GÉNESIS 30 - Dios Rimashcata Quillcashcami

¹ Raquelca Jacobopacta mana huahuata chari pudishpami: “Ñucaca Lea cashpachari alli caiman” nic carca. Chaimantami paipac cusataca: —¡Huahuata cui, mana cucpica huañugrinimi!— nirca.

² Chashna nicpi, Jacobo piñarishpaca: —Diosmi cantaca mana huahuata chari pudicta ruhuashca. Ñucaca huahuata cungapacca, ¿pitac caniyari?— nirca.

³ Chaimantami Raquelca: —Riqui, ñucata servic Bilha huarmipi chayari. Pai huicsayuc tucushpa, ñuca changa jahuapi sajuaricpica, chai huahuaca ñuca quiquin huahua shinami canga. Chashnami paimanta huahuata chari pudisha— nirca.

⁴ Chashnami Raquelca paita servic Bilhata paipi huahuata charichun Jacoboman curca. Jacobo Bilhapi chayaricpica,

⁵ shuc cari huahuatami Jacobopacta charirca.

⁶ Chaimanta Raquelca: «Diosca ñuca mañashcata uyashcami. Ñucamanpish huahuata cushpaca, cashcatami ruhuashca» nishpami Danta shutichirca.

⁷ Raquelta servic Bilhaca quipataca cutinllatacmi Jacobopacta shuc cari huahuata charirca.

⁸ Chaimanta Raquelca: «Mandac Dios ayudacpimi, ñuca ñañahuan chimbapurashpa atishcani» nishpami Neftalita shutichirca.

⁹ Lea ña mana huahuata chari pudishpami, paita servic Zilpa huarmita Jacoboman paipac huarmi cachun curca.

¹⁰ Leata servic Zilpa huarmipish shuc cari huahuatami Jacobopacta charirca.

¹¹ Shina huahuata charicpica, Leaca: «¡Alli huashami cani!» nishpami Gadta shutichirca.

¹² Chai quipaca cutinllatacmi Leata servic Zilpa huarmica Jacobopacta shuc cari huahuata charirca.

¹³ Chaimanta Leaca: «¡Caica achca cushicuimi! Cunanca, tucui huarmicunami ñucataca achca cushicuihuanmi cangui ningacuna» nishpami Aserta shutichirca.

¹⁴ Trigo piti punzhacunami Rubenca mandrágora frutacunata tarirca. Chaitami paipac mama Leaman apamurca. Chai mandragorata Raquel ricushpami Leataca: —Cambac huahua apamushca maijan mandragoracunata carai— nirca.

¹⁵ Shina nicpimi Leaca: —Canca cusata quichushcataca, ¿manachu yuyaringui? ¿Cunanca, ñuca huahua apamushca mandragoracunatapish quichushachu ningui?— nirca. Shina nicpica Raquelca: —Can mandragoracunata cushcamantaca cunan tutami Jacobota canhuan sueñuchun cachasha— nirca.

¹⁶ Chishita Jacobo ña pambamanta cutimucpi, Lea tupangapac llucshishpaca: —Cunan tutaca ñucahuanmi sueñungui. Chaica, ñuca huahua apamushca mandragoracunata Raquelman cushpami canta mañarcani— nirca. Chai tutaca Jacoboca Leahuanmi sueñurca

¹⁷ Diosca Lea nishcata uyarcami. Chaimantami pichcaniqui cari huahuata Jacobopacta charirca.

¹⁸ Chaimanta Leaca: «Ñucata servic huarmita ñuca cusaman cushcamantami Mandac Diosca ñucamanca sumac japinata cushca» nishpami Isacarta shutichirca.

¹⁹ Leaca quipata cutinllatac huicsayuc tucushpami, suctaniqui huahuata Jacobopacta charirca.

²⁰ Chaimanta Leaca: «Mandac Diosmi sumac caranata cushca. Suctaniqui huahuatami Jacobopacta charini. Chaimantami ñuca cusaca alli ninga» nishpami Zabulonta shutichirca.

²¹ Leaca chai tucui cari huahuacunapac quipaca shuc huarmi huahuatami charirca. Chai huahuataca Dinatami shutichirca.

²² Shina cacpipish, Mandac Diosca Raqueltapish yuyarishpami, pai mañashcata uyarca. Chaimantami huahuacunata charichun saquirca.

