GÉNESIS 29 - Dios Rimashcata Quillcashcami

Jacobo Raquelmantapish, Leamantapish Labanta servishcamanta

¹ Jacobo rishpaca, inti llucshina ladopi causaccunapac llactamanmi chayarca.

² Chaipacmi shuc yacu jundutapish, chai jundu cuchullapi quimsa manada ovejacuna siricuctapish ricurca. Chai jundupimi animalcunaca yacuta ubiac carca. Chai yacu jundu jahuapica shuc jatun rumimi carca.

³ Chaipi tucui ovejacuna tandaricpimi, michiccunaca chai tapashca rumita anchuchishpa, yacuta ubiachishpa, cutinllatac tapac carca.

⁴ Jacoboca chai michiccunataca: —Huauquicuna, ¿maimantatac canguichic?— nirca. Shina nicpimi paicunaca: —Haranmantami canchic— nirca.

⁵ Shina nicpimi Jacoboca: —¿Manachu Nacorpac churi Labanta ricsinguichic?— nirca. Shina nicpimi paicunaca: —Ari ricsinchicmi— nirca.

⁶ Shina nicpimi Jacoboca: —Paica, ¿allillachu?— nirca. Shina nicpimi paicunaca: —Ari, Labanca allillami causacun. Riqui, chaitami paipac ushi Raquelca ovejacunahuan shamucun— nirca.

⁷ Shina nicpimi Jacoboca: —Manarac animalcunata tandachina horaschu, chairac punzharacmi, yacuta ubiachishpa, cutinllatac michingapac richic— nirca.

⁸ Shina nicpimi paicunaca: —Mana chashna ruhuai pudinchicchu, ashtahuanpish tucui manada ovejacuna tandaringacaman, shinallatac yacu jundu tapashca rumita anchuchingacamanca mana ovejacunaman yacuta ubiachi pudinchicchu— nirca.

⁹ Paicunahuan Jacobo chashna parlanacucucllapitacmi Raquelca paipac taitapac ovejacunahuan chayarca. Paica oveja michicmi carca.

¹⁰ Jacoboca paipac tio Labanpac ovejacunata Raquel pushamucucta ricushcahuanmi, chai yacu jundu tapashca rumita anchuchishpa, paipac mamapac turi Labanpac ovejacunaman yacuta ubiachirca.

¹¹ Shinallatac Jacobo Raquelta muchashpa, sinchita huacashpaca:

¹² “Ñucaca Rebecapac huahua, shinallatac Labanpac sobrinomi cani” nirca. Shina nicpimi, Raquelca callpashpa, paipac taitaman huillangapac rirca.

¹³ Labanca paipac panipac cari huahua shamushcata uyashpaca, callpashpami tupangapac rirca. Jacobohuan tupashpa, ucllarishpa muchashpami, huasiman pusharirca. Chaipimi Jacoboca tucui ima tucushcata parlarca.

¹⁴ Shina parlacpimi, Labanca: “¡Canca ñuca yahuarpurallatacmi cangui!” nirca. Jacoboca shuc quillatami Labanhuanca causarca.

¹⁵ Chaimantami Labanca: —Canca ñuca familiapura cashpapish mana yangachu trabajana cangui. Can trabajashcamantaca, ¿mashnatatac pagachun ningui?— nirca.

¹⁶ Labanca ishcai ushitami charirca. Punta ushica Lea, cutin quipa ushica Raquelmi carca.

¹⁷ Leaca llaquilla ñahui solterami carca. Cutin Raquelca sumac solterami carca.

¹⁸ Jacoboca Raquelta yallita munashcamantami: —Cambac quipa ushi Raquelmantami canchis huatata trabajagrini— nirca.

¹⁹ Shina nicpimi Labanca: —Chican runaman cunapac randica, canman cunami ashtahuan alli. Shinashpaca ñucahuan saquirilla— nirca.

²⁰ Shinami Jacoboca Raquelmantaca canchis huatata trabajangapac saquirirca. Shina cacpipish, Raquelta yallita cuyashcamantaca ashalla huatacuna shinami Jacobomanca ricurirca.

²¹ Canchis huata tucucpica, Jacoboca Labantaca: —Raquelmanta trabajana huatacunaca ñami tucurin, cunanca paihuan cazarashpa causangapac cuilla— nirca.

²² Shina nicpimi, Labanca tucui vecinocunata cayashpa, bodata ruhuarca.

²³ Ashtahuanpish ña tutayacpica, Labanca Lea solteratami Jacobohuan sueñuchun apamurca. Shina apamucpica, Jacoboca chayarircami.

²⁴ Labanca paipac serviccunapuramanta Zilpa huarmitapish Leata servichun curcami.

²⁵ Tutamanta Jacobo jatarishpa ricucpica, Leami cashca carca. Chaimantami Jacoboca Labantaca: —¿Imatatac ruhuarcangui? ¿Manachu Raquelmanta trabajarcani? ¿Imamantatac ñucataca umarcangui?— nirca.

²⁶ Shina nicpimi Labanca: —Cai llactapica punta ushi manarac cazaracpica, quipa ushica mana cazaranachu can.

²⁷ Shinaca Leapac semana bodatarac pactachi, quipataca Raqueltapish cushallami. Paimantapish cutinmi canchis huatata trabajana cangui— nirca.

²⁸ Shina nicpica, Jacoboca ari nishpami, semana bodata pactachirca. Chai quipaca Labanca Raqueltami Jacobomanca paipac huarmi cachun curca.

²⁹ Chashnallatac Labanca paipac serviccunapuramanta Bilha huarmitami Raquelta servichun curca.

³⁰ Jacoboca Raquelpipish chayarircami. Shina chayarishpaca, Leata atishpami Raquelta ashtahuan cuyarca. Shinami cutin canchis huatata Labanman trabajarca.

Jacobopac huahuacunamanta

³¹ Mandac Diosca Jacobo Leata mana munacucta ricushpami, Leataca huahuata charicta ruhuarca. Cutin Raqueltaca huahuata mana charic pudictami ruhuarca.

³² Leaca huicsayuc tucushpami, shuc cari huahuata charirca. Chaimantami Leaca: «Mandac Diosca ñuca llaquilla cactami ricushca, chaimantami ñuca cusaca cuyanga» nishpami Rubenta shutichirca.

³³ Cutinllatacmi Leaca shuc cari huahuata charirca. Chaimantami Leaca: «Ñucata mana valichicucta ricushpami, Mandac Diosca cai huahuatapish cushca» nishpami Simeonta shutichirca.

³⁴ Cutinllatacmi shuctac cari huahuata charirca. Chaimantami Leaca: «Cunanca quimsa huahuatami ñuca cusaman cushcani. Chaimantami ashtahuan ñuca cusaca ñucapi chayaringa» nishpami, Levita shutichirca.

³⁵ Leaca cutinllatacmi shuctac cari huahuata charirca. Chaimantami Leaca: «Cunanca Mandac Diostami alli nigrini» nishpami, Judata shutichirca. Ña quipamanca huahuata charinata saquircami.