GÉNESIS 26 - Dios Rimashcata Quillcashcami

Isaac Gerar llactapi causagrishcamanta

¹ Chai llactapica yalli yarcaimi tiyarca. Abraham causacui huatacunapi yarcai tiyashca shinami yalli yarcai tiyarca. Chaimantami Isaacca filisteocunata jatun mandac Abimelec causacuc Gerar puebloman rirca.

² Chaipimi Mandac Dios Isaacman ricurishpaca: —Ama Egiptomanca urai richu. Ñuca maipi causagri nishcapi causagri.

³ Chaipi causacpimi, ñucaca canhuan casha. Tucui chai allpata canmanpish, cambac huahua huahuacunamanpish cushpami bendiciasha. Chashnami, cambac taita Abrahamman cusha nishcataca pactachisha.

⁴ Cambac huahua huahuacunataca jahua pacha lucerocunata shinami mirachishpa, tucui cai allpacunata cusha. Cambac huahua huahuacunamantami tucui cai pachapi causaccunataca bendiciasha.

⁵ Abrahamca ñuca rimashcata uyashpami, ñuca nishcatapish, mandashcacunatapish, imata ruhuachun nishcacunatapish, yachachishcatapish pactachirca— nirca.

⁶ Isaacca Gerar llactapimi causacurca.

⁷ Isaac chaipi causacucpimi, chaipi causac runacuna paipac huarmimanta tapurca. Chashna tapucpimi: «Ñuca panimi» nirca. Chai llactapi causac runacuna paipac huarmi Rebecamanta huañuchingami yuyashpami «Ñuca huarmimi» ninataca mancharca. Rebecaca sumac ñahui huarmimi carca.

⁸ Isaacca chaipica tauca punzhacunatami carca. Shuc punzhami filisteocunata jatun mandac Abimelecca paipac huasi ventanamanta Isaac paipac huarmi Rebecata cuyachicucta ricurca.

⁹ Chaimantami Abimelecca Isaacta cayashpaca: —¡Riqui, chai huarmica cambac huarmimi cashca! Chashna cacpica, ¿ima nishpatac canca: “Ñuca panimi” nircangui?— nirca. Shina nicpimi Isaacca: —Ñuca huarmimanta huañuchingami yuyashpami chashnaca nircani— nirca.

¹⁰ Shina nicpimi Abimelecca: —¿Ima nishpatac caita ruhuarcangui? Caimanta maijan runacuna cambac huarmihuan sueñushca cacpica, canmantami ñucanchicca juchallinchicman carca— nirca.

¹¹ Chaimantami Abimelecca tucui chai llactapi causaccunataca: —Maijanpish chai runata, mana cashpaca huarmita tuparishpa, llaquichicca huañungami— nishpa rimarca.

¹² Isaacca chai llactapimi tarpushpa causarca. Mandac Dios bendiciacpimi, chai huataca shuc granomanta patsac granota tandarca.

¹³ Chashnami Isaacca tucuita charishpa, ashtahuan chayucyashpa catirca.

¹⁴ Paica achca ovejacunata, achca huagracunata, achca tarpuna allpacunatami charirca. Chaimantami filisteocunaca pai charic cashcamanta piñarca.

¹⁵ Isaacpac taita Abraham causacui punzhacunapi Abrahamta serviccuna yacuta llucchingapac ruhuashca junducunatami filisteocunaca allpata jundachishpa chingachirca.

¹⁶ Chaimantami Abimelecca Isaactaca: —Caimanta llucshishpa ri, cai llactapica canca ñucanchicta atishpa, yalli chayucmi tucushcangui— nirca.

¹⁷ Shina nicpimi, Isaacca chaimanta rishpa, Gerar pambaman chayashpa, chaipi causai callarirca.

