GÉNESIS 27 - Dios Rimashcata Quillcashcami

Isaac Jacobota bendiciashcamanta

¹ Isaacca yallita yuyacpish, ñahui mana ricucpish cashpami paipac punta churi Esauta cayashpaca: —¡Ñuca huahua Esaulla!— nirca. Shina nicpimi Esauca: —Caipimi cani— nirca.

² Chashna nicpimi Isaacca: —Ñucaca ña yuyacmi cani, ima punzha huañunatapish mana yachanichu.

³ Cunanca, animalta japina flechatapish, arcotapish mochilapi apashpa, sachapi animalta japimugri.

⁴ Ñuca manarac huañushpa bendiciangapac, ñuca munashca shina, chai aichata sumacta yanushpa carai— nirca.

⁵ Rebecaca Isaac paipac churi Esauta imata nicushcataca uyacurcami. Chaimantami Esaú paipac taitaman carangapac sachapi animalta japingapac ricpi,

⁶ Rebecaca paipac quipa huahua Jacobotaca: —Riqui huahua, cambac taita Isaacca cambac huauqui Esautaca:

⁷ «Ñuca micungapac sachapi animalta japimushpa, yanushpa carai. Ñuca manarac huañushpa, Mandac Diospac ñaupapi bendiciashami» nicuctami uyani.

⁸ Riqui huahua, cunanca ñuca imata nishcata uyai.

⁹ Cunanca, cambac taita munashca shina, sumacta yanushpa, paiman carangapac animalcuna shayanaman rishpa, ishcai maltón chivota apamugri.

¹⁰ Can chai micunata cambac taitaman cucpi, pai micushpaca, manarac huañushpami canman bendicianga— nirca.

¹¹ Shina nicpimi, Jacoboca paipac mama Rebecataca: —Ñuca huauqui Esauca millmayuc cuerpomi, ñucaca manamari millmayuc canica.

¹² Ñuca taita maquihuan tuparishpa ricsishpaca, ñuca umashcamanta bendicianapac randica maldiciangami— nirca.

¹³ Shina nicpimi, paipac mama Rebecaca: —Ñuca huahualla, canta maldicianapac randica, ñucata maldiciachun. Canca ñuca nishcata uyashpa, chai chivocunata apamugri— nirca.

¹⁴ Chaimantami Jacobo rishpaca, paipac mama Rebecaman chivocunata apamushpa curca. Paipac mamaca Isaac munashca shinami, sumacta yanushpa curca.

¹⁵ Chai quipaca paipac punta huahuapac huacaichishca, achca valishca sumac churanata llucchishpami, paipac quipa huahua Jacoboman churachirca.

¹⁶ Chai quipaca Jacobopac maquicunapi, cungapi maipi mana millma tiyashcapimi huahua chivo carahuan pilluchirca.

¹⁷ Chashna pillushpami, sumacta yanushca aichatapish, tandatapish paipac huahua Jacoboman cushpa cacharca.

¹⁸ Chaimantami Jacoboca paipac taitapacman rishpaca: —¡Ñuca taitito!— nishpa cayarca. Shina cayacpi Isaacca: —Caipimi cani huahualla, ¿pitac cangui?— nirca.

¹⁹ Shina nicpimi Jacoboca: —Ñucaca cambac punta churi Esaumi cani. Cunanca jatari, ñami can nishca shina animalta japishpa, yanushpa apamuni. Cunanca animal aichata micungapac jatari. Chai quipaca ñucata bendiciangui— nirca.

²⁰ Shina nicpimi Isaacca: —Ñuca huahualla, ¿ima shinatac utca japimunguiyari?— nirca. Shina tapucpimi Jacoboca: —Canta Mandac Diosllatacmi animalcunata ñuca ñaupapi ricuchirca— nirca.

²¹ Shina nicpimi Isaacca: —Ñuca churi Esaú cashcata, mana cashcata tuparishpa yachangapac cuchuyai— nirca.

²² Shina nicpimi, Jacobo cuchuyacpi, taita Isaac tuparishpaca: —Rimaica, Jacobopac rimaimi, shinapish maquica Esaupac maquimi— nirca.

²³ Paipac maqui Esaupac maqui shina, millmayuc cacpimi, Isaacca mana ricsirca. Shinallatac bendiciangapac

²⁴ Cutinllatac tapushpaca: —¿Canca ñuca churi Esauchu cangui?— nirca. Shina nicpimi Jacoboca: —Ari, Esaumi cani— nirca.

²⁵ Shina nicpica, paipac taitaca: —Ñuca canta bendiciangapac can japimushca animal aichata carangapac cuchuyai— nirca. Jacobo cuchuyashpa caracpica, Isaacca micurcami. Vinotapish cucpi ubiarcami.

