GÉNESIS 3 - Dios Rimashcata Quillcashcami

Adanpish, Evapish Dios mandashcata paquishcamanta

¹ Mandac Dios ruhuashca animalcunamantaca culebrami yalli yuyaisapa carca. Chai animalmi Evataca: —Shinaca, ¿Dioschu huertapi tiyac yuracunamantaca ama micunguichu?— nirca.

² Shina nicpimi, huarmica culebrataca: —Ñucanchicca cai huertapi tiyac yuracunamantaca micui pudinchicmi,

³ ashtahuanca chai huerta chaupipi tiyac yurallamantami Diosca: “Ama micunguichicchu, shinallatac ama tuparinguichicchu. Chai yuramanta micushpaca huañunguichicmi” nircami— nirca.

⁴ Culebraca huarmitaca: —Mana huañunguichicchu,

⁵ ima punzhami chai yuramanta micunguichic, chai punzhami ñahui pascaricpi, Dios shina tucunguichic, shinallatac allitapish, mana allitapish yachanguichicmi. Chaitaca Diosca yachanmi— nirca.

⁶ Shina nicpimi, huarmica chai yurapi cac murutaca micungapac alli cacta, sumaimana ricunalla cacta, shinallatac yachac cangapacpish alli cacta ricurca. Chaimantami chai yuramanta japirca, micurca, cusamanpish cucpi, paipish micurca.

⁷ Shina micucpimi, ñahuica ishcaipacta pascarirca. Chaimantami lluchulla cashcata ricushpa, higo pangata sirashpa, jarcarinata ruhuarca.

⁸ Paicunaca chishi huairapi Mandac Dios huertapi puricuctami uyarca. Chaimantami caripish, huarmipish Mandac Diospac ñaupamanta chai huertapi tiyac sachapi miticugrirca.

⁹ Chaimantami Mandac Diosca runataca: —¿Maipitac cangui?— nishpa cayarca.

¹⁰ Shina cayacpimi Adanca: —Huertapi can rimashcata uyashpami, lluchulla cashcamanta manchashpa, miticungapac rircani— nirca.

¹¹ Shina nicpimi, Mandac Diosca: —¿Pitac canmanca lluchulla cashcataca huillarcayari? ¿Ñuca ama micunguichu nishca yuramantachu micurcangui?— nirca.

¹² Shina nicpimi Adanca: —Can ñucata compañachun cushca huarmillatac chai yuramanta caracpimi micurcani— nirca.

¹³ Shina nicpimi, Mandac Diosca huarmitaca: —¿Imatatac ruhuarcangui?— nirca. Chaimantami huarmica: —Culebramari umarca, chaimantami micurcani— nirca.

¹⁴ Mandac Diosca culebrataca: —Can chaita ruhuashcamantaca charina animalcunapurapipish, sacha animalcunapurapipish mana ricunayachishcami cangui. Pambata aisarishpami puringui, tucui causaipimi allpallata micungui.

¹⁵ Canhuan, cai huarmihuan, cambac huahuacunahuan, cai huarmipac huahuacunahuan piñanacuchunmi churani. Cai huarmipac huahuaca cantaca umapimi sarunga. Canca chaqui talonllapimi caningui— nirca.

¹⁶ Cutin huarmitaca: —Can huicsayuc cacpica, yalli nanaitami mirachisha. Yalli nanaihuanmi huahuata sajuaringui. Canca cusahuan canatami munangui. Cusami cantaca mandanga— nirca.

¹⁷ Cutin Adantaca: —Ñuca: “Cai yuramanta ama micunguichu” nishca jahua, cambac huarmi nishcata uyashpa, micushcamantami cai allpaca mana alli nishca canga. Tucui causaipimi llaquita trabajashpa, granota pucuchishpa causangui.

¹⁸ Allpapica cashacuna, cardos yuracunami pucunga. Allpapi huiñashca yuracunamantami micungui.

¹⁹ Canca allpallamantac cutingacamanca ñahui quingrai jumbishpa trabajashpami micungui. Canca allpamantami ruhuashca cangui. Allpami cangui. Chaillamantacmi cutingui— nirca.

²⁰ Adanca paipac huarmi tucui gentecunapac mama cagricucpimi, Evata shutichirca.

²¹ Mandac Diosca animal caramanta churanata ruhuashpami carimanpish, huarmimanpish churachirca.

²² Shinallatac Mandac Diosca: «Runaca ñucanchic shinallatacmi allitapish, mana allitapish yachac tucushca. Cunanca, maquita chutashpa chai huiñai causaita cuc yuramantaca mana micunachu can. Chaita micushpaca, huiñaitami causanga» nirca.

²³ Mandac Diosca Edén huertamanta runata llucchishpa allpapi trabajachun churarca. Chai allpamantami paica ruhuashca carca.

²⁴ Runata llucchishpaca, Edén huerta inti llucshina ladomanmi querubincunata churarca. Shinallatac huiñai causaita cuc yurapi ama pi chayarichunca, chai muyunditami rupacuc shuc espadata cuidachun churarca.