca.

⁴⁹ Shinallatac “Mizpata” shutichishpami Labanca: —Ñucanchic caishuc chaishuc caruyanacushpa, mana ricucpipish Mandac Dios ñucanchicta cuidachun.

⁵⁰ Ñuca ushicunata can llaquichicpipish, cazarashca jahua shuc-huan cazaracpipish, pi mana ricunchu. Chashna cacpipish, Mandac Diosca ñucanchic ishcaitatacmi ricucun— nirca.

⁵¹ Labanca Jacobotaca: —Ricui, caipimi rumi montonpish, jatun rumipish. Caitaca canhuan ñucahuan alli tucushpa, ari nishcata ricuchicmi.

⁵² Cai rumicunaca canpish ñucata, shinallatac ñucapish canta llaquichingapac mana pasai pudishcatami ricuchin.

⁵³ Cambac taita Abrahampac, ñuca taita Nacorpac, shinallatac paicunapac Dios ñucanchicta ricuchun— nirca. Shina nicpi, Jacoboca paipac taita Isaacpac manchana Diospac shutipi ari nirca.

⁵⁴ Chai quipami Jacoboca animalta urcupi huañuchishpa, paipac huasi ucupuracunaman carangapac cayarca. Tucui paicunami chaipi micushpa, chai tutaca pacarirca.

⁵⁵ Tutamanta Labán jatarishpa ushicunatapish, nietocunatapish muchashpa bendiciashpami paipac llactaman cutirca.