²³ Raquel shuc huahuata charishpaca: «Huahuata mana charic cashcamanta pingaihuan cacpimi, Diosca pingaita anchuchishca,

²⁴ shinallatac shuc huahuatapish charichun saquinmanllami» nishpami Joseta shutichirca.

Jacobo Labanta umashcamanta

²⁵ Raquel Joseta charishca quipa Jacoboca Labantaca: —Ñuca quiquin llactaman cuti richun saqui.

²⁶ Ñuca huarmicunamantaca ñami canta servishcani. Cunanca ñuca huarmicunatapish, huahuacunatapish apashpa richun saqui. Ñuca ima shina servishcataca canllatac yachanguimi— nirca.

²⁷ Shina nicpimi Labanca: —Cambac ñahuipi alli ricurishca cacpica, caipi saquirilla. Canmanta Dios ñucaman bendiciashcataca yachanimi.

²⁸ Can servishcamanta mashnata pagachun nishcata pagashallami— nirca.

²⁹ Shina nicpimi Jacoboca: —Ñuca ima shina canta servishcatapish, cambac animalcunata ima shina cuidashcatapish canllatac yachanguimi.

³⁰ Ñuca manarac shamucpica, ashallatami charircangui. Cunanca achcami mirashca. Ñuca shamushcamantami Diosca achcata bendiciashca. Shina cacpica, ¿ima horatac ñuca familiamanca trabajashayari?— nirca.

³¹ Shina nicpimi Labanca: —Shinashpaca, ¿imatatac cuchun ningui?— nishpa catirca. Shina nicpimi Jacoboca: —Ama imata cuichu, ashtahuanpish ñuca mañashcata can uyacpica, cambac ovejacunata cuidangapac saquirishallami.

³² Cunanllatacmi cambac manada ovejapacman rishpa, tucui yana, muru, shuyu ovejacunatapish, chivocunatapish ñucaman chicanyachigrini. Canta servishcamanta ñuca japinaca chaillami canga.

³³ Ñuca servishcamanta mashnata pagana cashcata caya mincha cungapac shamushpami, ñucataca cashcata ruhuac cashcata yachangui. Ñuca manada ovejapi yana, muru ovejacuna, mana shuyu chivocuna cacpica, ñucataca mana shuhuac cashcatami yuyangui— nirca.

³⁴ Shina nicpimi Labanca: —Can nishca shina cachun— nirca.

³⁵ Shina cacpipish, chai punzhallatacmi Labanca tucui muru, shuyu cari, huarmi chivocunata, asha yurac, shinallatac yana ovejacunata chicanyachishpa, paipac churicunaman michichun curca.

³⁶ Chashna chicanyachishpaca, Jacobopacmanta quimsa punzha purina shina carumanmi, chai animalcunataca caruyachirca. Shina ruhuacpipish, Jacoboca Labanpac shuctac saquirishca animalcunataca michishpami catirca.

³⁷ Chashna michicushpami, álamo, almendro, castaño caspicunata pitishpa, yuranlla ricurichun, carata llushtirca.

³⁸ Chai llushtishca caspicunataca manada ovejacuna yacuta ubiana ñaupapimi churarca. Chaipimi cari ovejacunaca huarmi ovejapi chayaric carca.

³⁹ Chashnami llushtishca caspi ladopi chayaricpica, huarmi ovejacunaca muru, shuyu ovejacunata chichuc carca.

⁴⁰ Chashnami Jacoboca yana, shuyu, muru ovejacunata Labanpac manada ovejacunamanta chicanyachishpa, paipac manada ovejacunapi churarca.

⁴¹ Cutin huira ovejacuna chayarinacucpica, Jacoboca yacu ubiana ladopimi chai llushtishca caspitaca churac carca. Ovejacuna chai caspi ñaupapi chichuchunmi chashna ruhuac carca.

⁴² Shina cashpapish, tullu ovejacuna yacuta ubiangapac shamucpica, mana chai caspita churacchu carca. Chaimantami huira ovejacunaca Jacobopac, cutin tullu ovejacunaca Labanpac carca.

⁴³ Chashnami Jacoboca yallita chayuc tucushpa, achca ovejacunatapish, servic caricunatapish, servic huarmicunatapish, camellocunatapish, burrocunatapish charirca.