²⁶ Chaimantami paipac taita Isaacca: —Cunanca huahualla, cuchuyashpa, muchai— nirca.

²⁷ Chashna nicpica, Jacoboca cuchuyashpa mucharcami. Shina muchacpi, churanata mutquishpa bendiciashpaca: «Ñuca churica Dios bendiciashca pamba shinami ashnan.

²⁸ Dios jahua pachamanta allpapi tamyachishpa pucuchichun. Achca trigotapish, achca vinotapish canman cuchun.

²⁹ Achca gentecuna canta servichun, jatun llactacunapi causaccunapish cambac ñaupapi cumurichun. Canmi huauquicunataca mandangui. Cambac mamapac huahuacunapish cambac ñaupapimi cumuringa. Canta maldiciaccunataca maldiciashca cachun. Cutin canta bendiciaccunataca bendiciachun» nirca.

³⁰ Isaac bendiciashca quipa, Jacobo Isaacpac ñaupamanta llucshishpa ricucpimi, paipac huauqui Esauca animalta japishpa chayarca.

³¹ Chashna chayashpa, paipish sumacta yanushpa, paipac taitapacman apashpaca: —Ñuca taitalla, cambac churi japimushca animal aichata micungapac jatari. Chai quipaca ñucata bendiciangui— nirca.

³² Shina nicpimi, paipac taita Isaacca: —¿Pitac cangui?— nirca. Shina nicpimi Esauca: —Ñucaca cambac punta churi Esaumi cani— nirca.

³³ Shina nicpimi, Isaacca achca manchaihuan chucchushpa: —¿Pitac can manarac shamucpi, caiman shamushpa, aicha yanushcata cararcayari? ¡Ñami bendiciarcani! ¡Paimi bendiciashca saquirin!— nirca.

³⁴ Paipac taita chashna nicpica, Esaú yallita llaquirishpa huacashpaca: —¡Ñuca taitalla, ñucatapish bendiciaiyari!— nirca.

³⁵ Shina nicpimi Isaacca: —Cambac huauqui shamushpa umashpami, canman cuna bendiciontaca japirca— nirca.

³⁶ Shina nicpimi Esauca: —Shinaca allimi paitaca Jacobota shutichishca. Ña caihuanca ishcai cutinmi uman. Sarunca punta churi japinatami quichurca. Cunanca taitamanta ñuca japina bendiciontami japin. Ñucaman cuna bendiciontaca, ¿manachu huacaichircangui?— nirca.

³⁷ Shina nicpimi, Isaacca Esautaca: —Paitaca cambac amo cachunmi churarcani. Cambac tucui huauquicunatapish, paita servichunmi churarcani. Shinallatac achca trigotapish, achca vinotapish curcanimi. Ñuca huahualla, cunanca, ¿imatatac cushayari?— nirca.

³⁸ Shina nicpimi Esauca: —¡Ñuca taitalla! ¿Manachu ñucamanpish bendicionta charingui? Ñuca taitalla, ¡ñucamanpish bendicionta cuiyari!— nirca. Shina nishpami, caparishpa huacarca.

³⁹ Shina nicpimi, taita Isaacca: «Canca tamya llactamantapish, alli allpamantapish carupimi causangui.

⁴⁰ Espadahuan misarishpa, huauquita servishpami causangui. Sinchiyashpaca yugota cambac cungamanta anchuchic shinami, servinamanta llucshingui» nirca.

Jacobo Esaupacmanta miticushpa rishcamanta

⁴¹ Esauca Jacoboman paipac taita bendicionta cushcamantami paita mana ricunayachishpaca: «Ñallami ñuca taita Isaacca huañunga. Pai huañucpica, Jacobotapish huañuchishami» nishpami yuyacurca.

⁴² Esaú chashna nishcataca Rebecaman parlarcami. Chaimantami Rebecaca quipa huahua Jacobota cayachun cachashpaca: —Can quichushcamanta cambac punta huauquica huañuchinatami yuyaricun.

⁴³ Cunanca ñuca huahualla, ñuca nishcata uyai. Haranpi causac ñuca turi Labanpacman cunanllatac miticushpa ri.

⁴⁴ Cambac huauqui rabiata pasachingacaman maijan punzhacunata paihuan causagri.

⁴⁵ Can imata ruhuashcata cungarishpa, ña mana piña cacpica, canta caiman pushamuchun cachashallami. ¿Maitatac cancunataca shuc punzhallapi ishcaitatac chingachishayari?— nirca.

⁴⁶ Chai quipami Rebecaca Isaactaca: —Ñucaca heteocunapac ushicunahuanca mana allichu causani. Jacobo cai llactapi causac Hetpac ushicunahuan cazaracpica, ¿imapactac causacusha?— nirca.