GÉNESIS 28 - Dios Rimashcata Quillcashcami

¹ Shina nicpimi, Isaac Jacobota bendiciashpaca: «Cai Canaán llactapi causac huarmicunahuanca ama cazaranguichu.

² Padan-aram llactapi causac cambac mamapac taita Betuelpac huasiman ri. Chaipi cambac mamapac huahua Labanpac ushicunamanta maijanhuan cazarangui.

³ Imatapish ruhuaclla Dios canman bendiciashpa, achca llactacuna tucungacaman cambac huahua huahuacunataca achcata mirachichun.

⁴ Cai ñucanchic pozashpa causacuc allpata Dios cuchun. Cantapish, cambac huahua huahuacunatapish Abrahamta bendiciashca shina bendiciachun. Cai allpataca Diosmi Abrahamman cusha nirca» nirca.

⁵ Chashnami Isaacca Jacobotaca Padan-aram llactaman cacharca. Chaimantami arameopuramanta Betuelpac churi Labanpac huasiman chayarca. Labanca Rebecapac turimi carca. Cutin Rebecaca Esaupac, Jacobopac mamami carca.

⁶ Esauca Isaac Jacobota bendiciashcatapish, Jacobohuan cazarachingapac Padan-arammanta solterata apachun cachashcatapish, shinallatac: «Canaán llactapi causac solteracunahuanca pacta cazaranguiman» nishcatapish,

⁷ Jacobo paipac taita mamata cazushpa, Padan-aramman rishcatapish yacharcami.

⁸ Shinallatac Esauca paipac taita Isaac Canaanmanta solteracunata mana ricunayachishcatapish yacharcami.

⁹ Chaimantami Abrahampac churi Ismaelpacman rishpa, paipac ushi Mahalat solterahuan cazararca. Mahalatca Nebaiotpac panimi carca. Esauca Canaanmanta huarmicunata charishca jahuami, paihuanpish cazararca.

Bet-elpi Dios Jacoboman ricurishcamanta

¹⁰ Jacobo Beersebamanta llucshishpaca, Harán llactamanmi rirca.

¹¹ Ña inti tigranatami shuc pambaman chayashpa, chaipi sueñurca. Chaipimi shuc rumita japishpa, saunata ruhuashpa, sueñungapac siririrca.

¹² Shina sueñucushpami, pambamanta jahua pachacaman shuc escalera shayacucta muscurca. Chai escalerataca Diospac angelcunami huichicucurca, shinallatac uricucurcapish.

¹³ Shinallatac Mandac Dios chai escalera jahuamantaca: «Ñucami cambac taita Abrahampac, shinallatac Isaacpac Mandac Dios cani. Can sueñushpa siricuc allpataca canman, shinallatac cambac huahua huahuacunamanmi cusha.

¹⁴ Cambac huahua huahuacunaca ñuto allpa shinami, achcata miraringa. Jahuamanpish, uramanpish, inti llucshina ladomanpish inti tigrana ladomanpish rishpami, mirarishpa causangacuna. Canmantapish, cambac huahua huahuacunamantapishmi tucui cai pachapi causaccunata bendiciasha.

¹⁵ Ñucaca canhuanmi cani, can maita ricpipish, cuidashpami, cai allpaman cutichimusha. Can ñuca nishcata pactachingacaman cantaca manatac saquishachu» nirca.

¹⁶ Jacobo riccharishpaca: «¡Mandac Diosca caipipish cashcamari! ¡Chaitaca mana yacharcanichu!» nishpami yuyarirca.

¹⁷ Paica yalli manchaihuan cashpami: «¡Cai pambaca mana yangallachu, Diospacmi cashca! ¡Caipica Diospac huasimari, shinallatac jahua pacha pungumari!» nirca.

¹⁸ Jacoboca cayandi utca jatarishpami, saunashpa sueñushca rumita japishpa, shuc pilarta shina shayachirca. Chai quipaca aceiteta chai rumipi tallishpami, Diospacllata ruhuarca.

¹⁹ Shina ruhuashpami, Jacoboca chai pambataca Bet-eltami shutichirca. Ñaupaca chai pambapi tiyac puebloca Luz shutimi carca.

²⁰ Chaipimi Jacoboca: «Dioslla, can ñucahuan cashpaca, ñuca rina ñanpi micunatapish, churanatapish cushpa, alli pushangui.

²¹ Can ñuca taitapac huasiman ima llaqui mana tucushcata cutichimushpaca, ñucata Mandac Diosmi cangui.

²² Ricunalla cachunmi, pilarta shina, cai ñuca shayachishca rumica Diospac huasi canga. Shinallatac tucui can imalla cushcacunamantaca chungamanta shucta chicanyachishpami canmanca cusha» nirca.