¹⁸ Chaimantami Isaacca paipac taita Abraham causacui punzhacunapi yacuta llucchingapac ruhuashca junducunataca cutin pascarca. Chai junducunataca filisteocunami Abraham huañushca quipa chingachirca. Chashna pascashpami, paipac taita shutichishca shuticunallatatac cutin shutichirca.

¹⁹ Ashtahuanpish Isaacpac serviccuna chai pambapi allashpaca, yacu talliricuc jundutami tarirca.

²⁰ Chai yacumantami Gerarpi michiccunaca Isaacpac michiccunataca: —Cai yacuca ñucanchicpacmi— nishpa piñarca. Paicuna piñanacushcamantami Isaacca chai jundutaca Esec nishpa shutichirca.

²¹ Chai serviccunaca cutinllatacmi shuc yacu junduta allarca. Chai yacu jundutapish quichunacushpa piñanacurcallatacmi. Chaimantami Isaacca chai yacu jundutaca Sitna nishpa shutichirca.

²² Isaacca chaimanta caruyashpami, cutinllatac shuc yacu junduta allarca. Chai yacu jundumantaca ña mana piñanacurcachu. Chaimantami chai yacu jundutaca Rehobot quishpirishca nishpa shutichirca. Shinallatac: «Mandac Dios tucuipi ayudacpimi, alli causanchic. Cunanca, cai allpallapitac achca huahuayuc tucushpa causashun» nirca.

²³ Chaimantaca Beersebamanmi huichai rirca.

²⁴ Chai tuta Mandac Dios paiman ricurishpaca: «Ñucaca, Abrahampac Diosmi cani. Ama manchaichu, ñucaca canhuanmi cani. Ñucata servic Abrahamta cuyashpami, bendiciashpa, cambac huahua huahuacunatapish achcata mirachisha» nirca.

²⁵ Chaipimi Isaacca altarta ruhuashpa, Mandac Diosta pagui nirca. Shinallatac chaillapitacmi carpa huasita ruhuarca. Chaipi causacucpimi, Isaacta serviccunaca shuc yacu junduta allarca.

²⁶ Jatun mandac Abimelecca Gerar llactamantami paipac ricsishca Ahuzothuan, paipac soldadocunata mandac Ficolhuanmi Isaac-huan parlangapac shamurca.

²⁷ Shina shamucpimi Isaacca: —¿Ñucata mana ricunayachishpa, cancunapuramanta llucchishpa cachashca jahuachu, ñucataca ricungapac shamunguichic?— nirca.

²⁸ Shina nicpimi paicunaca: —Mandac Dios canhuan cashcatami ricushcanchic. Chaimantami ñucanchicca canhuan shuc ari ninacuita ruhuashun ninchic.

²⁹ Chaica: “Ima shinami ñucanchic ima millaita mana ruhuashpa cushilla cacharcanchic, chashnallatac mana ima millaita ruhuangapacmi” ari ninacuita ruhuashun ninchic. Canca Mandac Dios bendiciashcamari cangui— nirca.

³⁰ Chai quipami paicunaca jatun micuita ruhuashpa micurcacuna, shinallatac ubiarcacuna.

³¹ Cayandi tutamanta utca jatarishpami, Isaacpish, Abimelecpish ari ninacuita ruhuarca. Chai quipaca Isaacpish, paicunapish caya minchacaman ninacushpami, cushilla rircacuna.

³² Chai punzhacunallapitac Isaacta serviccuna shamushpaca: «¡Yacu junduta allacushca pushtupica ñami yacuta tarircanchic!» nishpa huillarca.

³³ Chai jundutaca Isaacca Ari ninacuitami shutichirca. Chaimantami chai llactaca cunan punzhacaman «Beerseba» shuti can.

³⁴ Esaú chuscu chunga huatayuc cashpami, heteopuramanta Beeripac ushi Judithuan, heteocunapuramanta Elonpac ushi Basemathuan cazararca.

³⁵ Cai ishcai huarmicunami Isaactapish, Rebecatapish shungupi llaquichishpa causarca.